2 Corintios 12

1Ma snujp'in te toyol q'uinal ya caiy yu'un te bit'il ayon ta q'uinale. Pero ya xtal ta co'tan te bila ac'boton quil ta jtelemal yilel yu'un te Cajwaltique, soc te bila ac'boton jna' yu'une. 2Ay jtul winic te xch'uunej Cristo te jna'ojbey sba ta leque, ayix ta xchanlajunebal ja'wil te ic'ot moel c'alal ta yoxcajal te ch'ulchane. (Ma jna' teme soc sbaq'uetal ic'ot moele o teme ma socuc sbaq'uetale. Ja' nax sna'oj te Diose.) 3Jna'ojbey sba te winic te ic'ot moele. (Ja' ma jna' teme soc sbaq'uetale o teme ma socuc sbaq'uetale. Ja' nax sna'oj stuquel te Diose.) 4Ic'ot moel ta bay paraiso, te bay la yaiy stojol c'op te ma'yuc mach'a ya xju' yu'un xcholele. 5Ya xju' te ya jtoyesbey q'uinal yaiye. Yan te jo'one, ma ba ya jtoyes q'uinal caiy ta jwenta jtuquel. Ja' nax me ya jtoyes q'uinal ya caiy yu'un te bit'il ma'yuc quipe. 6Te yacuc jc'an te ya jtoyes q'uinal caiy ta jwenta jtuquele, ma jowil c'opuc te ya cal te jichuque, te melel smelelil te bila ya cale. Ja'uc me to, ma jichuc ya jpas, swenta yu'un ma me ayuc mach'a ya yal te c'axem to xan jich ayon te bi quilele soc te bila ya cale. 7Te bila ac'boton jna' stojole jelawen nax yutsilal stuquel. Ja'uc me to, swenta yu'un ma me jtoy jba yu'un, jich ac'boton te bila c'ux ta jbaq'uetal te pajal soc muc'ul ch'ix te ts'apal ta jbaq'uetal ya caiye. Ja' yat'ejib Satanás te la yejch'entesone. 8La calbeyix wocol oxeb buelta te Cajwaltic te yacuc sloq'uesbone. 9Ja'uc me to, jich la yalbon: “Tic'at a te yutsil co'tan awu'une. Melel te cu'ele ja' ya xchicnaj ta lec a te c'alal ma'yuc awipe”, la yuton. Jich yu'un, bin nax co'tan yu'un te bit'il ma'yuc quipe, swenta yu'un jich ya me xchicnaj ta jwenta te yu'el te Cristoe. 10Jich yu'un bin nax co'tan yu'un te ma'yuc quipe, soc te ayon ta bolc'optayele, soc te ma xwejt' te bila ya xtuun cu'une, soc te ayon ta uts'inele, soc te bit'il bayal ayon ta wocol ta swenta te Cristoe. Melel te c'alal ma'yuc quipe, ja' bayal bila ya xju' cu'un a. 11Jich c'opojonix te bit'il mach'a ma sna' q'uinale, yu'un ja'ex nix te la awac'bonic jpase. Melel ja'ex ya sc'an te la awalbonic lec jc'oplal te jichuque. Manchuc teme c'ax peq'uel ayone, ja'uc me to, ma ja'uc peq'uel c'oemon yu'un te muc'ul jpuc-c'opetic awu'unique. 12Melel spisil te muc'ul señaetic soc te jchajp at'eliletic la jpas ta awolilic, ja' ya yac' ta na'el te bit'il mero jpuc-c'opon ta melele. 13¿Ay bal banti ma jichuc la quich'ex ta muc' te bit'il la quich' ta muc' te yantic jch'uunjeletique? ¿O ja' bal ma la quich'ex ta muc' ta ac'opic a te ma la cac'beyex awocolic yu'un te bila tuun cu'une? Teme jiche, pasbon me perdón yu'un. 14Ta ora to chapalonix te ya xtal quilex ta yoxebal bueltae. Ma me cac'beyex awocolic yu'un te bila ya xtuun cu'une, melel ma ja'uc yacon ta sleel te bila ay awu'unique, ja' ya jc'anex atuquelic te ja'exe. Melel te me'il-tatiletique, ja' ay ta swentaic te ya sle taq'uin ya xtuun yu'un te yal-snich'anique. Ma ja'uc te alnich'anetic te ya sle taq'uin ya xtuun yu'un te sme'-statique. 15Jich te jo'one bin nax co'tan ya jlajin te jayeb bila ay cu'une, soc manchuc teme ya cac' jcuxlejal ta swenta awutsilalic te ja'exe. Manchuc teme bayal jc'anojex te jo'one, ja'uc me to, jteb nax ayon ta awo'tanic te ja'exe. 16Manchuc teme ya ana'ic stojol ja'ex te ma la cac'beyex awocolic yu'un te bila tuun cu'une, ja'uc me to, ay ya awalic te la jna' bi la cut te la jlo'layexe. 17Te mach'atic la jticunbeyexe, ¿ay bal jtuluc ta spisilic te la jlo'layex a? 18Te c'alal la calbey wocol te Tito soc jtul xan quermanotic te ba yilexe, ¿Ay bal la slo'layex? Melel ta jchebal soc te Titoe ¿ma bal pajal co'tan soc? ¿Ma bal junuc nax be jt'unoj soc? 19Ay niwan ya awalic te ja' nax ya jcoltay jba ta c'op ta atojolic, ja'uc me to, ma jichuc. Smelelil yacotic ta c'op ta swenta te Cristoe soc ta stojol te Diose. Quermanotac, te bayal c'uxex ta co'tantique, spisil te bila ya caltique, swenta yu'un ya me sta xan yip awo'tanic ta stojol Diose a. 20Melel ya jxi' teme ma jichuc ya xc'o jtaex te bit'il ya sc'an co'tane, soc teme ma jichucon ta atojolic te bit'il ya sc'an awo'tanic uuc te ja'exe. Ya jxi' teme ay jajch'em c'op awu'unic ae, soc bic'tal-o'tanil, ilimba, xatomba, bolc'optaywanej, muquen aiyej, soc toytombail, soc teme bayal jajch'em c'op awu'unique. 21Soc ya jxi' te ya awac'onic ta q'uexlal ta stojol Dios te c'alal ya xcha'tal quilexe, soc te repente ya coq'uetay jba yu'un te tsobolex te ataoj amulic ta neelal to te ma ba sujt'em awo'tanic yu'un te amulwejique, soc te chican nax mach'a la ac'opon abaic soque, soc spisil te bila q'uexlaltic nax sba te la apasique.


Copyright
Learn More

will be added

X\