1 Corintios 3

1Jich yu'un, quermanotac, ma ju' cu'un te la jc'oponex jich te bit'il mach'atic wentainbilic yu'un te Espiritue. Jich la jc'oponex te bit'il mach'atic wentainbilic to yu'un te sbaq'uetalique, te melel jich c'oemex te bit'il ch'in alaletic ta stojol te Cristoe. 2Ja' la cac'beyex anuq'uic te chu'ule. Ma ja'uc la cac'beyex te tulan we'elile, melel ma to xju' awu'unic. Asta ora to, ma to xju' awu'unic snopel te bila tulane, 3te melel swentainejex to te abaq'uetalique. Melel tey chican a te ay to paichal ta awo'tanic, ya ajachic c'op, soc ya ajat abaic. ¿Ma bal ja'uc yat'el abaq'uetalic in to? Melel jich ya apasic te bila ya spasic spisil te ants-winiquetic te ma ba xch'uunejic te Diose. 4Melel jich ya yal te jtule: “Jo'on ayon ta swenta Pablo.” Te yane jich ya yal: “Jo'on ayon ta swenta Apolos”, te xie. ¿Ma bal ja'uc yat'el abaq'uetalic in to? 5¿Mach'a a te Pabloe? ¿Soc mach'a a te Apolose? Abatetic nax yu'un te Diose, te jich la ach'uunic Dios ta swentaique. Yu'un ja' nax ya spasic te bila ac'botic ta swentaic spasel juju-jtul yu'un te Cajwaltique. 6Te jo'one la jts'un. Te Apolose la yac'bey ya'lel. Ja'uc me to, ja' la yac' ch'iuc stuquel te Diose. 7Te mach'a la sts'une soc te mach'a la yac'bey ya'lele, ma'yuc sc'oplalic. Stuquel nax me ay sc'oplal te Diose, te ja' ya yac' ch'iuc stuquele. 8Te mach'a ya sts'une soc te mach'a ya yac'bey ya'lele, pajal sc'oplalic. Ja'uc me to, Dios ya yac'bey stojol, chican bi yilel yat'el juju-jtul. 9Melel te jo'otique, yaj-at'elotic te Diose. Te ja'exe, c'aljibalex yu'un te Diose. Soc pasbil naex yu'un te Diose. 10Ta swenta nax yutsil yo'tan te Diose, la yac'on ta maestro albañil ta yaq'uel yiptajib te sts'ajc'ule. Yan mach'a ya sts'ajc'uy moel ta sba. Ja'uc me to, juju-jtul ac'a yil te bi yilel ya xbajt' ta ts'ajc'uyel yu'une. 11Melel ma'yuc mach'a ya xju' ya yac'bey yan yiptajib te bit'il ochemixe, ja' bi, ja' te Jesucristoe. 12Ja'uc me to, ya xju' ta ts'ajc'uyel moel soc oro, plata, t'ujbil tonetic, te', ac, o c'ajben. 13Te yat'el juju-jtule ya me xchicnaj te bi yilele, melel ya me sta sc'aalelal te ya yich' tsajel ta c'ajc' te yat'el ta juju-jtule. 14Teme ma la stsac c'ajc' te yat'el la sju'tes a te nae, ya me x'ac'bot stojol yu'un. 15Yan teme ya xc'ajc' te yat'ele, ya me sta swocol yu'un teme ch'ay spisil te yat'ele. Ja'uc me to, ya na'ax col, jich bit'il te mach'a ya xcol loq'uel ta c'ajq'ue. 16¿Yu'un bal ma x'ana'ic te temploex yu'un te Diose, soc te nainem ta awolilic te Espíritu yu'une? 17Teme ay mach'a ya sjin te templo yu'un te Diose, ya me yich' jinel yu'un uuc te Diose. Melel te templo yu'un te Diose, ja'ex abi, te ch'ultesbilexe. 18Ma me mach'a ya slo'lay sba. Melel teme ay mach'a ya scuy sba ta p'ij ta swenta in balumilal to, jichuc ac'a scuy sba te ma'yuc bi ya sna'e, swenta yu'un jich me ay sp'ijil ya xc'ot a. 19Melel te p'ijilil yu'un in balumilal to, ma'yuc swentail ya yil te Diose. Jich bit'il te ts'ibubil jilel ta Sjune: “Te Diose ya me sjowtesbey yo'tanic te mach'atic p'ijic, ta scaj te ay sp'ijil ta sc'opique”, te xie. 20Soc jich ts'ibubil jilel xan: “Te Cajwaltique ya sna' te xujt' ma'yuc swentail te bila snopojic te mach'atic p'ijique”, te xie. 21Jich yu'un, ma me toyoluc nax q'uinal ya awaiy yu'un te jtul winique, melel ya xtuun awu'unic ta spisil: 22manchuc me Pablo, manchuc me Apolos, manchuc me Pedro, soc te balumilale, te cuxinele, te lajele, te bitic ay ta ora to, soc te bitic ya xchicnaj bael ta patile. Spisil in to, awu'unic. 23Yan te ja'exe, ayex ta swenta Cristo. In te Cristoe, ay ta swenta te Diose.


Copyright
Learn More

will be added

X\