2 Corintios 4

1Ja' swentail te ma xpejc'aj co'tantic, te melel Dios la yac'botiquix cat'eltic ta swenta bit'il la quich'tic c'uxtayel yu'un. 2La quijq'uitaytiquix jilel te bila la jpastic ta muquen te ya xq'uexawotic yu'une. Ma ba ya caiytic lo'laywanej, soc ma ba ya jcaptic ta lotil p'ijubtesel te sc'op Diose. Ja' nax ya caltic te bila smelelile. Jich ya cac'tic ta ilel ta stojol spisilic te bit'il ay te co'tantic ta stojol te Diose. 3Te mach'a ya yal te ma jamaluc te lec yach'il c'op ya caltique, ja' nax te mach'atic ya xbajt'ic ta ch'ayele. 4Melel te dios yu'un in balumilal to, sc'atp'unej ta ma'sit te mach'atic ma ba xch'uunejic te Diose. Jich ma xju' ya sna'ic stojol xujt'uc. Swenta yu'un jich ma xyilbeyic xojobil yutsilal te lec yach'il c'op yu'un te Cristoe, melel te Cristoe pajal yilel soc te Diose. 5Melel te jo'otique, ma ja'uc ya jchol jc'oplaltic, ja' ya jcholbeytic sc'oplal te Cajwaltic Jesucristoe. Te jo'otique, abat nax ayotic ta atojolic ta swenta xc'uxul yo'tan te Jesuse. 6Melel ja' la yal stuquel te Diose, te ya sacubuc q'uinal ta bay te ijc' q'uinale. Soc ja' nix te la yac' sacubuc q'uinal ta bay te co'tantique, swenta yu'un jich me ya jna'beytic sba a te yutsilal te Diose, te chican ta ilel ta sit yelaw te Jesucristoe. 7Ayix ta jwentatic te c'ulejalil te nojel ta pac'bil oxom te pasbil ta ajch'ale. Swenta yu'un jich ya xchicnaj te ja' nax ta swenta smuc'ul yu'el Dios te ay bila ya xju' cu'untique, ma ja'uc ta swenta te quiptique. 8Jich yu'un, manchuc teme ay bayal te bila ya xc'ax jwocoltic yu'une, ja'uc me to, ya xloc'otic tey a. Soc manchuc teme ma xju'ix te bi ya cut jbatique, ja'uc me to, ma jc'axeluc ya xlajotic ta tenel yu'un. 9Soc manchuc teme bayal ayotic ta uts'inel, ja'uc me to, ma ba pijt'esbilotic. Soc manchuc teme ya xlajotic yilel, ja'uc me to, ma jc'axeluc ya sjinotic. 10Bayuc ya xbootic, ayotic ta lajel spisil ora soc te jbaq'uetaltic jich bit'il te Jesuse, swenta yu'un jich me ya xchicnaj ta bay jbaq'uetaltic uuc te bit'il cuxul stuquele. 11Melel te jayeb c'aal cuxulotic ta q'uinal, te jo'otique ayotic ta lajel ta scaj te Jesuse, swenta yu'un jich me ya xchicnaj ta swenta jbaq'uetaltic te ya xlaje te bit'il cuxul stuquel te Jesuse. 12Jich te jo'otique, ya xlajotic soc te jbaq'uetaltique. Yan te ja'exe, ya ataic cuxinel atuquelic. 13Jich te bit'il ts'ibubil ta Sjun te Diose: “La cac' xch'uunjel co'tan, ja' swentail te jich la cale”, te xie. Jich jch'uunejtic uuc te jo'otique, soc ja' swentail te jich ya caltique. 14Yu'un jna'ojtic stojol te bit'il Dios la xcha'cuxes ta bay animaetic te Cajwaltic Jesuse. Ja' nanix jich ya xcha'cuxesotic tel soc te Jesuse, swenta yu'un jun nax ya yic'otic bael tey a te banti aye. 15Spisil te bila ya xc'ot ta jwentatic te jo'otique, swenta ac'uxtayelic te ja'exe, swenta yu'un ay me tsobol te ya x'ac'bot bendición yu'un te Diose soc ay me tsobol te ya yalic wocol yu'un te yutsilal te Diose. 16Ja' swentail te ma xpejc'aj te co'tantique. Manchuc teme yanyan ta lajel te jbaq'uetaltique, ja'uc me to, yanyan ta ach'ubel jujun c'aal te co'tantique. 17Melel te bila ya xc'ax jwocoltic yu'un li'to ta q'uinale, c'axel nax ay soc ma'yuc lec sc'oplal stuquel. Ja' ya jtatic bayal cutsilaltic ta c'axem to xan a ta swenta sbajt'el q'uinal. 18Ma me ja'uc baem ta co'tantic te bila chican ta ilel ya quiltique, ja'uc me te bila ma chicnajuc ta ilele. Melel te bila chican ta ilele, jc'axel nax ay stuquel. Yan te bila ma chicanuc ta ilele, sbajt'el q'uinal ay stuquel.


Copyright
Learn More

will be added

X\