1 Corintios 15

1Ta ora to, quermanotac, ya calbeyex xan ta jamal te lec yach'il c'op te la jcholbeyex awaiyique. La awich'ic ta muc' te c'alal la awaiyic stojole soc jun awo'tanic ach'uunejic ta ora to. 2Ta swenta in lec yach'il c'op to, ja' me ya xcolex yu'un teme jc'axel ya awac' ta awo'tanique, jich te bit'il la calbeyexe. Yu'un teme ma jichuque, tojol nax te la ach'uunique. 3Ja' la calbeyex awaiyic neeluc te bila tulan sc'oplal caiyoj stojole. Ja' te bit'il laj yu'un jmultic te Cristoe, jich bit'il ts'ibubil jilel ta Sjun te Diose. 4Soc te la yich' muquel, soc te cha'cux tel ta yoxebal c'aale, jich bit'il ts'ibubil jilel ta Sjun te Diose. 5La yac' sba ta ilel ta stojol te Pedro, soc ta patil la yac' sba ta ilel ta stojol te jpuc-c'opetique. 6Soc patil la yac' sba ta ilel ta stojol c'axem ta jo'winic xcha'bajc' (500) ta jtul te quermanotactic te stsoboj sbaique. Col spisiluc cuxulic to ta ora to, soc ay wayemix sbaq'uetalic. 7Patil la yac' sba ta ilel ta stojol te Jacoboe, soc la yac' xan sba ta ilel ta stojol spisilic te jpuc-c'opetique. 8Ta slajibal la yac' sba ta ilel ta jtojol uuc te jo'one, manchuc teme jichon te bit'il c'axem alal te ma to staojuc yuil te ya x'ayine. 9Te jo'one peq'uel ayon yu'un te yantic jpuc-c'opetique. Soc ma snujp'in ya caiy te jbiilinej jpuc-c'ope, yu'un la cuts'in te jch'uunjeletic yu'un te Diose. 10Ta swenta nax yutsil yo'tan Dios te jich c'ot ta jwentae. Soc ma tojoluc te bit'il ay yutsil yo'tan cu'une, yu'un c'ax jich at'ejemonix te bit'il at'ejemic spisil te yantique. Ja'uc me to, ma jo'ocon cat'el jtuquel, yu'un ja' at'ej ta jwenta te yutsil yo'tan te Diose. 11Ja'uc me to, ma'yuc sc'oplal teme jo'on at'ejone o teme ja' at'ej te yantique, melel jun nax te lec yach'il c'op te la jcholtic ta atojolique. Soc ja' nix te bila ach'uunejiquix te ja'exe. 12Te bit'il ja' yacotic ta xcholel te cha'cux tel te Cristoe, ¿bit'il ay a te ya awalic cha'oxtulex te ma'yuc te cha'cuxele? 13Melel teme ma xcha'cux tel te mach'atic lajemique, yu'un nanix ma ba cha'cuxem tel uuc te Cristo te jichuque. 14Teme ma cha'cuxemuc tel te Cristoe, jich ma'yuc swentail te bila yacotic ta xcholele, soc ma'yuc swentail te bit'il ay xch'uunjel co'tanique. 15Teme ma ba cha'cuxem tel te Cristoe, ayotic ta lotil testigo abi, melel la caltiquix te la yich' cha'cuxesel tel yu'un Dios te Cristoe. 16Melel teme ma ba ya xcha'cux te animaetique, yu'un nanix ma ba la yich' cha'cuxesel uuc te Cristoe. 17Teme ma ba cha'cux te Cristoe, ma'yuc swentail te xch'uunjel awo'tanique, soc acuchojic to amulic te jichuque. 18Jich yu'un te mach'atic wayemiquix ta stojol te Cristoe, jich jc'axel ch'ayemiquix te jichuque. 19Teme ja' nax smuc'ulinej co'tantic Cristo yu'un te bit'il cuxulotic ta q'uinale, ja' c'axem to xan obol jbajtic yu'un a te yantique. 20Ja'uc me to, smelelil te cha'cux tel ta bay animaetic te Cristoe. Ja' sbabial cha'cux tel yu'un te mach'atic wayemique. 21Melel ta swenta jtul winic te chicnaj te lajele, soc ja' nanix jich ta swenta xan jtul Winic te chicnaj cha'cuxel ta bay te animaetique. 