1 Corintios 8

1Ta ora to ya calbeyex sc'oplal te milbil majt'anil yu'un te loc'ombaetique. Melel jna'ojtic jpisiltic te bit'il ay te loc'ombaetique. Ja'uc me to, te bila jna'ojtic stojole, ja' ya jtoy jbatic yu'un. Yan te xc'uxul-o'tanile, ya xmuc'ubotic yu'un stuquel. 2Teme ya jcuytic te ay bila jna'ojtic ta leque, yu'un nanix ma jna'tic abi. 3Ja'uc me to, te mach'a c'ux ya yaiy ta yo'tan te Diose, ja' na'bil sba yu'un Dios stuquel. 4Jich yu'un te bit'il ay sc'oplal te we'elil yu'un te milbil majt'anil yu'un te loc'ombaetique, jna'ojtic stojol te tojol ay ta balumilal te loc'ombaetique, te melel jun nax te Diose, ma'yuc yan. 5Manchuc teme ay bayal mach'atic scuyojic ta diosetic te bila ay ta ch'ulchan soc ta balumilale (jich bit'il ya yalic te ay bayal diosetic soc bayal ajwaliletic ta balumilale), 6ja'uc me to, te jo'otique, jun nax Dios ay cu'untic, ja' te Tatile. Ja' la spas spisil te bitic aye soc ja' yu'unotic uuc. Soc jun nax te mach'a cajwalinejtique, ja' te Jesucristoe. Ja' ta swenta te ay spisil te bitic aye; soc uuc te jo'otique, ja' cuxulotic ta swenta uuc. 7Ja'uc me to, ay to tsobol te ma to c'oemuc ta yo'tanique. Melel ay to cha'oxtul te c'aemic ta xch'uunel te loc'ombaetique. C'alal ya sti'beyic te milbil majt'anil yu'un te loc'ombaetique, te bit'il ma'yuc yip te yo'tanique, jich ya scuyic te ya xbolobic yu'un a. 8Ma ja'uc ma lecuc ya yilotic Dios yu'un te bila ya jwe'elintique. Melel ma ja'uc ya xbolobotic yu'un teme ya jti'tique, soc ma yu'unuc ja' lec ya xc'ootic yu'un teme ma jti'tique. 9Ja'uc me to, tsajtaya me abaic te bit'il ayex ta libre yu'un sti'ele. Ma me xawac' yaluc a te mach'a ma'yuc yip yo'tane. 10Melel teme ay mach'a la yilat te nacalat ta we'el ta smesa te loc'ombaetique, te mach'a ma'yuc yip yo'tane jich me ya sc'ain sti'el uuc te milbil smajt'an te loc'ombaetique. 11Jich ta swenta nax te bila ana'oje, te ya awac' ch'ayuc te awermano te ma'yuc yip te yo'tane, te ja' lajem Cristo yu'une. 12Te bit'il ya awac' ejch'enajuc yo'tanic te quermanotactic te ma'yuc yip yo'tanic ta xch'uunel te Diose, jich la ataix amulic ta stojol a te Cristoe. 13Jich yu'un teme ya cac' yaluc jtuluc quermano ta swenta te jwe'ele, ja' lec te ma me jti' te milbil majt'anile, swenta yu'un ma ba ya jyales a te quermanoe.


Copyrighted Material
Learn More

will be added

X\