1 Timoteo 2

1Ya me jtac'uyex ta apisilic: C'oponaic me te Diose, c'anbeyaic te bila ya ac'anique, bic'tal-c'opojanic ta stojol te Diose. Albeyaic wocol Dios yu'un ta spisil te ants-winiquetique, 2soc uuc te muc' ajwaliletique, soc mach'auc a te yich'oj yat'elic yu'un te lume. Jich me senel q'uinal ya caiytic, soc jich me jun co'tantic ayotic ta q'uinal. Jich me ya xju' cu'untic xch'uunel te Diose, soc jich me toj ya x'ainotic ta q'uinal. 3Melel ja' lec te jich ya jc'opontic te Diose, soc ja' lec yo'tan Dios yu'un te ja' Coltaywanej cu'untique. 4Melel yo'tanuc yacuc xcol spisil te ants-winiquetique, soc yo'tanuc yacuc xc'ot ta yo'tanic te smelelil c'ope. 5Jun nax Dios ay, soc jtul nax te mach'a teq'uel ta c'op ta stojol Dios yu'un te ants-winiquetique, ja' bi, ja' te winic Jesucristoe. 6Ja' te mach'a la yac' sba ta lajel ta smanel scolel spisil te ants-winiquetique. Jich la yich' alel ta testigo-c'op, te c'alal la sta yorail yu'un te Diose. 7Jich yu'un ac'boton quich' cat'el ta xcholel te bit'il ay te jcoleltique. Jich ayon ta p'ijubteswanej ta stojol te jyanlumetique. Ja' ya cac'bey snopic te bit'il ay te xch'uunjel-o'tanil soc te smelelil c'ope. Melel xcal ta stojol Cristo, ma jlotuc. 8Jich yu'un ya jc'an te ya sc'oponic Dios ta bayuc te winiquetique. Te c'alal ya stoyes sc'abic ta sc'oponel te Diose, ya sc'an ch'ultesbiluc, soc ma me ilinemuc yo'tanic, soc ma me ayuc guerra ta yo'tanic. 9Ja' nanix jich uuc te antsetique, ya jc'an te yich'ojuc swentail te sc'u'-spac' ya slapique. Nujuluc me yo'tanic te ya xch'al sbaique, ma me swentauc toybail. Ma me c'axemuc to xan te ya xch'alic te sjolique, jich te bit'il ya xch'al sbaic ta oro soc perlaetic, soc te ya sman slapic sc'u'-spaq'uic te c'ax toyem stojole. 10Ja'uc me xch'alil ya xc'ot te lec yat'elique. Yu'un jich nix ya sc'an pasel yu'un spisil antsetic te jun yo'tan xch'uunejic te Diose. 11Te antsetique ac'a slaman sbaic ta yaiyel stojol te p'ijubtesele, soc ac'a xch'uunic mandal. 12Melel ma xcac' te ya yaiy p'ijubteswanej ants ta stojol te winiquetique, soc ma xcac' te ya xmandalajic ta stojolique. Ya sc'an ya slaman sbaic. 13Melel ja' neel la yich' pasel yu'un Dios te Adane, patil la yich' pasel te Evae. 14Soc ma ja'uc te Adane te laj ta lo'layele, ja' stuquel te antse. Yu'un te bit'il la xch'uun lo'layele, tey la sta smul ta stojol Dios a. 15Ja'uc me to, ya me xcolic te antsetic teme lequil me'il ya yac' sbaique, teme jc'axel ay xch'uunjel yo'tanic, soc teme ay xc'uxul yo'tanic, soc teme ch'ultesbil yo'tanique, soc teme lamal te yo'tanique.


Copyright
Learn More

will be added

X\