2 Corintios 11

1Ayuc bit'il ya xcujch' awu'unic te bit'il jowil nax ya xc'opojone. Chican teme amen ya awaiyic te jc'ope, ts'icbonic me jiche. 2Bayal sc'oplal ta co'tan te manchuc ya xyanaj awo'tanic, jich te bit'il ay yo'tan ta atojolic uuc te Diose. Melel la cac' smacatix c'oem te jtul amamlale. Jich bayal sc'oplal ta co'tan te ma'yuc amul te ya cac'at ta sc'ab te Cristoe. 3Ja'uc me to, ya xiw co'tan teme ay mach'a ya slo'layex, jich te bit'il laj ta lo'layel yu'un sp'ijil sc'op chan te Evae. Ya jxi' teme ay bit'il ya xyanaj awo'tanic, soc te jich ma junuquix awo'tanic ta stojol te Cristoe. 4Melel ma wocoluc ya awac' achiquinic ta yaiybel stojol sc'opic te mach'atic ya xtal yalbeyic sc'oplal yan Jesús te ma ja'uc te Jesús te la jcholbeyex sc'oplal awaiyique. Soc ma wocoluc ya ach'uunic yan espíritu te ma ja'uc te Espíritu awic'ojiquixe, soc ma wocoluc ya ach'uunic yan c'op te ma ja'uc te lec yach'il c'op swenta jcoleltic te awaiyojiquix stojole. 5Ya cal te jo'one te ma'yuc bay peq'uel c'oemon yu'un te muc'ul jpuc-c'opetic awu'unique. 6Manchuc teme ma xtojob lec te jc'ope, ja'uc me to, bayal te bila jna'oj stojole. Soc spisil ora ja' la cac'beyex ana'ic ta swenta te bila jpasojtiquixe. 7Ma'yuc bi la jc'anbeyex xujt'uc te c'alal la jcholbeyex te lec yach'il c'op yu'un te Diose. ¿Ja' bal jmul ta ac'opic te jich peq'uel la cac' jbae swenta yu'un jich me ya xlecubex a te ja'exe? 8Melel la jc'anbey staq'uinic te yantic jch'uunjeletique, ja'uc me to, tey la jlajin a te c'alal la cac' jba ta abatinel ta atojolique. 9Jich te c'alal ayon ta awolilique, ma'yuc mach'a la cac'bey swocol jtuluc te c'alal ay bila ma'yuc cu'une. Melel te quermanotactic macedoniaetic te xc'otuquique, la yac'bonic ta jc'ab te bila ma'yuc cu'une. Jich la jwentain jba swenta yu'un ma me ayuc jtuluquex te ya cac'beyex awocolique, soc jich me ya jpas xan bael. 10Jich nix te bit'il ay ta co'tan te smelelil c'op yu'un te Cristoe, ja' nanix jich jc'axel ay ta co'tan te ma me ayuc jtuluquex te ayex ta spamal sq'uinal Acaya te ya xju' ya acomonic ta spasel te bila toyol q'uinal ya caiy yu'une. 11¿Bi yu'un te jich ya cale? ¿Yu'un bal ma c'uxuquex ta co'tan te ja'exe? Te Diose sna'oj te bayal c'uxex ta co'tane. 12Ja'uc me to, jich me ya jpas xan bael te bit'il nix c'aemon ta spasele, swenta yu'un ma me xcac'beytic permiso te ay mach'a ya xlewanic ta c'ope. Yu'un yacalic ta sleel te toyol nax q'uinal ya yaiyic uuc jich te bit'il te jo'otique. 13Melel lotil jpuc-c'opetic stuquelic soc ya xlo'laywanic. Tojol te scuyoj sbaic ta jpuc-c'opetic yu'un te Cristoe. 14Tojol teme q'uejel nax q'uinal ya caiytic yu'un te bila ya spasique, melel jich uuc te Satanase, ya scuy sba ta ch'ul abat yu'un saquil q'uinal. 15Jich yu'un te mach'atic abatetic yu'un te pucuje, ma wocoluc te ya scuy sbaic ta lequil abat yu'un te toj-o'tanile. Ja'uc me to, ta slajibal ja' me ya xchicnaj a ta swenta te yat'elique. 