1 Corintios 7

1Ta ora to, ya me jpasbeyex sujt'ib te bila la ajojc'obonic ta cartae: Lec teme ma sle yinam te winiquetique. 2Ja'uc me to, scaj te ay yalel ta mulile, jich yu'un juju-jtul ayuc me yinam te winique soc ayuc me smamlal te antse. 3Te winique junuc me yo'tan ac'a spas te ya sc'opon sba soc te yinam te nujbinem soque. Soc ja' nanix uuc te antse, junuc yo'tan ta stojol te smamlale. 4Te antse ma ba yu'uninej sba soc te sbaq'uetale, ja' yu'uninej te smamlale. Ja' nanix jich uuc te winique, ma ba yu'uninej sba soc te sbaq'uetale, ja' yu'uninej uuc te yiname. 5Ma me wocoluc xawac'bey abaic. Ja' nax teme ay ya achap ac'opic ta achebalic te jayeb c'aal te ma ba ya ac'opon abaique, swenta yu'un jich me ya awat'elinic sc'oponel te Diose. Teme loq'uix te jich yipal c'aal te la achapique, joina me abaic ts'iin, swenta yu'un ma me teyuc ya xlajex ta lo'layel yu'un a te Satanás, te bit'il ma xju'ix awu'unic te ya acom abaique. 6Te bit'il jich la calixe, ma yu'unuc ya jpas mandal, ja' nax ya cac' ta na'el teme ay jich awo'tanique. 7Yan te ya cal ta co'tan te jo'one, ja' lec te jichuc spisil winiquetic te bit'ilone. Ja'uc me to, chican bit'il ay smajt'an yu'un Dios juju-jtul. Ay jtul te ya xju' yu'une, ay yan te ma xju' yu'une. 8Ya calbey te mach'atic ma'yuc yiname soc te me'ba antsetique: Lec teme ma xnujbinic jich bit'il te jo'one. 9Yan teme ma'yuc smajt'an yu'un te ya scom sba soc te sbaq'uetale, ac'a nujbinuc. Yu'un ja' lec teme nujbineme, ja' amen teme ya xwoclaj yu'une. 10Te mach'atic nujbinemique, ya jpas ta mandal, ja'uc me to, ma jo'ocon jmandal, ja' smandal te Cajwaltique: Te antse ma me xyijq'uitay te smamlale. 11Melel teme ya yijq'uitay smamlal te antse, jich me teq'uel ac'a ainuc, o ya xjunaj yo'tan yan buelta soc te smamlale. Ja' nanix jich uuc te winique, ma me xyijq'uitay sba soc te yiname. 12Yan te yantique ay bi ya calbey, manchuc teme ma'yuc bay yaloj jich te Cajwaltique: Teme ay jtul quermanotic te ma ba xch'uunej Dios te yiname, ma me xyijq'uitay sba soc teme jun yo'tan ay ta sna te antse. 13Ja' nanix jich teme ay jtul quermanatic ants te ma ba xch'uunej Dios te smamlale, teme jun yo'tan yu'un te winique, te antse ma me xyijq'uitay. 14Melel te winic te ma ba xch'uunej te Diose, u'uninbilix yu'un Dios c'oem ta scaj te nujbinem soc ants te xch'uunej Dios stuquele. Ja' nanix jich uuc te ants te ma ba xch'uunej te Diose, u'uninbilix yu'un Dios c'oem uuc ta scaj te bit'il xch'uunej Dios te smamlale. Te manchuc jichuque, te yal-snich'anique, ma lecuc sc'oplal te jichuque. Ja'uc me to, u'uninbiliquix yu'un te Diose. 15Yan teme ja' ya x'ijq'uitaywan te mach'a ma xch'uunejuc te Diose, teme winic o teme ants, teme ya sc'an ya yijq'uitay sbae, ac'a spas abi. Jich libre ya xjil stuquel te mach'a xch'uunej te Diose. Melel ja' la yic'otic Dios yu'un te lamaluc q'uinal ya caiytique. 16Ants, ¿ya bal xju' awu'un sna'el teme ya xcol awu'un te amamlale? Winic, ¿ya bal xju' awu'un sna'el teme ya xcol awu'un te awiname? 17Jich yu'un, chican bit'il la spucbeyex amajt'anic juju-jtulex te Cajwaltique. Ja' lec te jichuc ya x'ainex te bit'il la yiq'uex ta stojol te Diose. Jich ya calbey mandal spisil te jch'uunjeletique. 18Teme awich'oj circuncisión a te c'alal la yic'at te Diose, jichuc me abi. Teme ma ba awich'oj te circuncisione, ma me xawac' aba ta yich'el. 19Melel ma'yuc sc'oplal te circuncisión teme awich'ojique o teme ma ba awich'ojique. Yan te bila bayal sc'oplale, ja' te ya ach'uunbeyic spisil smandal te Diose. 20Juju-jtulex jichuc ya x'ainex te bit'il la yiq'uex te Diose. 21Teme moso ayat a te c'alal la awich' iq'uele, ma me xamel awo'tan yu'un. Ja'uc me to, teme ya xju' awu'un te ya awac' aba ta libree, ac'a me aba ta libre jiche. 