1 Tesalonicenses 2

1Quermanotac, ana'ojic stojol te bit'il ma tojoluc nax te xtaluc quilexe. 2Jich bit'il awaiyojic stojol te ach' to nax c'ax jwocol ta jowil uts'inel ta bay lum Filipos, ja'uc me to, te Diose la yac'bon yip co'tan ta xcholel ta atojolic te lec yach'il c'op ta bay yolilal te controinele. 3Te tac'uyel la calbeyex awaiyique, ma yu'unuc ma jna' te bila la calbeyexe, soc ma yu'unuc ay bila amen jnopoj ta co'tan, soc ma yu'unuc swenta slo'layel a te yantique. 4Melel Dios la yac'bon ta jwenta yalel te lec yach'il c'ope, jich nix te bit'il yacon ta yalel ta bayuque. Melel ma ba yacon ta sleel te lecuc yo'tan cu'un te ants-winiquetique, ja' ya jle te lecuc yo'tan cu'un te Diose, te stuquel ya yaiybotic te co'tantique. 5Melel ana'ojic stojol te ma la jmonex ta lo'layel ta t'ujbil c'op. Soc ma la jle te bila ya xju' ya jlo'laybeyex ataq'uinic ae. Ja' testigo cu'un te Diose. 6Soc ma la jle ich'el ta muc' awu'unic, ni ja'uc ta stojol te yantique, manchuc teme quich'oj cat'el ta jpuc-c'op yu'un te Cristoe. 7Ja'uc me to, jich la cac' ta ilel yutsil co'tan ta atojolic te bit'il jtul ants te bayal yutsil yo'tan ta xch'ijtesel te yalataque. 8Te bit'il bayal c'ux la caiyex ta co'tane, bin nax co'tan ta xcholel ta atojolic te lec yach'il c'op yu'un te Diose. Soc bin nax co'tan yu'un te la cac' jcuxlejal ta awentaique, yu'un c'axem to xan c'uxbajex ta co'tan la caiy. 9Quermanotac, na'aic me te bit'il lubon ta sleel te bila tuun cu'une. At'ejon ta c'aal ajc'ubal, yu'un ma la jc'an te la cac'beyex awocolic te c'alal yacon ta xcholel ta atojolic te lec yach'il c'op yu'un te Diose. 10Te ja'exe testigoex cu'un soc ja' testigo uuc te Diose, te bit'il ch'ultesbil co'tan soc toj nax ainon ta atojolic ja'ex te ch'uunjelexe. Ma'yuc bay la jta jmul ta atojolic. 11Soc ana'ojic stojol te lec nax la jtac'uyex soc la jmuc'tesbeyex awo'tanic juju-jtulex, jich bit'il ya stac'uy snich'nab te jtul winique. 12La calbeyex te toj nax ya awac' abaic ta q'uinal jich te bit'il ya sc'an te Diose te la yiq'uex ochel ta ba ay ta ajwalinel te Dios soc te yutsilale. 13Jich yu'un, spisil ora ya calbey wocol Dios ta awentaic yu'un te bit'il la awich'ic ta muc' te c'op te la calbeyex awaiyique. La ach'uunic te ja' sc'op te Diose, ma la acuyic ta sc'op nax ants-winiquetic. Melel nix a te ja' sc'op Dios te la cale, te yaquix ta at'el ta awo'tanic ja'ex te ach'uunejique. 14Quermanotac, jich nix bit'il c'ax swocolic ta swenta Cristo Jesús te jch'uunjeletic ta Judea yu'un te slumalique, ja' nix jich uuc te ja'exe, c'ax awocolic yu'un uuc te alumalique. 15Ja' nix te judioetic te la smilic te Cajwaltic Jesuse, jich te bit'il la smilic te j'alwanejetic yu'un te Diose, soc la snutsotiquix loq'uel uuc te jo'otique. Ma lecuc yo'tan Dios yu'unic, soc scontroinejic spisil te ants-winiquetique. 16Melel te judioetique ya scomotic te ya jcholbeytic yaiy te jyanlumetique, swenta yu'un ya me xcolic uuc. Jich yanyan ta esmajel smulic te judioetique, ja'uc me to, ayix ta swentaic te tulan castigo yu'un te Diose. 17Quermanotac, te c'alal c'ax che'oxeb c'aal te loc'onix tel ta awolilic, manchuc me ma ba ya quilbeyex asitic, spisil ora ayex ta co'tan, soc bayal sc'oplal ta co'tan te ayuc bit'il ya xtal quilbeyex xan asitique. 18C'an taluconix, jo'on te Pabloone, bayal buelta te c'an talucone, ja'uc me to, te Satanase la scomon. 19Melel, ¿bila a te ya jmaliye? soc ¿bila a te xbujts' co'tane? soc ¿bila a te corona te toyol q'uinal ya caiy yu'une? ¿Ma bal ja'uc te ja'exe te ayex ta stojol te Cajwaltic Jesucristoe? Jich me bin nax co'tan awu'unic te c'alal ya xchicnaj tele. 20Melel ja'ex te bin nax yutsil co'tan awu'unique soc te bayal sbujts' co'tan awu'unique.


Copyright
Learn More

will be added

X\