1 Tesalonicenses 4

1Jich yu'un quermanotac, ya calbeyex wocol soc ya jtac'uyex ta swenta te Cajwaltic Jesuse. Jich bit'il la cac'beyex anopic te toj ya awac' abaic ta q'uinale, swenta yu'un jich me lec yo'tan awu'unic te Diose, jich c'axem to xan toj me xawac' abaic spisil ora. 2Yu'un ana'ojic stojol te p'ijubtesel la calbeyex awaiyic ta swenta te Cajwaltic Jesuse. 3Melel ja' sc'anjel yo'tan Dios te utstesbil ya xc'ot te awo'tanique. Yu'un ma me ayuc mach'a ya xyal ta mulil. 4Ta juju-jtulex, ya sc'an te jun nax awo'tan ya awic' abaic soc te awinamique, soc ya me awich' ta muc', soc ya me ana' te ch'ul lumex yu'un te Diose. 5Ma me scajuc nax xchijilil abaq'uetalic te ya awic' awinaminic te antse, jich bit'il ya spasic te ants-winiquetic te ma sna'beyic sba te Diose. 6Ma me ayuc mach'a ya yac'bey swocol yantic soc ma me ayuc ya slo'lay yermano, melel ya me x'ac'bot tulan castigo yu'un te Cajwaltic teme jich ya spasique, jich bit'il tulan sc'oplal la calbeyex awaiyic ta neelal to. 7Melel ma ja'uc la yic'otic Dios yu'un te ja' ya cat'elintic spasel te mulile. Ja' la yic'otic Dios yu'un te jc'axel ya yutstesotic ta stojol. 8Jich yu'un te mach'a ma'yuc sc'oplal ya xc'ot ta yo'tan in mandal to, ma ja'uc smandal ants-winic te la xch'aybeyixe, ja' la xch'aybey smandal te Diose te yac'ojbotic te Ch'ul Espiritue. 9Ja'uc me to, ma yejt'aluc te ya calbeyex xan ta jun te bit'il ya sc'an te c'ux ya caiy jbajtic ta co'tantic soc te quermanotactique, te melel p'ijubtesbilex yu'un Dios te bit'il ya sc'an te c'ux ya awaiy abaique. 10Jich nix c'ux ya awaiy ta awo'tanic spisil te quermanotactic te ayic ta spamal sq'uinal Macedonia. Ja'uc me to, quermanotac, ya calbeyex wocol, c'axem to xan ac'a esmajuc te c'ux ya awaiy abaique. 11Soc o'taninaic te lamal ya x'ainexe. Soc ac'a bajt'uc ta awo'tanic spasel te bila ay ta awentaic spasele. At'ejanic soc ac'abic, jich bit'il la calbeyex ta mandale, 12swenta yu'un lec me ac'oplalic ya xc'ot yu'un te mach'atic ma ba xch'uunejic te Diose, soc swenta yu'un ay me bila ya xtuun awu'unic spisil ora. 13Quermanotac, ya jc'antic te ya ana'ic stojol ta lec te bit'il ay sc'oplal yu'un Dios te mach'atic wayemix sbaq'uetalic, swenta yu'un ma me jichuc ya amel awo'tanic te bit'il ya smel yo'tanic te mach'atic ma'yuc bila smuc'ulinej yo'tanique. 14Melel teme jch'uunejtic te laj Jesús soc te cha'cux tele, jich jch'uunejtic te bit'il Dios ya yic' tel soc Jesús spisil te mach'atic xch'uunejic Jesús te way sbaq'uetalique. 15Jich yu'un ya me caltic awaiyic te bit'il ay sc'op te Cajwaltique: Te jo'otic teme cuxulotic to a te ya xchicnaj tel te Cajwaltique, ma ba ya xneelajotic bael yu'un te mach'atic wayemique. 16Melel ya me xchicnaj tulan aw ta mandal, soc te sc'op te jwolwanej ch'ul abate, soc te sc'op oq'ues yu'un Dios, te c'alal ya xcoj tel ta ch'ulchan te Cajwaltique. Jich te mach'atic xch'uunejic Cristo te lajique, neel ya xcha'cuxic tel. 17Ta patil te jo'otic te cuxulotic to jilele, maj nax ya x'ic'ototic moel soc ta tocal. Jich ya xc'o jta jbatic soc ta sjamalul ch'ulchan te Cajwaltique. Jich ya xc'o join jbatic soc sbajt'el q'uinal te Cajwaltique. 18Jich yu'un, jech muc'tesbeya aba q'uinal awaiyic ta apisilic a ta swenta in c'op to.


Copyright
Learn More

will be added

X\