1 Timoteo 1

1Jo'on Pabloon te ayon ta jpuc-c'op yu'un te Jesucristoe ta swenta smandal te Diose, te ja' Coltaywanej cu'untique, soc uuc te Cajwaltic Jesucristo, te ja' smuc'ul co'tantic stuquele. 2Ya jpatbat awo'tan, Timoteo, ja'at te mero jnich'anat ta swenta xch'uunjel co'tantic. Ac'a me yac'bat bayal yutsil yo'tan te Jtatic Diose soc te Cajwaltic Cristo Jesuse. Ac'a me xc'uxtayat, soc lamaluc me q'uinal ya awaiy yu'un spisil ora. 3C'alal boon ta sq'uinal Macedonia, la calbat jilel te ja' lec te tey ya xjilat ta lum Éfeso, yu'un ya me acom te mach'atic te ya yaq'uic ta nopel te lotil p'ijubtesele. 4Soc te manchuc ja'uc ya xbajt' ta yo'tanic te bila jontol c'op aiyejetic naxe, soc te bila sc'oplal nax te namey q'uinal me'il-tatiletic te ma xlaj ta alele. Ja' in to, ja' nax ya xjach tsaltomba c'op, ma ja'uc ya yac'botic xch'uunjel co'tantic ta spasel te bila chapal yu'un te Diose. 5Te bi swentailuc in mandal to, ja' te xc'uxul-o'tanil te ayinem ta bay lequil-o'tanil, soc te lequil nopjibale, soc te xch'uunjel-o'tanil ta melel. 6Ja'uc me to, ay mach'atic jowejemiquix, ja' bajt'ix ta yo'tanic te c'op aiyejetic te ma'yuc swentaile. 7Yo'tan yac' sbaic ta maestro yu'un te mandalile. Ja'uc me to, ma sna'ic te bila yacalic ta yalele, soc ma ba c'oem ta yo'tanic te bila tulan sc'oplal te ya yaq'uic ta nopele. 8Jna'ojtic stojol te bit'il lec te mandalil teme c'oem ta co'tantic te bila ya xtuun a. 9Te mandalile ma ja'uc ay ta swentaic te mach'atic tojique. Ja' ay ta swentaic te jch'ay-mandaletique, soc te jc'axintayej-mandaletique, soc te mach'atic ma xyich'ic ta muc' te Diose, soc te puro mulil baem ta yo'tanique, soc te mach'atic ixta yo'tanic te xujt' ma xyich'ic ta muc' te bitic ay ta ch'uunele, soc te mach'atic ya smil sme'-static soc yantic ants-winiquetic, 10soc mach'atic ya xyalic ta mulile, soc te mach'atic sjoy sbaic nax ta winiquil te ya yuts'inbey sba sbaq'uetalique, soc te mach'atic ya sleic ants-winiquetic te ya yelc'anic baele, soc te jpas-lotetique, soc te mach'atic ya yac' sbaic ta yalel lotil testigo-c'op, soc xan te mach'atic ya scontroinic te lequil p'ijubtesele. 11Te lequil p'ijubtesele, ja' nix te lec yach'il c'op te bayal yutsilale, te la yac'bonix ta jwenta xcholel te ch'ul Diose. 12Ya calbey wocol te Mach'a la yac'bon yip co'tane, ja' bi ja' te Cajwaltic Jesucristo. Yu'un te bit'il la yil te jun nax co'tane, jich la yac'bon quich' cat'el, 13manchuc teme sna'oj te la jtoybac'optay ta neelal, soc la cuts'in, soc te la quixtac'optaye. Ja'uc me to, la xc'uxtayon te Diose ta scaj te ma la jna' te bila la jpase soc te ma to jch'uunejuc a te Jesuse. 14Jich esmaj ta c'axem to xan ta jtojol te yutsil yo'tan te Cajwaltique, soc la yac'bon xch'uunjel co'tan soc xc'uxul co'tan ta swenta te Cristo Jesuse. 15Mero melel in to te ya sc'an ya yich' ch'uunel te ja' xtaluc ta balumilal yu'un scoltayel jmulawiletic te Cristo Jesuse. Jich bit'il te jo'one, ja' c'ax bayal te jmule. 16Ja'uc me to, la xc'uxtayon te Diose, swenta yu'un jich me ya yac' ta ilel ta jwenta te bit'il bayal perdón ay ta yo'tan te Jesucristoe. Ja' ejemplo ya yilic a te mach'atic patil ya xch'uunic te Jesucristoe, swenta yu'un jich me ya staic xcuxlejalic sbajt'el q'uinal yu'un. 17Jich yu'un, ac'a ich'otuc ta muc' te muc' Ajwalil sbajt'el q'uinal, te stalel cuxul stuquel, te ma chicanuc ta ilel, te ja' nax Dios stuquel, soc te ay yutsilal ta sbajt'el q'uinal stuquel. Jichuc. 18Jich yu'un te ja'at, Timoteo, te jnich'anate, ya calbat in mandal to, ta swenta bit'il jich albil ac'oplal ta swenta alwanej-c'op. Jich yu'un lequil soldado me xawac' aba ta yaiyel tsalaw. 19Ma me xawac' ch'ayuc te xch'uunjel awo'tane. Junuc me awo'tan x'ainat ta stojol Dios, yu'un ay mach'atic ch'ayix xch'uunjel yo'tanic ta stojol Dios. 20Jich c'otix ta swenta te Himeneo soc te Alejandro. La caq'uix ta sc'ab Satanás ta xchebalic, swenta yu'un jich me ya xp'ijubic a. Jich ma ba ya stoybac'optayic xan yan buelta te Diose.


Copyright
Learn More

will be added

X\