1 Corintios 2

1Jich yu'un, quermanotac, te c'alal tal calbeyex awaiyic te sc'op Diose, ma ja'uc la cal te bila swenta p'ijil c'op soc t'ujbil c'op. 2Melel te c'alal la joinexe, la jnop ta co'tan ja' nax ya calbeyex ta atojolic te bit'il ay sc'oplal stuquel te bit'il laj ta cruz te Jesucristoe. 3Te c'alal ayon ta atojolique, mero ma'yuc te quipe. Ayon ta xiwel soc ta nijq'uel. 4Soc te la jc'oponex te la calbeyex te sc'op Diose, ma la jsujex ta xch'uunel ta swenta p'ijil c'op yu'un te ants-winiquetique. Ja' la cac'beyex ach'uunic ta swenta te Espíritu soc te yu'el te Diose, 5swenta yu'un ma me ja'uc ta swenta sp'ijil sc'op ants-winiquetic te ay xch'uunjel awo'tanique, ja' nax ta swenta yu'el stuquel te Diose. 6Ja'uc me to, ay nax ya caltic p'ijil c'op ta stojol te mach'atic ayix yip yo'tanique. Te p'ijil c'op te ya cale, ma ja'uc swenta in balumilal to soc ma ja'uc ta swenta te ajwaliletic yu'un balumilal te ya xch'ayic c'axel ta spisilique. 7Ja' ya caltic te sp'ijil sc'op Dios te ma'yuc ta na'el ta nameye, ja' te namey jich chapal sc'oplal yu'un te Dios te c'alal ma to pasbiluc a te balumilale, ta swenta cutsilaltic sbajt'el q'uinal. 8Te ajwaliletic swenta in balumilal to, ma la sna'beyic swentail. Te yu'unuc la sna'ique, ma la smilic ta cruz te Ajwalil yu'un utsilal te jichuque. 9Melel jich ts'ibubil jilel sc'oplal ta Sjun te Diose: “Ma'yuc mach'a yiloj ta sit, soc ma'yuc mach'a yaiyoj stojol ta xchiquin, soc ma'yuc ta yo'tanic ants-winiquetic te bila chajbanbil yu'un Dios te ya yac'bey te mach'atic c'ux ya yaiy ta yo'tanique”, te xie. 10Dios la yac'botiquix jna'tic stojol spisil in to, ta swenta te Espíritu yu'une. Melel te Ch'ul Espiritue, ya xju' yu'un te ya yac' ta na'el stojol spisile, manchuc teme ja' te bila muquen ay ta yo'tan stuquel te Diose. 11Jich bit'il te ants-winiquetique, ma'yuc mach'a ya sna'bey te bila ay ta yo'tan te jtul winique. Stuquel nax ya sna' te bila ay ta yo'tane. Ja' nanix jich te Diose, ma'yuc mach'a ya sna'bey te bila ay ta yo'tane. Ja' nax ya sna' stuquel te Espíritu yu'un te Diose. 12Te jo'otique, ma ja'uc quic'ojtic te espíritu yu'un te balumilale. Ja' quic'ojtic te Espíritu te talem ta bay te Diose, swenta yu'un jich me ya jna'tic stojol a te bila yac'ojbotic te Diose. 13Jich te c'alal ya jcholbeytic sc'oplal spisil in to, ma ja'uc ya cac' ta nopel te p'ijil c'op yu'un te ants-winique, ja' ya cac' ta nopel te bila swenta te Espiritue. Jich te bila swenta te Espíritu, ja' ya jcholbeytic yaiyic te mach'atic yic'ojic te Espiritue. 14Te ants-winic te ma ba yic'ojic te Espiritue, ma xc'ot ta yo'tanic te p'ijubtesel ta swenta te Espíritu yu'un te Diose, te melel jowil c'op nax c'oem ta yo'tanique. Soc ma xju' yu'unic sna'el stojol, yu'un ma ba ya yich'ic coltayel yu'un te Espiritue. 15Yan te mach'atic ayic ta coltayel yu'un te Espiritue, ya xju' yu'unic sna'el stojol spisil. Ja'uc me to, ma'yuc ta na'el stojol yu'un yantic te bit'il ayic stuquelique. 16Melel jich ts'ibubil ta Sjun te Diose: “¿Ay bal mach'a ya sna' awaiy te bila ay ta yo'tan te Cajwaltique? ¿Ay bal mach'a ya xp'ijubtesot yu'un?”, te xie. Ja'uc me to, te jo'otique quich'ojbeytic sp'ijil yo'tan te Cristoe.


Copyright
Learn More

will be added

X\