1 Timoteo 4

1Ja'uc me to, jamal yalojix te Espíritu te ay mach'atic jc'axel ya xch'ay xch'uunjel yo'tanic te c'alal nopolix a te slajibal c'aale. Ya me xjajch' xch'uunic te lo'layel yu'un te pucujetic, soc te nopjibal yu'unique. 2Soc ya me xjajch' yantaybeyic sc'op te mach'atic cheb yo'tanique, te puro lotil c'op ya yalique, te jc'axel pimuben yo'tanic. Ma'yuc bila ya xc'otix ta yo'tanic xujt'uc. 3Ya scomotic ta nujbinel, soc ay we'elil ya scomotic ta stuuntesel. Ja'uc me to, Dios la spas spisil te we'elile, swenta yu'un ya me yich' albeyel wocol Dios te c'alal ya stuuntesic te we'elil te jch'uunjeletic te xch'uunejic te smelelil c'ope. 4Melel spisil bila spasoj te Diose lec stuquel. Jich ma sc'an teme ay bi ya jp'ajtique, melel ma'yuc bila ma lecuc ta tuuntesel. Ja' nax ya sc'an te ya calbeytic wocol Dios yu'un te ya jtuuntestique. 5Melel ta swenta te sc'op Diose soc te sc'oponel te Diose, ya me yich' ch'ultesel. 6Teme jich ya awac'bey snop te quermanotactique, lequil abatat ya xc'oat yu'un te Jesucristoe, soc ya me yipin awo'tan te sc'op Dios te ach'uuneje soc te lequil nopjibal awantayeje. 7Ma me xawac' achiquin ta yaiyel stojol jontol aiyejetic te ma'yuc swentail xujt'uque. C'ajtesa me aba ta xch'uunel te Diose. 8Melel ma'yuc lec swentail teme ay bila ya c'ajtes jbaq'uetaltic ta spasele. Yan teme ya c'ajtes jbatic ta xch'uunel te Diose, ja' ay bayal sc'oplal stuquel, te melel ya me xcuxinotic yu'un li'to ta balumilal soc ta sbajt'el q'uinal. 9Mero melel in to, soc ya sc'an ya yich' ch'uunel cu'untic spisil. 10Ja' swentail te cac'ojtic puersa ta at'el soc jts'icojtic ixtac'optayel. Yu'un ya jmaliytic te jcoleltic yu'un te cuxul Diose, te ja' Jcoltaywanej yu'un spisil te ants-winiquetique. Ja'uc me to, ja' mero Jcoltaywanej yu'un te jayeb mach'atic ya xch'uunique. 11Spisil in to ja' me xawac' ta ch'uunel soc ja' me xawac' ta nopel. 12Ma me ayuc mach'a ya sp'ajat yu'un te bit'il jch'iel winicat toe. Ac'beya me yilic te bila lec ta pasel te mach'atic xch'uunejic te Diose. Ja' bi, lecuc me te ac'ope soc te awat'ele, soc ayuc me xc'uxul awo'tan soc yutsil awo'tan soc xch'uunjel awo'tan, soc ma me ayuc mulil ta awo'tan. 13Te jich xan yipal c'aal te ma xtalone, at'elina me yilel yaiyic te Sjun Dios ta stojol te lume. Aiya me tac'uwanej soc p'ijubteswanej ta stojolic. 14Bayaluc me sc'oplal ta awo'tan te amajt'an te ac'bilate soc te ac'botat ta awenta te c'alal c'opojic ta atojol te j'alwanejetic yu'un te Diose, soc te la scajanbat sc'abic ta ajol te ancianoetique. 15Nopilaya me ta awo'tan spisil in to te la calbatixe; jc'axel me x'awac' awo'tan tey a, swenta yu'un jich me ya yilic spisilic te bit'il lec yac ta ju'el awu'un te awat'ele. 16Tsajtaya me awo'tan, soc tsajtaya me te bila ya awac' ta nopele. O'tanina me spasel spisil ora. Teme jich ya apase, ya me acoltay aba a te ja'ate, soc ya me acoltay uuc te mach'atic ya yaiybat stojol te ac'ope.


Copyright
Learn More

will be added

X\