1 Corintios 6

1Teme ay c'op awu'un soc awermano te ya awac' ta chajbanele, ¿lec bal te ya xba awac' ta chajbanel ta stojol juecetic te ma ba xch'uunejic te Diose? ¿Ma bal ja'uc lec te yacuc awac' ta chajbanel ta stojol te mach'atic ach'uunejic Dios soque? 2¿Yu'un bal ma x'ana'ic te mach'atic ch'ul lum yu'un Dios ya me xchajbanwanic ta balumilale? Melel teme ja'ex ya awaiyic chajbanwanej ta balumilale, ¿ma bal yacuc xju' awu'unic xchajbanel ta ora to te banti ma'yuc lec sc'oplale? 3¿Yu'un bal ma x'ana'ic te jo'otic ya caiytic chajbanwanej ta stojol uuc te ch'ul abatetique? Teme jiche, ¿ma bal yacuc xju' awu'unic xchajbanel te bila swenta nax jcuxlejaltic ta q'uinale? 4Melel teme ay c'op jajch'em awu'unic ta swenta nax te jcuxlejaltic ta q'uinale, ¿bi yu'un te ya xba awaq'uic ta chajbanel ta stojol juecetic te ma'yuc yat'elic ta stojol te jch'uunjeletique? 5Te bit'il jich la calbeyexe, yu'un ya cac' xq'uexawex yu'un te bila ya apasique. ¿Yu'un bal ma'yuc jtuluc awermano te ay sp'ijil yo'tan yu'un xchajbanel te c'op awu'unique? 6Ja'uc me to, teme jajch' c'op awu'unic te pajal ach'uunejic te Diose, ay ya awaq'uic ta chajbanel ta stojol juecetic ta swenta balumilal. 7Te bit'il ya xjajch' c'op awu'unique, tey chican a te bit'il ay bayal to sc'an awu'unique. ¿Ma bal ja'uc lec te yacuc sts'ijc' awu'unic te c'ope? ¿Ma bal ja'uc lec te yacuc sts'ijc' awu'unic teme ay mach'a ay bila ya spojbate? 8Ja'uc me to, ma jichuc ya apasic te ja'exe. Ya awaiyic elec' soc ya awuts'in abaic. Mero ma'yuc sc'oplal ta awo'tanic te bit'il awermano abaic ta stojol te Diose. 9- 10¿Yu'un bal ma x'ana'ic stojol te mach'atic ma tojuc yo'tanic ma xju' ya yajwalinic te Diose? Ma me slo'layex te awo'tanique, melel ma xju' ya xc'otic tey a te mach'atic ya xyalic ta mulile, te mach'atic ya xch'uunic loc'ombaetique, te mach'atic ya yaiyic mulweje, te mach'atic sc'atp'unej sbaic ta antse, te mach'atic sjoy sbaic ta winiquil te ay bi ya spasbey sbaic ta sbaq'uetalique, te j'eleq'uetique, te mach'atic biq'uit nax yo'tanic yu'un stsobel te sc'ulejale, te jyacubeletique, te j'ixta-c'opetique soc te mach'atic jlo'layej-taq'uinetique. Spisil in to, ma xju' ya xc'o ainuquic tey a ta banti ay ta ajwalinel te Diose. 11Ay nax la apasic jich ta neelal to uuc. Ja'uc me to, la awich'iquix poquel yu'un te Diose, soc ch'ultesbilexix soc libre c'oemex yu'un amulic ta swenta sbiil te Cajwaltic Jesús soc te Espíritu yu'un te Diose. 12Ay jich ta alel: “Libre ayon yu'un spasel te bila ya jc'ane”. Melel nix a. Ja'uc me to, ma spisiluc lec ta pasel. Jich, libre ayon yu'un spasel te bila ya jc'ane. Ja'uc me to, ma xcac' te ay bila ya stsalon jxujt'uque. 13Jich nix ay xan ta alel: “Te we'elile, ja' ta swenta te jch'ujt'ique; in te jch'ujt'ique, ja' swenta te we'elile”, xi'. Ja'uc me to, ya me slajinbey sc'oplal ta xchebal te Diose. Yan te jbaq'uetaltique ma swentauc yalel ta mulil; melel te jbaq'uetaltique, ja' yu'un te Cajwaltique. 14Te Diose la xcha'cuxes tel te Cajwaltique, ja' nix jich te jo'otique, ya me xcha'cuxesotic ta yu'el. 15¿Soc ya bal xju' ya cac'beytic sjoin sba te sbaq'uetal Cristo soc te sbaq'uetal te jmulawil antse? ¡Ma jichuc! 16¿Yu'un bal ma xana'ic stojol te mach'a ya sjoin sba soc sbaq'uetal te jmulawil antse, jun ya xc'ot soc? Jich te bit'il ts'ibubile: “Ta xchebalic jun nax sbaq'uetal ya xc'ot”, te xie. 17Yan te mach'a jun ya yac' sba ta swenta te Cajwaltique, jich jun nax ya xc'ot soc ta swenta te Espiritue. 18Jich yu'un, ijq'uitayaic te yalel ta mulile. Biluc xan yantic muliletic te ya spas te ants-winique, ma me ja'uc ya spas te bila ya sc'an te sbaq'uetale. Yan te mach'a ya xyal ta mulile, ja' ya yac' ta q'uexlal a te sbaq'uetal te la spas mulil soque. 19¿Yu'un bal ma ba ana'ojic te abaq'uetalic te ja' templo yu'un Ch'ul Espíritu te yac'ojbeyex te Diose? Jich te Ch'ul Espiritue ja' nainem ta awo'tanic. Te ja'exe, ma ba awu'uninej abaic, 20melel toyem atojolic la smanex te Diose. Jich yu'un ich'a ta muc' Dios soc te abaq'uetalique [soc uuc te ach'ulelique, melel yu'un Dios ta xchebalic.]


Copyright
Learn More

will be added

X\