1 Corintios 16

1Te smajt'an Dios ya atsobic ta swenta scoltayel te mach'atic ch'ul lum yu'un te Diose, jich me x'atsobic te bit'il la jpas ta mandal te jch'uunjeletic te ayic ta sq'uinal Galacia. 2Ta jujun domingo juju-jtulex ya me awaq'uic jtebuc, ja' chican te jich yipal te bila ya ataique. Ya me aq'uejic swenta yu'un ma me ayuc taq'uin quechel ta tsobel xan awu'unic a te c'alal ya xtalone. 3Te c'alal ya xtalone, ya me jticun bael te mach'atic ya atsaique. Ya me jpasbey bael carta, swenta yu'un jich me ya xc'o yac'beyic ta sc'abic te smajt'an Dios te quermanotactic ta Jerusalén. 4Teme ya xju' cu'un te ya xboone, ja' me ya join bael. 5Ya xtalon ta banti ayexe, ja'uc me to, neel me ya xc'axon ta sq'uinal Macedonia. Teme c'axonix ta sq'uinal Macedonia, tey me ya xc'oonix a ta lum Corinto te banti ayexe. 6Ya niwan xjalajon jtebuc. O teme tey ya xc'ax cu'un a te yorail inviernoe, swenta yu'un jich me ya awac'bonic te bi ya xtuun cu'un ta beel ta banti c'alal ya xboone. 7Yu'un ma jc'an teme c'axel nax ya xc'ax quilexe. Ja' ya sc'an co'tan te ya joinex bayal c'aal teme jich ya sc'an yo'tan te Cajwaltique. 8Ja'uc me to, ya to xjalajon li'to ta Efeso ja' to ta yorail te q'uin Pentecostés. 9Yu'un jamal q'uinal ya caiy li'to te ya x'at'ejon xane, soc te ya xmuc'ub te at'ele, manchuc teme ay tsobol ya scontroinonic yu'une. 10Teme ya xc'ot ta bay ayex te Timoteoe, binuc nax me awo'tanic te ya awic' ta atojolique, melel yat'elinej spasel yat'el te Cajwaltique, jich te bit'il te jo'one. 11Jich yu'un ayuc me sc'oplal ta awo'tanic te Timoteoe. Ja' ya sc'an te ya acoltayic a te bila ya xtuun yu'un te bit'il ya xbeene, swenta yu'un jun yo'tan ya me xtal yilon, melel yacon ta smaliyel soc te quermanotactique. 12Yan te quermanotic Apolose, la calbey bayal wocol te yacuc xtal yilex soc te quermanotactique. Ja'uc me to, ma la sc'an te ya xbajt' ta orae. Pero ya to xtal yilex, chican bi ora te ya xju' yu'une. 13Wiq'uiluc me asitic spisil ora. Junuc me awo'tanic te ya awac' xch'uunjel te awo'tanique. Ayuc me stulanil awo'tanic soc yip awo'tanic. 14Spisil te bila ya apasique, socuc me xc'uxul awo'tan ya apasic. 15Quermanotac, ana'ojic stojol te bit'il ay sc'oplal te Estéfanas soc sjunal sna. Ja' mero sbabial la xch'uun te lec yach'il c'op ta bay spamal sq'uinal te Acayae, soc ana'ojic te bit'il yac'oj sbaic ta abatinel yu'un te mach'atic ch'ul lum yu'un te Diose. 16Ya calbeyex wocol te yacuc awich'ic ta muc' te mach'atic pajal yo'tanic soque, soc spisil mach'atic ya xcoltaywanic, soc te ya yac' sbaic ta abatinele. 17Bin nax co'tan yu'un te talem te Estéfanas soc te Fortunato soc te Acaico. Ja'ic ajelolinejic te bit'il q'uejel ayex atuquelique. 18Ja' la yac'boniquix sbujts' co'tan, jich te bit'il la yac' bujts'najuquix awo'tanic uuc te ja'exe. Ya sc'an ya awich'ic ta wenta spisil te mach'atic pajal yo'tanic soque. 19La sticunbeyex spatjibal awo'tanic te jch'uunjeletic te ayic ta sq'uinal Asia. Te Aquila soc te Priscila soc te jch'uunjeletic te ya stsobilay sbaic ta bay te snae, ya sticunbeyex bayal spatjibal awo'tanic ta swenta te Cajwaltique. 20Spisil te quermanotactique ya sticunbeyex spatjibal awo'tanic. Te ja'exe, patbeya aba awo'tanic juju-jtulex ta swenta te ch'ul bujts'iyele. 21Jo'on Pabloon, te la jts'ibubeyex ta jc'ab te spatjibal awo'tanic cu'une. 22Teme ay mach'a ma c'uxuc ya yaiy ta yo'tan te Cajwaltic Jesucristoe, ac'a bajt'uc ta ch'ayel abi. Ya me xtalix te Cajwaltique. 23Te yutsil yo'tan te Cajwaltic Jesucristoe, ac'a sjoinex ta spisil ora. 24Ta apisilic ya me jticunbeyex te xc'uxul co'tan ta swenta Cristo Jesús.


Copyright
Learn More

will be added

X\