2 Corintios 10

1Jo'on Pabloon ya calbeyex bayal wocol ta atojolic ta swenta yutsil yo'tan soc xc'uxul yo'tan te Cristoe. Ay ya awalic: “Mero peq'uel ya yac' sba te c'alal ay ta coliltique; yan te c'alal c'ubul aye, ya stoy sba ta c'op”, ay xaex cu'un. 2Jichuc. Ja'uc me to, te c'alal ya xtal quilexe, ya calbeyex wocol ma me xawac'bonic te ya xtoy jc'op ta stojolic te mach'atic ya yalic te swenta nax ch'ich'-baq'uet te bila ya jpase. Melel jich ay ta co'tan te ya jsituy ta c'op te mach'atic jich ya yalique. 3Melel nix a te ch'ich'-baq'uetotic naxe, ja'uc me to, ma jichuc ya caiytic guerra jich bit'il te mach'atic ayic ta balumilale. 4Yu'un te cat'ejibtic ta guerra ma swentauc ch'ich'-baq'uet. Te cat'ejibtic te jo'otique, ja' te yip yu'el te Diose te ya xju' ya jwuytic a te tulan ts'ajq'ue. 5Jich ya jlajinbeytic sc'oplal a te bila nopjibal yu'un te yantique, spisil jtoybaetic te ya scontroinic te bila ay ta na'el yu'un te Diose. Spisil nopjibal yu'un te ch'ich'-baq'uete, ya me cac'beytic xch'uunic te Cristoe. 6Ya me xtal cac'bey castigo ta ora te mach'atic xc'axintayej mandale. In te ja'exe, jc'axel me xach'uunic ta melel te Cristoe. 7Te ja'exe, ja' nax yacalex ta yilel te bila chican ya awilic ta asitique. Teme ay mach'a ya yal: “Ja' yu'unon te Cristoe”, teme xie, ac'a me sna' ta lec te bit'il c'oem ya yaiy ta yo'tane. Melel teme yu'un te Cristoe, ja' nanix jich te jo'otique, yu'unotic uuc te Cristoe. 8Manchuc teme ya jtoy jba ta c'op jtebuc yu'un te bit'il ay te cat'ele, ma yu'unuc te ay bila ya xju' ya xq'uexawon yu'un tey a. Melel ja' la yac'botic cat'eltic te Cajwaltique, swenta yu'un jich me ya cac'tic sta yip awo'tanic ta stojol te Diose. Ma ja'uc cat'eltic te ya jintiquexe. 9Ma jc'an te ya acuyic te ja' ay ta co'tan te ya xiwtesex a te cartaetic cu'une. 10Ay ya awalic te c'ux soc tulan te cartaetic cu'une. Yan te c'alal ayon ta atojolique: “Ma'yuc yip yo'tan”, xaex, soc ya alabanbonic te jc'ope. 11Ja'uc me to, te mach'a jich ya yale, ac'a me sna' stojol in to: Teme tulan ya yaiy te jc'op ya cal ta carta te c'alal c'ubul ayone, jich nix me tulan ya yaiy te bila ya xtal jpasbey yil ta awolilique. 12Ta melel, ma me pajalucotic soc te bit'il yac'oj sbaic cha'oxtul te yantique te stuquel lec sc'oplal ya yal sbaique. Mero ma'yuc sp'ijilic, melel stuquel nax sleojic te bila sp'isoj sbaic ae, soc stuquelic nax te ya spaj sbaic soc te yantique. 13Yan te jo'otique, ma xjelawotic ta c'axem to xan te banti ma jwentaticuque. Ja' Dios stuquel te la sp'isbotic ta bay c'alal ya x'at'ejotique soc ja' la sticunotic ta bay ayex ta lum Corinto. 14Jich yu'un ma ba jelawenotic tey a ta bay sti'il te banti c'alal p'isbilotique. Ma jna'tic bi me awilelic, te manchuc neel talucon ta atojolique. Melel ja' neel la calbeyex awaiyic te lec yach'il c'op yu'un te Cristoe. 15Ma jwentaticuc te toyol q'uinal ya caiytic yu'un te banti at'ejemic te yantique. Ma spas caltic te ja' cat'eltic te banti ma cat'elticuque. Ja' ya jmaliytic te ya x'esmaj xan te xch'uunjel awo'tanique. Jich me ya xju' te ya x'at'ejotic xan ta awolilic. Ja'uc me to, ma xjelawotic tey a te banti c'alal p'isbil te ya x'at'ejotique. 16Patil ya me xc'axotic xan bael ta yalel te lec yach'il c'op ta bay yantic lumetic te jelawen c'axel awu'unique. Ja'uc me to, ma me x'ochotic bael tey a ta banti ay yat'el te yantique, te ya xcaj toy q'uinal caiytic yu'un te yat'elique. 17Teme ay mach'a toyol q'uinal ya yaiye, ja'uc me toyol q'uinal ya yaiy yu'un te Cajwaltique. 18Melel ma ja'uc lec ya x'ilot yu'un Dios te mach'a stuquel ya yal te lec sc'oplale. Ja' lec stuquel te mach'a ja' ya x'albot lec sc'oplal yu'un te Cajwaltique.


Copyright
Learn More

will be added

X\