22Jich bit'il jpisiltic ayotic ta lajel ta swenta te Adane, ja' nanix jich jpisiltic ya xcuxinotic ta swenta te Cristoe. 23Ja'uc me to, juju-jtul xmelmon ya xc'ot cha'cuxel ta swenta. Ja' sbabial te Cristoe; ta patil ja' te mach'atic yu'un te Cristoe, te c'alal ya xcha'tal xan. 24Patil ya me xtal te slajibal c'aale, ja' bi, ja' te c'alal Cristo ya slajinbey yat'el spisil te jmandalteswanejetic, soc te mach'atic yich'oj yat'elic, soc te mach'atic ay yu'elique. Jich ora te Cristo ya me yac'bey ta sc'ab Jtatic Dios spisil te yat'el yich'oje. 25Melel te Cristoe, puersa me ya x'och ta ajwalinel, ja' to teme la xpech' ta teq'uel spisil te yajcontroe. 26Ta slajibal te jcontroinwaneje, ja' te lajele, ya me yich' jinel te yat'ele. 27Melel te Diose, yac'ojbeyix xpech' ta teq'uel spisil te Cristoe. Ja'uc me to, te c'alal ya yal te spisil ayix ta swentae, tey chican a te ma pasbiluc ta mandal te Diose, melel ja' stuquel te la yac'beyix ta sc'ab spisile. 28Te c'alal spisil ayix ta sc'ab a te Cristoe, jich uuc te Cristoe, te ja' Snich'an te Diose, ya me yac' sba ta stojol te Jtatic Diose, te ja' nix ac'bot ta swenta spisil te bitic aye. Yu'un ja' nix ya swentain spisil te Diose. 29Teme ma'yuc te cha'cuxele, ¿bi ya xloc' yu'un a te mach'atic ya sjelolin ta ich'ja' te mach'atic lajemique? 30¿Soc bistuc cu'untic te spisil ora cac'oj jbatic ta lajel teme ma xcha'cuxotique? 31Jujun c'aal ayon ta lajel, quermanotac. Ja'uc me to, muc'uben q'uinal ya caiy awu'unic ta swenta Cristo Jesús te ja' Cajwaltic stuquele. 32Ta bay lum Efeso, la jtsal jba soc te mach'atic pajalic soc jti'awal chambalametique. Ja'uc me to, ¿bi ya xloc' cu'un a? Teme ma xcha'cux te animaetique, ja' lec te jichuc ya caltic uuc te bit'il ay ta alele: “We'ucotic-uch'ajucotic; melel pajel ya xlajotic”, te xie. 33Ma me xach'uunic lo'layel. Melel ay mach'a jich ya yal: “Teme ya jointic te mach'atic amenique, ya me xch'aybotic te lequil costumbre cu'untique”, te xie. 34Wiq'uiluc me asitic jiche. Ma me xale amulic. Melel ay cha'oxtulex te ma ba ana'ojbeyic sba te Diose. Jich ya calbeyex swenta yu'un jich me ya xq'uexawex a. 35Ja'uc me to, ay niwan mach'a jich ya yalic: “¿Bit'il ya xcha'cuxic te animaetique? ¿Soc bi me yilel sbaq'uetalic ya xcha'cuxic tel?”, teme xiique. 36Xujt' ma x'ana'ic te q'uinale. Melel te bila ya awawe ya xc'a' tey a, swenta yu'un ya xchij tel te yale. 37Te bila ya yich' awele, ma ja'uquix te ya xchicnaj tele. Te awalile sbac' nax te ya yich' awele, teme ja' te trigoe soc te yantic awalile. 38Te Diose ya yac'bey ste'el soc yabenal, jich te bit'il ya sc'an te yo'tane. Te juju-jchajp awalile ya yac'bey ste'el soc yabenal, jich nix te bi yilele. 39Ma pajaluc sbaq'uetal spisil te bitic cuxajtic ta q'uinale. Yan sbaq'uetal te ants-winiquetique, soc yan sbaq'uetal te chambalametique, soc yan sbaq'uetal te chayetique, soc yan sbaq'uetal te mutetique. 40Yan sbaq'uetalic te bitic ayic ta ch'ulchane soc yan sbaq'uetalic te bitic ayic ta balumilale. Ja'uc me to, yan yutsilalic te bitic ayic ta ch'ulchane soc te bitic ay ta balumilale. 