1 San Pedro 1

1Jo'on Pedroon te ayon ta jpuc-c'op yu'un te Jesucristoe. Ya jpatbeyex awo'tanic ja'ex te q'uejel pujq'uemex ta bay chajbalchajp lum te ma'yuquex ta alumalique, ja' bi te ayex ta sq'uinal Ponto, ta sq'uinal Galacia, ta sq'uinal Capadocia, ta sq'uinal Asia, soc ta sq'uinal Bitinia. 2Tsabilex yu'un te Jtatic Diose, yu'un xjajch'ibal to jich xchapoj ta yo'tan, soc te ya xch'ultesbeyex awo'tanic ta swenta te Espiritue. Swenta yu'un jich me ya ach'uunic soc jich me ya awich'ic tsijts'anel ta xch'ich'el te Jesucristoe. C'axem to xan ac'a yac'beyex yutsil yo'tan soc lamaluc me q'uinal ya awaiyic yu'un. 3Jelawen yutsil te Diose, te Stat te Cajwaltic Jesucristoe. Yu'un ta scaj nax te bayal xc'uxul yo'tan ta jtojoltic te la yac' cha'ayinucotic xan ta swenta bit'il cha'cux tel ta bay animaetic te Jesucristoe. Jich cuxul spisil ora te smuc'ul co'tantique. 4Jich me ya yac'beyex awu'uninic te bila q'uejbil ta ch'ulchan yu'un te Diose. Ma sna' xjin, soc ma sna' sts'ilaj, soc ma sna' xlaj yutsilal te bila ya yac'beyexe. 5Ya me scanantayex ta yu'el te Diose ta swenta xch'uunjel awo'tanic, swenta yu'un jich me ya ataic te bila chajbanbil te ya yac'beyex awich'ic ta slajibal c'aale. 6Ja' swentail te ayuc bayal sbujts' awo'tanic, manchuc teme ayex ta woclajel jun chebuc c'aal yu'un te bayal ta jchajp yiljibal awo'tanic te ya xtal ta atojolique. 7Melel te bit'il ay xch'uunjel awo'tanique, ay yiljibal awo'tanic yu'un. Jich c'oem te bit'il oro te bayal yutsilal te ya yich' ultesel ta c'ajc' yu'un ya yich' ilel teme ma'yuc scape. Te xch'uunjel-o'tanil te ya spasot ta pruebae, c'ax jich ay sc'oplal stuquel te bit'il ay sc'oplal te oro te puersa ya xlaje. Teme chican te ay xch'uunjel awo'tanique te pasbil ta pruebae, lec me sc'oplal ya xc'ot, soc ay me yutsil, soc bayal me sc'oplal ya xc'ot te c'alal ya xchicnaj tel te Jesucristoe. 8Te ja'exe c'ux ta awo'tanic te Jesucristoe, manchuc teme ma ba awilojbeyic sit. Soc manchuc teme ma ba ya awilic ta asitic ta ora to, ja'uc me to, jun nax awo'tan ach'uunejic. Jich jelawen nax yutsil sbujts' awo'tanic ya awaiyic yu'un ta c'axem to xan te ma xju' ta alel sc'oplale. 9Jich me ya ataic te bila ay xch'uunjel awo'tanic yu'une, ja' bi ja' te scolel ach'ulelique. 10Te namey q'uinal j'alwanejetic la yalbeyic sc'oplal te yutsil yo'tan Dios ta atojolique. La snopilayic soc la sjojc'oy yaiyic ta lec te bit'il ay sc'oplal te jcoleltique. Jich la yalbeyic sc'oplal te bila ya yac'botic ta jpisiltic te Dios ta swenta te yutsil yo'tane. 11La snopilayic mach'a a, soc te bi ora ya xc'ot ta pasel te bila la yal te Espíritu yu'un te Cristo te sjoinejique. La yalbey sc'oplal te bila woclajel ya yaiy te Cristoe, soc te bila utsilal ya sta ta patile. 