1 San Juan 2

1Cal-jnich'nab, la jts'ibubeyex spisil in to swenta yu'un jich ma ba ya ale xan amulic. Ja'uc me to, teme ay mach'a ya sta smule, ay mach'a ya scoltayotic te ya xc'opoj cu'untic ta stojol te Tatile, ja' bi, ja' te Jesucristo te toj yo'tan stuquele. 2Te Jesucristo la yac' sba ta milbil smajt'an Dios swenta yu'un la spasbotic perdón yu'un te jmultique. Ja'uc me to, ma jtuquelticuc nax, soc spisil uuc te ants-winiquetique. 3Teme ya jch'uunbeytic smandal te Diose, tey ya jna'tic stojol a te jna'ojbeytic sbae. 4Yan teme ay mach'a ya yal: “Te jo'one jna'ojbey sba te Diose”, teme xie, ja'uc me to, teme ma ba ya xch'uunbey te smandale, yac ta spasel lot abi. Yu'un ma'yuc tey a ta bay te bila melele. 5Yan teme ay mach'a xch'uunej te bila la yal te Diose, yu'un nanix ayix xc'uxul yo'tan ta melel. Jich ya jna'tic stojol te jun c'oemotiquix soc te Diose. 6Teme ay mach'a ya yal te jun ayix soc te Diose, jichuc me xcuxlejal te bit'il c'ax ta q'uinal stuquel te Jesucristoe. 7Quermanotac, ja'ex te bayal c'uxex ta co'tane, ma ach' mandaliluc te la jts'ibubeyexe. Ja' nix te namey mandalil te awaiyojic stojol ta xjajch'ibal toe. Soc ma yanuc, ja' nix te mandalil te la awaiyiquix stojole. 8Ja'uc me to, yu'un nanix ach' mandalil c'oem te ya jts'ibubeyexe, te melel yach'il c'ot yu'un te Cristoe soc yach'il yaquix ta c'oel awu'unic uuc. Jich yaquix ta ch'ayel bael te ijc' q'uinale; ja' yaquix ta xojobajel te mero saquil q'uinale. 9Te mach'a ya yal te ayix ta bay te saquil q'uinale, teme yilintayej te yermanoe, yu'un nanix ay to ta ijc' q'uinal abi. 10Te mach'a c'ux ya yaiy ta yo'tan te yermanoe, ainemix ta bay te saquil q'uinale. Jich ma'yuc bi ya syalesot xan ta mulil yu'un. 11Yan te mach'a yilintayej te yermanoe, yu'un nanix ainem ta ijc' q'uinal, tey yac ta beel a. Jich ma sna' te banti ya xbajt'e, melel ma'sit c'oem yu'un te ijc' q'uinale. 12Cal-jnich'nab, jich la jts'ibubeyex in to, yu'un ch'aybilix amulic yu'un Dios ta swenta sbiil te Jesucristoe. 13Ja'ex te me'il-tatilexe, jich la jts'ibubeyex in to, yu'un na'bilix sba awu'unic te mach'a stalel ay ta xjajch'ibale. Ja'ex te jch'iel ants-winiquexe, jich la jts'ibubeyex in to, yu'un tsalbilix awu'unic te pucuje. Ja'ex alaletic, jich la jts'ibubeyex in to, yu'un la ana'beyiquix sba te Tatile. 14Ja'ex te me'il-tatilexe, jich la jts'ibubeyex in to, yu'un na'bilix sba awu'unic te Mach'a stalel ay ta xjajch'ibale. Ja'ex te jch'iel ants-winiquexe, jich la jts'ibubeyex in to, yu'un ay yip awo'tanic soc jc'axel ay ta awo'tanic te sc'op Diose. Jich tsalbilix awu'unic te pucuje. 15Ma me ja'uc c'ux ya awaiy ta awo'tanic te balumilale, ni te bitic swenta nax te balumilale. Teme ay mach'a c'ux ya yaiy ta yo'tan te balumilale, jich ma ba c'ux ya yaiy ta yo'tan te Jtatic Diose. 