22Melel te mach'a ay ta mosoil a te ic'ot yu'un te Cajwaltique, yu'un nanix moso ay ta balumilal a, ja'uc me to, ac'bilix ta libre yu'un te Cajwaltique. Ja' nanix jich te mach'a ma'yuc ta mosoil a te c'alal ic'ote, ja' mosoinbilix yu'un te Cristoe. 23Melel toyem atojolic manbilex. Jich yu'un ma me xawac' abaic ta mosoil yu'un ants-winiquetic ta balumilal. 24Jich yu'un, juju-jtulex quermanotac, te bit'il ayex a te c'alal la yiq'uex ta stojol te Diose, jichuc me ainan ta stojol abi. 25Ta ora to, ya jpas ta mandal te jtec'tojom ach'ixetique. Ma'yuc bay caiyoj stojol teme ay mandal la yal te Cajwaltique. Ja'uc me to, ya cal te bila jnopoj ta co'tan jtuquel te ya xju' ya yich' ch'uunel awu'unic te bit'il quich'oj c'uxtayel yu'un te Cajwaltique. 26Jich yu'un ya cal te jo'one, ja' lec te manchuc ya xnujbinexe, ta scaj te ay swocolil te cuxinel ta q'uinale. 27Teme ay awiname, ma me xawijq'uitay aba soc. Yan teme ma'yuc awiname, ma me xale jiche. 28Teme ya xnujbinate, ma'yucat ta mulil yu'un. Soc teme ya xnujbin te jtec'tojom ach'ixe, ma'yuc ta mulil yu'un. Ja'uc me to, te mach'a jayeb ya xnujbine, puersa me ay swocol ya staic te jayeb c'aal cuxulic ta q'uinale. Ja' swentail te jich la calixe, yu'un co'tanuc te ma'yuc swocolique. 29Quermanotac, te bila ya calbeyexe, ja' in to: Ma'yuquix bayal c'aal. Jich yu'un, ja'ex te ay awinamique, jich me x'ainex te bit'il ma'yuc awinamic c'oeme. 30Te mach'atic ayic ta oq'uele, jichuc me c'oem te bit'il ma'yuquic ta oq'uele. Te mach'atic bin nax yo'tanique, jichuc me c'oem te bit'il ma'yuc sbujts' yo'tanique. Te mach'atic ya xmanbajique, jichuc me c'oem te bit'il ma yu'unuque. 31Te mach'atic ya stuuntesic spisil te bila ay ta balumilale, jichuc me c'oem te bit'il ma'yuc bila ya stuuntesique, melel ya xch'ay yutsil spisil te bila t'ujbilic ta balumilale. 32Ja' ya jc'an te manchuc ayuc bila ya yaan awo'tanique, melel te mach'a ma'yuc yiname, ja' ay ta yo'tan te bila swenta te Cajwaltique. Ja' nax ya xbajt' ta yo'tan spasel te bila lec yo'tan yu'un te Cajwaltique. 33Yan te mach'a nujbineme, ja' ya xbajt' ta yo'tan te bila ya xtuun yu'un ta balumilale, soc te bila lec yo'tan yu'un te yiname. 34Ja' nanix jich te ants te nujbineme, ma spaj te jtec'tojom ach'ixe. Melel te mach'a ma'yuc smamlale, ja' ay ta yo'tan te bila swenta te Cajwaltique, swenta yu'un jich me ch'ultesbil ya xc'ot soc sbaq'uetal soc xch'ulel. Yan te ants te nujbineme, ja' ay ta yo'tan te bila ya xtuun yu'un ta balumilale, soc ja' nax ya xbajt' ta yo'tan spasel te bila lec yo'tan yu'un te smamlale. 35Te bit'il jich la calbeyexe, swenta ac'uxtayelic ta apisilic, ma awuts'inelicuc. Yu'un ya jc'an te ya ana'ic spasel a te bila leque, soc te toj awo'tanic ya x'ainex ta stojol te Cajwaltique. 36Teme ay jtul winic te ya snop te ja' lec ya xnujbin te yantsil-nich'ane scaj te yaquix c'axel te ya'wilale soc teme ya sc'anix ya xnujbin ya yile, ac'a me yac' nujbinuc. Melel ma muliluc te nujbinele. 37Yan teme ma sc'an xnujbin te yantsil-nich'ane, ay ta libre teme jc'axel jich snopoje. Te tatile, lec teme ya scanantay te yantsil-nich'ane. 38Jich yu'un te mach'a ya yac' nujbinuc te yantsil-nich'ane, lec te jich ya spase. Yan te mach'a ma xyac' nujbinuque, ja' mero lec xan stuquel. 39Te ants te nujbineme, jun c'oem soc smamlal te jayeb c'aal cuxul te winique. Yan teme laj te smamlale, libre c'otix te ants te ya xnujbin soc yan. Chican te mach'a ya sc'ane, ja' nax teme ja' ta swenta te Cajwaltique. 40Ja'uc me to, ja' bin nax yutsil te mach'a ma xnujbin xane. Jich c'oem ta co'tan ya caiy jtuquel, yu'un ay ta co'tan ya caiy te Espíritu yu'un te Diose.


Copyright
Learn More

will be added

X\