1 San Juan 5

1Spisil mach'a xch'uunej te ja' Cristo te Jesuse, ja' me ayinem ta swenta Dios abi. Spisil mach'a c'ux ya yaiy ta yo'tan te tatile, ja' nix jich c'ux ya yaiybey ta yo'tan uuc te yal-snich'nabe. 2Teme c'ux ya caiytic ta co'tantic te Diose, soc teme ya cat'elintic spasel te bi la yal ta mandale, yu'un nanix c'ux ya caiytic ta co'tantic uuc te mach'a yal-snich'nab te Diose. 3Ja' in to, ja' xc'uxul co'tantic ta stojol Dios teme cat'elinejtic spasel te bi la yal ta mandale. In te smandal yalojbotique, ma ba wocol ta pasel. 4Melel spisil mach'a ayinem ta swenta te Diose, ya stsal te balumilale. Ja' ya yaiy tsalaw ta swenta te xch'uunjel yo'tane. 5¿Mach'a a te ya stsal te balumilale? Ja' te mach'a xch'uunej yo'tan te ja' Snich'an Dios te Jesuse. 6Ja' xtaluc te Jesucristo te chicnaj ta swenta ja' soc ta swenta ch'ich'. Ma ja'uc nax chicnaj ta swenta te ich' ja'e, chicnaj xan ta swenta te la smal te xch'ich'ele. Te Espíritu ja' ya yal ta testigo, melel te Espiritue smelelil te bila ya yale. 7Ay oxeb testigoetic yu'un ta bay ch'ulchan: Ja' te Tatile, soc te C'opile, soc te Ch'ul Espiritue. Jun nax ay ta yoxebalic. 8Soc ay oxeb testigoetic yu'un ta balumilal: Ja' te Espiritue, soc te ja'e, soc te ch'ich'e. Jun nax te bila ya yalic ta yoxebalique. 9Teme ya quich'tic ta muc' te testigo-c'op ya yalic te ants-winiquetique, c'axem to xan ya quich'tic ta muc' te testigo-c'op ya yal stuquel te Diose, te melel yalojbeyix sc'oplal ta testigo-c'op te Snich'ane. 10Te mach'a ya xch'uun te Snich'an Diose, ay ta yo'tan te testigo-c'op yaloj te Diose. Yan te mach'a ma xch'uun te testigo-c'op yalojix te Diose, ja' la spas lot ta sc'op te Diose, melel ma ba xch'uunej te testigo-c'op yu'un Dios ta swenta te Snich'ane. 11La yalbotiquix ta testigo-c'op te Diose te ya yac'botic jcuxlejaltic sbajt'el q'uinal, te cuxlejale ja' ta swenta te Snich'ane. 12Te mach'a xch'uunej te Snich'an Diose, ay xcuxlejal; te mach'a ma ba xch'uunej te Snich'an Diose, ma'yuc xcuxlejal. 13La jts'ibubeyex in to, ja'ex te ach'uunejic te sbiil te Snich'an Diose, swenta yu'un jich me ya ana'ic stojol te ay acuxlejalic sbajt'el q'uinal. 14Jich ay smuc'ul co'tantic ta stojol te Diose. Teme ay bila ya jc'anbeytic ta swenta te sc'anjel yo'tane, ya me yaiybotic stojol. 15Teme jna'ojtic stojol te yaiyojbotic stojol te bila la jc'anbeytique, jich la jna'tic stojol te ja' la yac'botiquix te bila c'anbil cu'untique. 16Teme ay mach'a la yil te yac ta sleel smul te yermanoe, teme ma ja'uc swenta lajel te smule, ac'a sc'oponbey Dios. Jich te Diose ya me yac' cuxinuc, teme yu'un nanix ma swentauc lajel te smule. Yu'un ay mulil te ya yac'otic ta lajele. In to, ma xcal te ya yich' c'oponel Dios yu'une. 17Ja' mulil spisil te bila ma stojiluc ta pasele, soc ay mulil te ma swentauc lajele. 18Jna'ojtic stojol te mach'a ayinemix ta swenta te Diose, ma ba ya sleulayix smul. Melel ja' canantaybil yu'un te Snich'an Diose. Jich ma xlo'layotix yu'un te pucuje. 19Jna'ojtic stojol te yu'unotic te Diose. Yan te balumilale, spisil ay ta sc'ab te pucuje. 20Jna'ojtic stojol te xtaluc ta balumilal te Snich'an Diose. Ja' la yac'botiquix jna'tic q'uinal swenta yu'un jich me ya jna'beytic sba te Mach'a Smelelile. Jich jun ayotiquix ta bay te Mach'a Smelelile, ja' bi, ja' te Jesucristo te Snich'an Diose. Ja' mero cuxul Dios stuquel, soc ja' cuxinel sbajt'el q'uinal. 21Cal-jnich'nab, tsajtaya me abaic yu'un te loc'ombaetique. Jichuc.


Copyright
Learn More

will be added

X\