2 Corintios 3

1¿Yu'un bal ya acuyic te tey ya xjajch' cac' jbajtic xan ta ich'el ta muc' a? ¿Soc yu'un bal ya sc'an te ay carta ya cac'beyex awilic te banti ya yalbotic te bit'il lec cat'eltic, jich te bit'il ay ya spasic te yantique? ¿Soc ya bal sc'an te ya jc'anbeyex carta ta atojolic uuc te ja'exe? 2Ma jichuc. Melel ja'ex atuquelic te carta c'oemex cu'untique. Ts'ibubil ta co'tantic te tey ya xju' ya yilic a soc ya sna'ic stojol spisil te ants-winiquetique. 3Jamal chican ta ilel te ja' cartaex te ts'ibubil yu'un te Cristoe te la yac' ta jwentatique. Ma ja'uc ts'ibubilex ta tinta, ja' ts'ibubilex a te Espíritu yu'un te cuxul Diose. Ma ja'uc ch'ojtilaybil ta ts'ibuyel ta bay pejch'el tonetic, ja' la yich'ix ch'ojtilayel ta ts'ibuyel ta awo'tanic. 4Spisil in to, ja' smuc'ul co'tantic ta stojol Dios ta swenta te Cristoe. 5Ma yu'unuc ya xju' ya caltic te ay bila ya xju' cu'untic ta jtuqueltic naxe. Spisil te bila ya xju' cu'untique, ja' ya yac' c'otuc ta pasel stuquel te Diose. 6Ja' nax stuquel te la yic'otic ta abatinel ta yalel sc'oplal te yach'il tratoe. In te tratoe, ma ja'uquix te ts'ibubile, ja'ix te Espíritu te cuxul stuquele. Te mandalil te ts'ibubil jilele, ay lajel ta swenta; yan te Espiritue, ja' ay cuxinel ta swenta stuquel. 7Te mandalil yu'un Moisés te ay lajel ta swenta, la yich' ch'ojtilayel ta ts'ibuyel ta pejch'el tonetic. Te c'alal jich yac ta c'oel ta pasele, ay bayal xojobil te yutsilale. Jich te israeletique ma ju' yu'unic yilel sit yelaw te Moisese, yu'un bayal xojobajem te site. Ja'uc me to, c'unc'un tup' te xojobile. Teme jich ay yutsilal te mandaliletic te ay lajel ta swentae, 8¿ma bal c'axemuc to xan jich ay yutsilal yich'oj te sc'op Dios te la yac' te Ch'ul Espiritue? 9Ja' bi, teme bayal yutsilal te mandalil te la swentain yaq'uel castigo yu'un te mulile, ¿ma bal c'axemuc to xan jich ay yutsilal te sc'op Dios te ya yal te bit'il libre ya xc'ootic yu'un te jmultique? 10Melel te mandalile, ay bayal yutsilal ta neelal to. Ja'uc me to, ma pajaluc yutsilal soc te bila chicnajix te c'axem to xan ay yutsilal stuquele. 11Ay nax yutsilal te bila ma ba jalaj bayal c'aale, ja'uc me to, c'axem to xan ay yutsilal te bila jc'axel ma xlaj sbajt'el q'uinale. 12Te bit'il jich yacotic ta smaliyele, jich jamal co'tantic ta yalel spisil ora. 13Ma jichuc ya jpastic te bit'il la spas te Moisese, te la smac ta pac' sit yelaw, swenta yu'un ma ba ya yilic a te israeletic te bit'il ya xtup' te xojobil yelaw te ma ba jalaje. 14Ja'uc me to, ma c'ot ta yo'tanic te bila la yilique. Ja' to c'alal ta ora to, te c'alal ya yilic te pocol tratoe, ja' nanix jich macal to sitic yu'un te paq'ue. Melel ja' nax ta swenta Cristo te ya xju' ya xloc' te paq'ue. 15Jich ta ora to te jujun buelta ya yilic te junetic ts'ibubil yu'un te Moisese, ma sna'ic stojol te bi ya yilic tey a, te melel macal to ta pac' te yo'tanique. 16Ja'uc me to, te c'alal ya sujt'es yo'tanic ta stojol te Cajwaltique, te paq'ue ya yich' loq'uesel. 17Melel te Cajwaltique, ja' te Espiritue. Ta banti ay te Espíritu yu'un te Cajwaltique, ay colel tey a. 18Jich yu'un te jo'otique, lemen xojobil yutsilal Cajwaltic ta jsit quelawtic, jich te bit'il espejo, yu'un ma ba macalix jsitic ta pac'. Jich yanyanotic ta c'atp'ujel ta swenta te pajal quileltic ya xc'ootic soc te yutsilale. Ja' yat'el te Espíritu yu'un te Cajwaltic te ya x'at'ej ta co'tantic.


Copyrighted Material
Learn More

will be added

X\