1 Corintios 9

1¿Yu'un bal ma jpuc-c'opucon? ¿Yu'un bal ma libre ayucon? ¿Yu'un bal ma quilojuc te Cajwaltic Jesuse? ¿Yu'un bal ma ja'uc cat'elex ta swenta te Cajwaltique? 2Manchuc me ma jpuc-c'opucon ta sc'opic te yantique, yan te ja'exe, ana'ojic stojol ta lec te quich'oj cat'el ta jpuc-c'ope, melel te sello yu'un cat'el ta jpuc-c'ope, ja'ex ta swenta te Cajwaltique. 3Ja' in to, ja' sujt'ib cu'un ta stojol te mach'atic ya sbolc'optayone: 4Ay ta jwenta yich'el spisil te jwe'el-cuch'ele. 5¿Yu'un bal ma'yuc ta jwenta yinaminel jtul ants te xch'uunej Dios te jichuque, jich bit'il te yantic jpuc-c'opetique soc te yijts'inab te Cajwaltique soc uuc te Pedroe? 6¿Jo'on nax bal soc te Bernabé te ma'yuc ta jwentatic yich'el te bila ya xtuun cu'untique? 7¿Ay bal jtuluc soldado te ja' ya stoj stuquel te bila ya xtuun yu'une? ¿Ay bal mach'a ya sts'un ts'usub te ma ba ya stuuntesbey te site? ¿Soc ay bal mach'a ya smac'lin chijetic te ma ba ya xtuun yu'un te sleche? 8¿Sc'op nax bal winic te jich ya cale? ¿Ma bal jichuc ya yal uuc te mandalile? 9Melel te mandalil yu'un Moisés, jich ts'ibubil jilel yu'un: “Ma me xawac'bey sbolsail sni' te wacax te ya stec' ta wuyel te trigo”, te xie. ¿Yu'un bal ja' nax bayal sc'oplal ta yo'tan Dios te wacaxe? 10¿Ma bal ja'uc jc'oplaltic te jo'otique? Ja' na'ax. Yu'un ayotic ta yo'tan te bit'il jich la sts'ibuye. Melel te mach'a ya swoc'bey slumil te trigoe soc te mach'a ya smajbey te site, yu'un ja' ya smalibey te sit te ya xtuun yu'une. 11Teme jo'otic la cawtic ta awo'tanic te bila ya xtuun yu'un te ach'ulelique, ¿awuts'inelic bal ya awaiyic te yacuc awac'botic te bila ya xtuun cu'untic soc te jbaq'uetaltique? 12Teme ya xju' ya yich'ic awu'unic te yantique, ¿ja'uc to bal te jo'otique? Ja'uc me to, ma'yuc bay jtuuntesejtic te bila ay ta jwentatique. Cujch'emix cu'untic te jwocoltique, swenta yu'un ma me ayuc bila ya smac te lec yach'il c'op yu'un te Cristoe. 13¿Yu'un bal ma ba ana'ojic te mach'atic ya x'at'ejic ta spasel te yat'el Diose, tey ya xwe'ic a ta bay te temploe? Ja' nix jich te mach'atic ya yat'elinic smilel smajt'an te Diose, ya swe'elinic uuc te ti'bale. 14Ja' nanix jich la yal mandal te Cajwaltique: Te mach'atic yat'elinejic xcholel te lec yach'il c'ope, tey nix ya staic a te bila ya xtuun yu'unique. 15Ja'uc me to, te jo'one ma'yuc bi la jc'an te ya x'ac'boton. Soc te bit'il jich la jts'ibubeyexe, ma yu'unuc ya jc'an te ay bila ya awac'bonique. Ja' lec te yacuc lajucon teme ay mach'a ya spojbon te sbujts' co'tan te quich'oje. 16Te bit'il ya cat'elin xcholel te lec yach'il c'ope, ma spas te ya jtoy jba yu'une, te melel ja' mandal te alboton te ya jpase. ¡Obol me jba teme ma ba ya jchol te lec yach'il c'ope! 17Jich yu'un, teme ya jpas ta spasemal co'tane, la jtaix jmajt'an abi. Teme scaj utel ya jpase, yu'un nanix ac'bilon ta jwenta spasel yu'un a te Diose. 18Jich yu'un te jmajt'ane, ja' te bin nax co'tan ta xcholel te sc'oplal colel te ma ba ya jc'an jtojol yu'une; ja' bi, ma'yuc sc'oplal te bit'il ma xquich' wentainel yu'un te cat'el ta xcholel te sc'op Diose. 19Jich yu'un libre ayon yu'un spisil ants-winiquetic; ja'uc me to, abat cac'oj jba ta stojolic, swenta jich me ya jpas ta ganar tsobol ta jtul. 20Ta bay te judioetique, jich ya cac' jba te bit'il judioe, swenta yu'un jich ya jpas ta ganar a te judioetique. Te mach'atic ayic ta swenta te mandalile, jich ya cac' jba uuc te jo'one, swenta yu'un jich ya jpas ta ganar a te mach'atic ayic ta swenta te mandalile, manchuc teme ma'yucon ta swenta te mandalile. 21Te mach'atic ma ba wentainbilic yu'un te mandalile, jich ya cac' jba te bit'il ayique, swenta yu'un jich ya jpas ta ganar a te mach'a ma ba wentainbil yu'un te mandalile. (Ma yu'unuc te ma'yucon ta swenta te mandalile, melel ja' ayonix ta swenta te mandalil yu'un te Cristoe.) 22Teme ay te mach'atic ma'yuc yip yo'tanique, jich ya cac' jba uuc, swenta yu'un jich ya jpas ta ganar a. Jich la cac' jba ta stojolic, swenta yu'un ya xju' ya jcoltay ta xch'uunel a te Cristoe. 23Jich ya jpas spisil in to, ta scaj te sc'oplal colel, swenta yu'un jich ya xcolon uuc te jo'one. 24¿Yu'un bal ma ba ya ana'ic te bit'il spisilic ya x'animajic ta bay tajinabal te jaytul mach'a ya x'och stsal sbaic ta animale? ¿Ma bal jtuluc nax te mach'a ya yich' smajt'an te bit'il la yaiy tsalawe? Jich yu'un te ja'exe, ac'aic me puersa ta animal, swenta yu'un jich me ya awich'ic te majt'anile. 25Spisil te mach'a ya yac' puersa ta tsalawe, ya me scom sba ta spasel spisil te bila ya xlajinbot yip yu'une. Jich ya spasic, swenta yu'un jich me ya yich' scoronaic te ma xjalaj te yutsile. Yan te jo'otique, ja' ya quich'tic te corona te ma sna' xlaj yutsil stuquele. 26Jich yu'un te jo'one, ma jowilucon nax te ya x'animajone, ma jichucon te bit'il mach'a smuts'oj sit ya x'animaje. Soc ma jichucon te bit'il mach'a ya spas quera-c'abal te ma sna' stojlinele. 27Te jo'one ya cac' c'axuc swocol te jbaq'uetale, soc ya jsuj jba ta abatinel, swenta yu'un ma me xch'ayon jilel te jo'one, te bit'il jo'on nix la jcholbey yaiyic sc'oplal colel te yantique.


Copyright
Learn More

will be added

X\