16Melel ta spisil te bitic ay ta balumilale, ja' te bitic ya sc'an te jbaq'uetaltique, soc te bila ya smulan yilel te jsitique, soc te toybail ta cuxinele, ma ja'uc yac'oj te Tatile. Spisil in to, ja' yac'oj te balumilale. 17Ja'uc me to, xquechet ta lajel bael te balumilale soc spisil sbic'tal yo'tanic te ants-winiquetique. Yan te sc'anjel yo'tan stuquel te Diose, sbajt'el q'uinal ay stuquel. 18Cal-jnich'nab, slajibalix c'aal ayotic. Jich bit'il awaiyojic stojol te ya xtal te anticristoe, jich ay chicanajemix tsobol anticristoetic. Jich ya jna'tic stojol a te slajibalix c'aal ayotique. 19Ja' nix te mach'a loq'uic bael ta coliltique. Ja'uc me to, yu'un nanix ma junuc ayotic soc a. Te yu'unuc junuc ayucotic soque, jc'axel jun ayotic soc te jichuque. Ja'uc me to, te bit'il loq'uic baele, yu'un tey me ya xchicnaj ta jamal a te ma jpisilticuc te jun ayotique. 20Yan te ja'exe, malbilix ta awo'tanic te Ch'ul Espiritue, jich spisil ya ana'iquix te bitic aye. 21La jts'ibubeyex in to, ma yu'unuc ma to ba ana'ojic te smelelil c'ope, melel ana'ojiquix. Jich ana'ojic stojol ta lec te xujt' ma'yuc lotil c'op ya xchicnaj ta swenta te smelelil c'ope. 22¿Mach'a a te jpas-lote? Ja' me te mach'a ya yal te ma ja'uc Cristo te Jesuse. Ja' me anticristo te mach'a ma xyich' ta muc' te Tatile soc te Nich'anile. 23Spisil mach'a ma sc'an yich'ic ta muc' te Nich'anile, yu'un nanix ma ba yich'ojic ta muc' uuc te Tatile. Yan te mach'a jamal ya yal te ja' xch'uunej te Nich'anile, ja' xch'uunej ta melel uuc te Tatile. 24Te bila awaiyojic stojol ta xjajch'ibal tele, jc'axel ainuc me ta awo'tanic. Teme jc'axel ya awac' ta awo'tanic te bila la awaiyiquix stojol ta xjajch'ibale, jich me jc'axel jun ayex soc te Nich'anile soc te Tatile. 25Soc yalojix te Jesucristo te ya yac' cuxinucotic sbajt'el q'uinale. 26La jts'ibubeyex in to, ta scaj te ay mach'atic ya slo'layexe. 27Ja'uc me to, te ja'exe malbilix ta awo'tanic te Ch'ul Espíritu te la yac'beyex te Jesucristoe, jich me jc'axel ya x'ain ta awo'tanic. Jich ma puersauc te ay mach'a ya sp'ijubtesexe. Ja' nix ya yac'beyex ana'ic stojol spisil te Espiritue. Yu'un melel spisil te bila ya yac'beyex anopic stuquele; ma lotil c'opuc te bila ya yale. Te bit'il p'ijubtesbilex yu'un te Espiritue, jich me jc'axel jun ya x'ainex soc te Cristoe. 28Jich yu'un, cal-jnich'nab, jc'axel ainanic soc te Cristoe, swenta yu'un jun nax co'tantic te c'alal ya quilbeytic site. Jich me ma jtatic q'uexlal ta stojol te c'alal ya xchicnaj tele. 29Teme ana'ojiquix stojol te bit'il toj yo'tan te Jesucristoe, na'aic me xan stojol jiche: Te mach'a yat'elinej spasel te bila toj ta pasele, ja' yal-snich'an Dios abi.


Copyright
Learn More

will be added

X\