1 Tesalonicenses 5

1Lec ay quermanotac, ma yejt'aluc ya jts'ibubeyex xan ta carta te bi ora soc te bi yilel q'uinal te jich ya xc'ot ta pasele, 2melel ana'ojic stojol ta lec te bit'il ya xc'ot sc'aalelal te Cajwaltique. Jich ay te bit'il ya xtal j'elec' ta ajc'ubale. 3Yu'un te c'alal ay jich ya yalic te ants-winiquetique: “Lamal q'uinal, ma'yuc bi chican”, te xiic ta yalele, ja'uc me to, ajc' nax ora ya xtal lajel ta stojolic, jich te bit'il ajc' nax ora ya xjajch' swocol jtul ants yu'un te ya x'ayinix te yale. Jich ma xju' ya scoltay sbaic loq'uel tey a. 4Yan te ja'ex quermanotac, ma'yuquex ta ijc' q'uinal te yu'un ch'ayem atsaic a te ya sta sc'aalelal te Cajwaltique, jich bit'il c'alal ya xtal te j'eleq'ue. 5Melel te ja'exe ayex ta swenta te saquil q'uinale soc te c'aleltique. Jpisiltic ma'yucotic ta swenta ajc'ubal soc ijc' q'uinal. 6Jich yu'un ma me xwayotic jich bit'il wayalic te yantique. Ya sc'an te wiq'uil jsitic soc te cuxul co'tantique. 7Yu'un te mach'a ya xwaye, ajc'ubal ya xway, soc te mach'a ya xyacube, ajc'ubal ya xyacub. 8Yan te jo'otic te ayotic ta swenta te c'aleltique, ya sc'an te cuxul co'tantique. Soc ya me jc'u'intic te smajq'uil co'tantic, ja' te xch'uunjel co'tantic, soc te xc'uxul co'tantique. Soc ya me jlaptic te smajq'uil joltic, ja' te jun co'tantic ya jmaliytic te jcoleltique. 9Melel ma ja'uc la stsaotic Dios yu'un te ya yac'otic bael ta castigoe. Ja' la stsaotic yu'un te ya yac'botic jcoleltic sbajt'el q'uinal ta swenta te Cajwaltic Jesucristoe. 10Melel ja' nix te la yac' sba ta lajel cu'untique, swenta yu'un pajal me ya xcuxinotic soc, chican teme cuxulotic ta q'uinale, o teme ya xway te jbaq'uetaltique. 11Jich yu'un, talel c'axel jech muc'tesbeya aba q'uinal awaiyic a, soc jech ac'beya aba yip awo'tanic a, jich te bit'il yacalex ta spasele. 12Quermanotac, ya calbeyex wocol, ich'aic ta muc' te mach'atic yacalic ta at'el ta awolilic te ya swolexe soc te ya stac'uyex ta swenta te Cajwaltique. 13Bayaluc me sc'oplal ta awo'tanic, soc c'ux me x'awaiy ta awo'tanic ta scaj te yat'elic te yacalic ta spasele. Lamaluc me q'uinal awu'unic. 14Soc ya calbeyex xan wocol, quermanotac, tac'uyaic me te mach'atic ch'ajetique, tulantesbeyaic yo'tanic te mach'atic ma'yuc yip yo'tanique, coltayaic me te mach'atic peq'uel yo'tanique, soc ma me jtebuc nax stael awo'tanic ta stojol spisilic. 15Tsajtaya me abaic, ma me ayuc jtuluquex te ya awich'beyic spacol teme ay mach'a amen te bila ya spasbate. Ja' me xapasbey abaic spisil ora te bila leque, soc jich me xapasbey ta spisilic uuc te yantique. 16Ayuc me sbujts' awo'tanic spisil ora. 17C'oponaic Dios spisil ora. 18Albeyaic wocol Dios yu'un te bila ya xc'ot ta awentaique, melel ja' sc'anjel yo'tan Dios ta atojolic ta swenta te Cristo Jesuse. 19Ma me xatup'beyic sc'ajc' te Espiritue. 20Ma me xap'ajbeyic sc'op te j'alwanejetique. 21Tsajtayaic me spisil te sc'opique, soc ac'a me ta awo'tanic ta bay leque. 22Ijq'uitayaic me jilel spisil te bila amene. 23Dios, te lamal q'uinal ta swentae, ts'acal ac'a me yutstesex. Soc ya me swentainbeyex spisil te acuxlejale: te awo'tane, te ach'ulele soc te abaq'uetale, swenta yu'un ma me ayuc bila quechel ta awentaic a te c'alal ya xchicnaj tel te Cajwaltic Jesucristoe. 24Jun yo'tan ta atojolic te mach'a yic'ojexe. Jich me ya xc'ot ta pasel yu'un spisil te bila la calixe. 25Quermanotac, c'oponbotic me Dios spisil ora ta jtojoltic. 26Patbeya aba awo'tanic soc te quermanotactic ta swenta te ch'ul bujts'iyele. 27Ya calbeyex mandal ta swenta te Cajwaltique, ya me awawtaybey yaiyic in carta to ta spisilic te quermanotactique. 28Ja' ac'a yac'beyex bayal bendición te Cajwaltic Jesucristoe. Jichuc.


Copyright
Learn More

will be added

X\