41Yan xojobil te c'aale, soc yan xojobil te ue, soc yan xojobil yutsilal te eq'uetique, soc yanyantic xojobil yutsilal juju-jp'ij ta spisilic. 42Ja' nanix jich te c'alal ya xcha'cuxic tel soc sbaq'uetalic te animaetique. Ya yich' muquel ta lum q'uinal te sbaq'uetal te ya xc'a'e. Yan te c'alal ya xcha'cux tele, ma xju'ix te ya xc'a'e. 43Ya yich' muquel te bila ma'yuc yutsile. Ja'uc me to, ayix yutsil a te ya xcha'cux tele. Ya yich' muquel te bila jteb nax staele. Yan te c'alal ya xcha'cux tele, ay meix bayal yip a. 44Ya yich' muquel te bila ch'ich'-baq'uet naxe. Yan te c'alal ya xcha'cux tele, ja'ix baq'uet ta swenta te Espiritue. Ay baq'uet te ch'ich'-baq'uet nax aye, ja' nanix jich ay yan baq'uet ta swenta te Espiritue. 45Jich bit'il ts'ibubil jilel ta Sjun te Diose: “Te sbabial winique, ja' te Adane, ac'bot xcuxlejal soc te sbaq'uetale”, te xie. Yan te slajibal Adane, J'ac'cuxlejal ta swenta te Espíritu stuquel. 46Ma ja'uc neel ay te bila ta swenta te Espiritue. Ja' neel ay stuquel te bila ch'ich'-baq'uet naxe. 47Te sba winique pasbil ta ts'ubil lum soc ja' yu'un te lumq'uinale, te xchebal Winique, ja' yu'un te ch'ulchane. 48Te sbaq'uetalic te mach'atic ayic ta balumilale, ja' pajal soc te mach'a pasbil ta ts'ubil lume; yan te mach'atic swenta te ch'ulchane, ja' pajal soc te Mach'a talem ta ch'ulchane. 49Jich te bit'il pajal quileltic soc ta ora to te mach'a pasbil ta ts'ubil lume, jich nix pajal quileltic ya xc'ootic soc te Mach'a ay ta swenta te ch'ulchane. 50Quermanotac, ya calbeyex in to: Te ch'ich'-baq'uete ma xju' ya xc'o ainuc tey a ta banti ay ta ajwalinel te Diose. Te bila swenta c'a'ele, ma xju' ya xc'o sjoin tey a te bila stalel ma xc'a' stuquele. 51Ja'uc me to, ya calbeyex te muquen c'ope: Ma jpisilticuc te ya xway jbaq'uetaltique; ja'uc me to, ya me xc'atp'ujotic ta jpisiltic. 52Te c'alal ya x'oc' ta slajibal buelta te oq'uese, ya xc'atp'ujotic ta ora nax, jich bit'il ya smuts' sba mujts'eluc te jsitique. Te c'alal ya x'oq'uesinot te oq'uese, spisil te animaetique ya me xcha'cuxic tel. Xujt' ma xju' te ya xlajic xan yan buelta. In te jo'otique, ya xc'atp'ujotic ta jpisiltic. 53Yu'un te jbaq'uetaltic te ya xc'a'e, ya me sc'u'in te bila ma xc'a'e. Soc te bila ya xlaje, ya me sc'u'in te bila ma xlaje. 54Te jbaq'uetaltic te ya xc'a'e, ya me sc'u'in a te bila ma xc'a'e, soc te bila ya xlaje, ya me sc'u'in te cuxlejal swenta sbajt'el q'uinale. Jich me ya xc'ot ta pasel te bila ts'ibubil jilel ta Sjun te Diose: “Te lajele jc'axel la yich'ix tsalel. 55Te ja'at lajel, ¿bit'il c'an awaiy xan tsalaw? Muquenal, ¿bit'il c'an ayuc xan awat'ejibe?”, te xie. 56Te yat'ejib te lajele, ja' te mulile. Soc te yip te mulile, ja' ta swenta te mandalile. 57Ja'uc me to, wocol yal Dios yu'un te ya yac'botic caiytic tsalaw ta swenta te Cajwaltic Jesucristoe. 58Jich yu'un, quermanotac te c'uxex ta co'tane, ac'a me junajuc awo'tanic ta lec spisil ora. Yan yanuc me ta muc'ubel awu'unic te yat'el te Cajwaltique, melel ya ana'ic te ma tojoluc te ya awac' abaic ta abatinel yu'un te Cajwaltique.


Copyright
Learn More

will be added

X\