16Ya calbeyex yan buelta: Ma me ayuc jtuluquex te ya acuyonic te stsacojon jowejele. Yan teme jich acuyonique, ac'bonic permiso te jich ya xc'opojon te bit'il jowejele, swenta yu'un jich me ya xju' te ya jtoy jba jtebuc uuc. 17Te bila ya cal baele, ma smandaluc Cajwaltic, yu'un jowil c'op nax te ya xc'opojone. Jich jun co'tan te ya jtoy jba ta c'ope. 18Ay tsobol mach'atic te ya stoy sbaic ta swenta nax sbaq'uetalic. Jich yu'un te jo'one, ya me jtoy jba yu'un uuc. 19Te ja'exe, buen p'ijex atuquelic. Jich ya xcujch' awu'unic sbolilic spisil te mach'atic ayic ta jowejele. 20Melel ya xcujch' awu'unic te mosoinele, soc teme ya slajinbeyex te bila ay awu'unique, soc teme ya slo'layexe, soc teme muc' ya yac' sbaic ta atojolique, soc teme ya smajbeyex achoique. 21Manchuc teme ya xq'uexawon ta yalel, ja'uc me to, ya me cal ta jamal te ma'yuc yip co'tantic te jo'otique. Jich ma ba ju' cu'untic te jich la jpastic ta atojolique. Ja'uc me to, teme jun yo'tanic te yantic te ya stoyes q'uinal yaiyic yu'un te bit'il ayic ta q'uinale, jichon uuc te jo'one jun me co'tan ya jtoyes q'uinal caiy yu'un uuc, manchuc teme jowil c'op nax te ya xc'opojone. 22¿Hebreoetic bal? Ja' nanix jich hebreoon uuc te jo'one. ¿Israeletic bal? Ja' nanix jichon uuc te jo'one. ¿Ja' bal sts'umbalic te Abrahame? Jo'on sts'umbalon uuc. 23¿Abatetic bal yu'un te Cristoe? C'axem to xan jich ayon te jo'one, (manchuc teme tabilon ta jowejel te ya xc'opojone.) C'ax jich at'ejemon jtuquel a te bit'il at'ejemique. C'axem to xan la quich' majel ta nujc'ul. Soc c'axem to xan la quich'ix chuquel. Soc bayal buelta te c'an lajucone. 24Jo'eb buelta la yac'bonic majel ta nujc'ul te jlumal judioetique, ja' te jun ma xts'ajc'aj cha'winic ta jyalel te majel ya yaq'uic te jujun bueltae. 25Oxeb buelta la quich' majel ta bara-te'. Jun buelta la quich' ch'ojel ta ton. Oxeb buelta woc' barco te banti beenone, jun c'aal soc jun ajc'ubal te xcajeton ta bay te mare. 26Bayal buelta beenonix. C'axix bayal jwocol yu'un te bila xi'bantic sbae, jich bit'il: muc' ja'etic, j'eleq'uetic yu'un te jlumale soc uuc te jyanlumetic, ta lumlumtic, ta jochol q'uinaletic, ta maretic, soc ta bay jlotil-quermanotactique. 27C'axix jwocol ta lubel ta at'el ta jc'ab. Ay ma wayon xujt'uc. Ay c'ax jwocol ta wi'nal soc ta taquinti'il. Bayal buelta la jcom jwe'el. Soc ay c'ax jwocol ta sic yu'un ma ba wejt' lec te jc'u'-jpaq'ue. 28Ma jipuc nax a in to. Jujun c'aal toyol yalal ya caiy te bit'il ay sc'oplal ta co'tan spisil te jch'uunjeletique. 29Teme ay mach'a ay ta chamele, jich ayon ta chamel ya caiy uuc. Teme ay jtuluc te ya xyaleswane, ya x'ilinon yu'un uuc. 30Teme ay bila toyol q'uinal ya caiy yu'une, ja' me toyol q'uinal caiy yu'un te bit'il ma'yuc quipe. 31Te Diose, te Stat te Cajwaltic Jesucristoe, te jelawen yutsilal sbajt'el q'uinale, ja' sna'oj te ma jlotuc te bila ya cale. 32Te c'alal ayon ta lum Damasco, te gobernador yu'un te lume, te ay ta swenta te muc' ajwalil Aretas, la yac' ta canantayel yu'un soldadoetic te yochibal sts'ajc'ul te lume, swenta yu'un ya me stsaconic bael ta chuquel. 33Ja'uc me to, te quermanotactique la sliconic coel ta muc'ul moch ta bay ventana ta spat sts'ajc'ul te lume. Jich colon loq'uel, soc ma ba ochon ta sc'abic te soldadoetique.


Copyright
Learn More

will be added

X\