1 San Juan 4

1Quermanotac te c'uxex ta co'tane, ma me xach'uunic te mach'atic scuyojic ta swenta Espíritu te c'op ya yalique. Tsajtaya me awilic neeluc teme ja' nix Espíritu yu'un Dios te yic'ojique, o teme ma ja'uque. Te melel pujq'uemiquix ta balumilal tsobol lotil j'alwanejetic. 2Jich me ya xchicnaj teme ya yic'ojic te Espíritu yu'un te Diose: Spisil mach'a ya yal ta jamal te ja' la yich' sbaq'uetal te Jesucristo te xtaluque, tey me ya ana'ic a te ja' nix Espíritu yu'un Dios te yic'ojique. 3Spisil mach'a ya yal te ma la yich' sbaq'uetal te Jesucristo te xtaluque, tey me ya ana'ic a te ma ja'uc Espíritu yu'un Dios te yic'ojique. Yu'un ja' yic'ojic te espíritu yu'un te anticristoe. Te ja'exe awaiyojiquix stojol te ay mach'a jich ya xtale. Melel nix a, ayix ta balumilal ta ora to. 4Cal-jnich'nab te ja' yu'unex te Diose, atsalojiquix te lotil j'alwanejetique, yu'un ja' cajal yip te mach'a jun ayex soque. Yan te mach'atic ayic ta swenta te balumilale, alan yip stuquel. 5Ja'ic te ayic ta swenta te balumilale, ja' ya yalic te bila swenta te balumilale. Jich ya x'aiybot stojol sc'opic yu'un te mach'a pajal ayic ta swenta te balumilale. 6Yan te jo'otique, ja' yu'unotic te Diose. Jich te jayeb mach'a ya sna'beyic sba te Diose, ya yaiybotic stojol jc'optic. Yan te mach'a ma yu'unuc te Diose, ma xyaiybotic stojol jc'optic stuquelic. Tey ya jna'tic stojol a te mach'a yic'oj te Espíritu yu'un te smelelil c'ope, soc te espíritu yu'un te mach'a jlo'laywaneje. 7Quermanotac te c'uxex ta co'tane, ya sc'an te talel c'axel c'ux ya caiy jbajtique, melel ta swenta Dios ya xtal te c'uxul-o'tanile. Spisil mach'a ay xc'uxul yo'tan, ayinemix ta swenta Dios abi, soc sna'ojbey sba te Diose. 8Yan te mach'a ma'yuc xc'uxul yo'tane, yu'un nanix ma sna'bey sba te Diose, te melel ja' Jc'uxul-o'tanil stuquel te Diose. 9La yac' ta ilel te bit'il c'uxotic ta yo'tan ta swenta bit'il la sticun tel ta balumilal te jip jtul Snich'ane, swenta yu'un jich me ya xcuxinotic ta swenta stuquel. 10Tey ya jna'tic stojol a te bit'il ay te xc'uxul yo'tan te Diose. Ma jo'ocotic te c'ux la caiytic ta co'tantic te Diose. Ja' c'ux la yaiyotic ta yo'tan stuquel. Jich la sticun tel te Snich'ane, la jelolintic ta stojel te jmultique. 11Quermanotac te c'uxex ta co'tane, te bit'il jich c'ux la yaiyotic ta yo'tan stuquel te Diose, jich yu'un ya sc'an te talel c'axel c'ux ya caiy jbajtique. 12Jtul ma'yuc mach'a yilojbey sit te Diose. Teme talel c'axel c'ux ya caiy jbajtique, yu'un nanix jc'axel ainemix ta co'tantic a te Diose, soc jich me ya cac'tic ta ilel te xc'uxul yo'tan Dios cu'untic. 13Tey chican a te jc'axel ainemotic ta yo'tan te Diose soc te jc'axel ainem ta co'tantique, ja' te mach'a yac'ojbotic te Espíritu yu'une. 14Jo'on testigoon soc te jo'taque, la quilbeytic sit te Jesucristo te ticunbil tel yu'un te Tatile, ja' te Snich'an Dios te Jcoltaywanej yu'un spisil te ants-winiquetique. 15Spisil mach'a ya yal ta jamal te ja' Snich'an Dios te Jesuse, jich jc'axel ainemix ta yo'tan te Diose soc jc'axel ainemix ta yo'tan uuc. 16Jich jna'ojtic stojol, soc xch'uunej co'tantic te c'uxotic ta yo'tan te Diose. Ja' Jc'uxul-o'tanil te Diose. Jich yu'un te mach'a jc'axel ay ta bay te xc'uxul yo'tane, ja' jc'axel ainemix ta yo'tan te Diose, soc jc'axel ainemix ta yo'tan uuc. 17Ta swenta te xc'uxul yo'tan te Diose, ya stojobtesotic swenta yu'un ja' smuc'ul co'tantic te c'alal ya sta sc'aalelal te ich'el ta c'ope. Jichuc me cat'eltic ta q'uinal te bi yilel yat'el te Jesucristoe. 18Teme ay xc'uxul co'tantique, jich ma'yucotic ta xiwel. Yu'un teme ay xc'uxul co'tantic ta melele, jich ma xiwotic. Melel te mach'a ay ta xiwele, ja' ya smaliy te ya x'ac'bot castigoe. Te mach'a ay ta xiwele, yu'un ma to tojobtesbiluc yu'un te c'uxul-o'tanile. 19Te jo'otique c'ux ya caiy ta co'tantic te Diose, yu'un ja' neel c'ux la yaiyotic ta yo'tan te Diose. 20Teme ay mach'a ya yal: “C'ux ya caiy ta co'tan te Diose”, teme xie, teme yilayej te yermanoe, yu'un nanix jpas-lot abi. Te mach'a ma c'uxuc ya yaiy ta yo'tan te yermano te ya yilbey site, ¿ja'uc to bal c'ux ya yaiy ta yo'tan te Diose te ma xyilbey sit stuquele? 21Melel jich la yalbotic mandal te Diose: “Te mach'a c'ux ya yaiy ta yo'tan te Diose, c'uxuc me ac'a yaiy ta yo'tan uuc te yermanoe”, te xie.


Copyright
Learn More

will be added

X\