1 Timoteo 5

1Ya calbat te ma me uteluc ya acom te mamaletique. Lamaluc me xatac'uy jichuc atat. Soc te jch'iel queremetique jich me xac'opon te bit'il awijts'inabe. 2Soc te me'tiquetique, jich me xac'opon te bit'il ame'. Soc te jch'iel ach'ixetique, jich me xac'opon te bit'il awijts'inab. Ma me ayuc mulil ta awo'tan ta stojolic. 3Coltaya me te me'ba antsetic te jtul ma'yuc mach'a ay yu'une. 4Ja'uc me to, teme ay me'ba ants te ay yalatac, o teme ay smamataque, ja' me neel ay ta swentaic te alnich'anetic te bit'il ya sc'an ya yich' wentainel yu'unic ta stojol Dios, swenta yu'un tey sujt'esbil yu'unic ya xc'ot sjelol swocol te me'il-tatile. Melel ja' lec ta pasel, soc ja' bin nax yo'tan Dios yu'un. 5Yan te me'ba ants te ma'yuc mach'a ay yu'une soc te stuquel aye, ja' yipinej yo'tan te Diose. C'aal ajc'ubal ya yalbey wocol ta sc'oponel te Diose. 6Ja'uc me to, te me'ba ants te ja' nax baem ta yo'tan spisil te bila smulanej te sbaq'uetale, lajemix c'oem te bit'il cuxul to ta q'uinale. 7Ya me awalbey yaiyic spisil in to swenta yu'un ma ba ya sta smulic. 8Te mach'a ma xyac'bey te bila ya xtuun yu'un te mach'a ay yu'une, soc c'axem to xan te mach'a ay ta snae, tojol ya yal te ay xch'uunjel yo'tane. C'ax jich smul c'oem a te bit'il te mach'a ma xch'uunejuc te Diose. 9Ta bay te lista yu'un te me'ba antsetique, ja' nax me xanajc'anbey sbiil te mach'a c'axemix ta oxwinic ja'wil ya'wilale, soc te jun yo'tan ain soc te anima smamlale. 10Soc ya sc'an te lec sc'oplal yu'un te yat'el spasoje, jich bit'il teme jun yo'tan la xch'ijtes te yalataque, soc teme ya xnajc'anwane, soc teme ay la spocbeyix yacan te mach'atic ch'ul lum yu'un te Diose, soc teme ay la xc'uxtayix te mach'atic ay swocolique, soc teme c'aem ta spasel spisil te lequil at'elile. 11Ja'uc me to, ma me xanajc'anbey ta lista sbiil te mach'a me'ba ants te ma to me'eluque. Melel teme ja' ya xbajt' ta yo'tan te bila ya sc'an te sbaq'uetale, soc teme ya to smulan te ya xnujbine, ja' ya yijq'uitay ta yo'tan a te Cristoe. 12Jich la staix smul a te bit'il ma ba ju' ta pasel yu'un te bila yaloje. 13Soc ya xcaj snop ch'ajilal a te bit'il paxponel nax ya xbeen ta naetique. Jich ya xcaj snop le-c'op a, soc biluc nax ya yac' sba a. Ja' ya xbajt' ta yo'tan yaanel te bila ma'yuc ta swenta yalele. 14Jich yu'un, ya jc'an ya xnujbinic te me'ba antsetic te ma to me'eluque. Ja' lec te ayuc xan yalic, soc te ya swentain xan snaique. Yu'un tey ma xwejt' te bi ya yalic a te cajcontrotique. 15Melel ay me'ba antsetic te la yijq'uitayix ta yo'tanic te Cristoe. Ja' la yaq'uix sbaic ta swenta te Satanase. 16Te mach'a xch'uunej te Diose, chican teme winic o teme antse, teme ay sjoinejic te me'ba antse, ac'a me scoltayic, swenta yu'un ma me ja'uc ya xc'ot ta swenta scoltayel te jch'uunjeletique. Jich me ya xju' ta coltayel yu'un te jch'uunjeletic te me'ba antsetic te ma'yuc mach'a ay yu'unic ta melele. 17Te ancianoetic te lec ya x'at'ejic ta stojol te Diose, ac'a me yich' ich'el ta muc' ta c'axem to xan. Ja' bayal sc'oplalic te mach'atic yat'elinejic xcholel te sc'op Diose soc ta p'ijubteswanej. 18Melel jich ya yal te Sjun Diose: “Ma me xawac'bey sbolsail sni' te wacax te ya stec' ta wuyel te trigoe”, te xie. Soc xan: “Te mach'a ya x'at'eje, ya me yich' stojol sc'ab yu'un te yat'ele”, te xie. 19Soc ma me xach'uun ta ora teme ya xlebot smul te jtul ancianoe, teme ma'yuc cha'oxtuluc testigo yu'une. 20Te mach'atic ma sc'an scom sbaic ta sleel te smulique, ya me acom ta comonsitil, swenta yu'un jich me ya xi'ic uuc te yantique. 21Ya calbat mandal ta stojol te Diose soc ta stojol te Cajwaltic Jesucristoe soc ta stojol te ch'ul abatetic tsabilic yu'une, te jich me xapas spisil ora. Ma me tsabiluc nax awu'un te mach'a ya achajbane. 22Soc xan, ma me mach'auc nax ya acajanbey ac'ab ta sjol ta ora nax. Soc ma me xacoltay ta c'op yu'un smul te yane. Tsajtaya me aba yu'un jiche. Ma me xawac' staat te bila amene. 23Soc ya calbat, te bit'il bayal buelta ya stsajc'at ta chamel yu'un te ach'ujt'e, ma me ja'uc nax xawuch'ilay te tojol ja'e. Uch'a jtebuc uuc te vinoe. 24Soc ya calbat xan, ay mach'atic ya xchicnaj smulic ta comonsitil te c'alal ma to ayuc ta chajbanel a. Soc ay yantic te ma chicanuc ta comonsitil ta ora te smulique. Patil to ya xchicnaj. 25Ja' nanix jich uuc ay ya xchicnaj ta comonsitil ta ora te bila lec ya spasique. Soc manchuc teme ma xchicnaj ta orae, ma xju' ta naq'uel.


Copyright
Learn More

will be added

X\