12Ja'uc me to, Dios ac'bot sna'ic stojol yu'un te bit'il ma ja'uc ya xc'ot ta swentaique, yu'un ja' me ya xc'ot ta jwentatic jo'otic. La spucbeyic sc'oplal te bila la jcholbeyex awaiyic sc'oplal ta ora to, ja' te lec yach'il c'op ta swenta yu'el te Ch'ul Espíritu te ticunbil tel ta ch'ulchane. Spisil in to toyol yo'tanic yu'un uuc te ch'ul abatetic te yacuc x'ac'bot yilique. 13Jich yu'un, chajbana me abaic soc ayuc me sp'ijil awo'tanic. Junuc me awo'tanic ya amaliyic spisil ora te bila ya yac'beyex Dios ta swenta yutsil yo'tan te c'alal ya xchicnaj tel te Cristo Jesuse. 14Lequil alnich'anuquex me ta xch'uunel te smandale. Ma me ja'uc xach'uunic xan spasel te bila mulanbil sba ta pasel awu'unic ta neelal to te c'alal ma to ana'ojbeyic sba a te Diose. 15Melel ch'ul Dios stuquel te la yiq'uexe, jich yu'un, ch'ultesbiluquex me te jayeb c'aal cuxulex ta q'uinale. 16Yu'un jich ts'ibubil ta Sjun Dios: “Ch'ultesbiluquex me, jich bit'il ch'ul Dioson jtuquel”, te xie. 17Teme ya awalic: “Jtat”, xaex ta stojol te Diose, te ja' ay ta swenta yalel te bi yilel cat'eltique soc te ma'yuc mach'a stsaoj nax ta yo'tane, jich yu'un ya sc'an te ya awaq'uic ta ilel te awich'ojic ta muc' te jayeb c'aal cuxulex ta balumilale. 18Yu'un Dios la scoltayex loq'uel tey a ta bay te bila la yac'beyex anopic spasel te me'il-tatiletic awu'unique. Soc ana'ojic stojol ta lec te ma ja'uc tojbil jcoleltic a te bila ya xlaje, jich bit'il te oroe soc te platae. 19Ja' tojbil acolelic a te xch'ul xch'ich'el te Cristoe te milbil smajt'an Dios c'ot, jich bit'il alal chij te ma'yuc bila boloben soc ts'ilajem ta sbaq'uetale. 20Chapalix yu'un Dios a te c'alal ma to pasbiluc a te ch'ulchan balumilale. Ja'uc me to, slajibal to ora chicnaj tel, swenta yu'un jich me ya awich'ic coltayel yu'un ta apisilic. 21Ja' ta swenta Cristo te ach'uunejiquix te Diose, te la yich' cha'cuxesel ta bay animaetic, soc te ac'ot ta ich'el ta muq'ue. Ja' swentail te awac'oj xch'uunjel awo'tanic soc smuc'ul awo'tanic ta stojol te Diose. 22Jich yu'un utstesbilix acuxlejalic ta swenta te bit'il la ach'uuniquix te smelelil c'op [ta swenta te Ch'ul Espiritue,] swenta yu'un smelelil te c'ux ya awaiy abaic soc te awermanotaque. Jich yu'un ya sc'an te talel c'axel c'ux ya awaiy abaic, ma me ayuc bila ay ta awo'tanic juju-jtulex. 23Melel cha'ayinemexix, ma ja'uc ta swenta bila ya xlaje, ja' ta swenta te sc'op Dios te cuxul soc te ma xlaj sbajt'el q'uinale. 24Melel jich ts'ibubil jilel ta Sjun te Diose: “Spisil ants-winiquetic jich c'oemic te bit'il wamale; soc spisil te yutsilalique, jich c'oem te bit'il snich te wamale. Te wamale ya xtaquej, jich ya xlubaj te sniche. 25Yan te sc'op te Cajwaltique, ma xlaj sbajt'el q'uinal stuquel”, te xie. Ja' in c'op to, ja' te lec yach'il c'op te la yich'ix cholel ta atojolique.


Copyright
Learn More

will be added

X\