2 Corintios 2

1Ja' swentail te jich la jnop xan ta co'tan te ma ba ya xtal cac'beyex xan amel awo'tanic ta jwenta. 2Yu'un teme jo'on ya cac'beyex amel awo'tanique, ¿mach'a me a te ya smuc'tesbon q'uinal caiy te jo'one? Ja'uc me to, ¿bit'il ya xju' awu'unic, te melel neel la cac'beyex amel-o'tanic te ja'exe? 3Ja' swentail te la jts'ibubeyex acartaic, swenta yu'un ma ba ya awac'bonic jmel co'tan teme talon ta atojolique. Yu'un ja' ya sc'an te ya awac'bonic bujts'najuc co'tan te ja'exe. Ja' ay ta co'tan te ya me xbujts'naj awo'tanic uuc teme ay sbujts' co'tan te jo'one. 4Te c'alal la jpasbeyex te cartae, bayal ayon ta mel-o'tan, soc ta wocol, soc bayal la coq'uetay jba ta awentaic. Ja'uc me to, ma yu'unuc ja' la jts'ibuybeyex carta yu'un te ya caq'uex ta mel-o'tane. Ja' la sc'an co'tan te yacuc ana'ic te bit'il bayal c'uxex ta co'tane. 5Ja'uc me to, te bit'il ay mach'a la yac' te mel-o'tane, ma jo'ocon nax jtuquel te la yac'bon jmel co'tane, ja'ex la yac'beyex amel awo'tanic ta apisilic uuc. (Ma xcal te bayal la amel awo'tanique, yu'un ma jc'an xjelawon ta c'op.) 6Tiq'uix a te tulan tojobtesel la awac'beyic te c'alal la achajbanique. 7Jich yu'un ta ora to, ja' lec te ya apasbeyiquix perdón soc te ya amuc'tesbey q'uinal yaiye, swenta yu'un ma me xtenot yu'un te mel-o'tane. 8Ja' swentail te ya calbeyex wocol te ya awac'beyic yil te bit'il c'ux ya awaiy ta awo'tanique. 9Ta neelal to la calbeyex ta carta sc'oplal in winic to, swenta yu'un tey me ya jna' a teme ya ach'uunbonic spisil te bila ya calbeyex te ya apasique. 10Teme ay mach'a ya apasbeyic perdón yu'un te bila amen la spase, jich ya jpasbey perdón yu'un uuc te jo'one. Yu'un te mach'a ya jpasbey perdone, teme ay nix bila ya sc'an ya jpasbey perdón yu'une, ja' ya jpasbey perdón ta awentaic ta stojol te Cristoe. 11Swenta yu'un jich ma ba ya stsalotic tey a te Satanase, melel quilojtic te bayal smaña stuquele. 12C'alal c'oon ta bay lum Troas ta xcholel te lec yach'il c'op yu'un te Cristoe, te Cajwaltic la sjambon te jbe swenta ya xju' ya x'at'ejon tey a. 13Ja'uc me to, ma la yich' lewa te co'tane, yu'un ma la jta tey a te quermanotic Titoe. Jich la jpatbey jilel yo'tanic, boon ta sq'uinal Macedonia. 14Ja'uc me to, wocol la yalbotic te Diose te spisil ora ya scoltayotic ta tsalaw ta swenta te Cristoe. Dios ya yac' ta puquel ta bayuc ta jwentatic te sc'oplal te Cristoe, jich bit'il te bila mero bujts'an nax yic' ya xbeen ta bayuque. 15Yu'un te jo'otique jich c'oemotic te bit'il perfume ta stojol Dios yu'un te Cristoe. Pajal ya xpujc' yic' ta stojol te mach'atic ya xcolique soc ta stojol te mach'atic ya xbajt'ic ta ch'ayele. 16Melel te mach'atic ch'ayel ya xbajt'ique, jich c'oemotic ya yaiyic te bit'il bayal stuil te ya xlajic yu'une. Yan te mach'atic ya xcolique, jich c'oemotic ya yaiyic te bit'il perfume te ya xcuxinic yu'une. Ta spisil in to, ¿mach'a ya xju' yu'un spasel ta stuquel nax? 17Ja'uc me to, te jo'otique ma jichuc ayotic te bit'il yantic te ya scuyic ta sp'olmalic te sc'op Diose. Te jo'otique ja' ya caltic ta jamal spisil te sc'op Diose. Yu'un ja' ticunbilotic yu'un te Diose, soc ayotic ta abatinel yu'un te Cristoe.


Copyright
Learn More

will be added

X\