1 Corintios 5

1Melel pujq'uemix ac'oplalic te ay mach'a yal ta mulil ta awolilique, te yinaminej te xcha'me'e. Ja' in mulil to mero chujc'ul sc'oplal ta melel. Ni jtuluc ay jich spasoj te mach'atic ma ba xch'uunejic te Diose. 2Yan te ja'exe, atoyoj abaic te lec ayex ta ac'opique. ¿Ma bal ja'uc lec te lajuc amel awo'tanic yu'un soc te lajuc yich' loq'uesel ta awolilic te mach'a spasoj te mulile? 3Manchuc teme ma'yucon ta awolilic soc te jbaq'uetale, ja'uc me to, joinejex ta co'tan. Te bit'il joinejexe, jich chapalix cu'un abi te mach'a staoj smule. 4Tsoba me abaic ta swenta sbiil te Cajwaltic Jesucristoe, ya me joinex ta co'tan soc te yu'el te Cajwaltic Jesucristoe. 5Jich me ya awaq'uic ta sc'ab Satanás te winique, swenta yu'un ya me xc'ax swocol ta sbaq'uetal. Jich me ya xcol xch'ulel te c'alal ya xtal te Cajwaltique. 6Na'aic me te ma lecuc te toybaile. ¿Yu'un bal ma ba ana'ojic te bit'il: “Jteb nax levadura ya spajubtes ta sc'olol te wots'bil harinae”, te xie? 7Loq'uesaic me te pocol levadurae, swenta yu'un jich me yach'il wots'bil harina ya xc'oex, te ma ba yich'oj levadurae. Melel te Pascua cu'untique, ja'ix te Cristo te la yich' milel ta jwentatique. 8Jich yu'un, c'alal ya jpastic te q'uin Pascua, ma me ja'uc ta swenta te pocol levadurae. Soc ma me ja'uc te levadura yu'un te bila amene soc te mulile. Ja'uc me te waj te ma'yuc levadura yich'oje, te bila stojile soc te bila smelelile. 9Ta yan carta la calbeyex te ma me xajoin abaic soc te mach'atic ya xyalic ta mulile. 10Ma yu'unuc ya cal te ma xju' ya ac'oponic te mach'atic ya xyalic ta mulil ta balumilale, soc te jbic'tal-o'tanetic, soc te j'eleq'uetic, soc te mach'atic xch'uunejic loc'ombaetique. Melel teme ma ba ya ac'an ac'oponique, ja' to teme ya aloq'ues abaic bael ta balumilale. 11Te bit'il jich la jts'ibubeyexe, ja' la calbeyex te ma me xajoin abaic soc te mach'atic quermanotic ta sc'opic te yalemic ta mulile, te jbic'tal-o'tanetic, soc te xch'uunejic to te loc'ombaetique, te j'ixta-c'opetique, te jyacubeletique, soc te j'eleq'uetique. Ja'ic in to, ma me xajoin abaic ta we'el soc. 12- 13¿Jo'on bal ay ta jwenta xchajbanel te mach'atic ma ba xch'uunejic te Diose? ¿Ma bal ja'uc ay ta awentaic xchajbanel te mach'atic xch'uunejic te Diose? Melel te mach'atic ma ba xch'uunejic te Diose, ja' ay ta swenta xchajbanel stuquel te Diose. Jich yu'un, loq'uesa me ta awolilic te mach'a c'ax amene.


Copyright
Learn More

will be added

X\