1 Corintios 14

1Antayaic me spasel te xc'uxul-o'tanile soc toyoluc me awo'tanic yu'un te majt'aniletic ta swenta te Espiritue. Ja' me xbajt' ta awo'tanic te ya awaiyic te j'alwaneje. 2Melel te mach'a ya xc'opoj ta yan c'opile ma ja'uc ya xc'opoj soc te ants-winiquetique. Ja' ya xc'opoj soc te Diose, melel ma'yuc mach'a ya yaiy stojol te bila ya yale. Melel ja' ya yal ta swenta te Espíritu te bila muquen aye. 3Yan te mach'a ya yaiy j'alwaneje, ja' ya sc'opon a te ants-winiquetique, swenta yu'un jich ya sta xan yip yo'tanic a, soc ya sta stac'uyelic a, soc ya xmuc'ubtesbot q'uinal yaiyic yu'un a. 4Te mach'a ya xc'opoj ta yan c'opile, stuquel nax ya sta yip yo'tan a. Yan te mach'a ya yaiy j'alwaneje, ja' ya sta yip yo'tanic a spisil te jch'uunjeletique. 5Co'tan te yacuc xc'opojex ta apisilic ta yantic c'opiletic. Ja'uc me to, ja' mero toyol co'tan yu'un te yacuc awaiyic j'alwaneje, melel ja' cajal sc'oplal stuquel a. Ja' peq'uel c'oem te mach'a ya xc'opoj ta yantic c'opiletique, ja' xanix te ayuc mach'a ya xju' yu'un sc'asesele, swenta yu'un jich ya sta yip yo'tanic a te jch'uunjeletique. 6Jich yu'un, quermanotac, ¿bila ya ataic a teme ya xtal jc'oponex ta yantic c'opiletique? Ma'yuc bi ya ataic a. Ja'uc me to, ay bila ya ataic a teme ja' ya calbeyex te bila yac'ojbon jna' te Diose, soc teme ya cac'beyex anopic te p'ijil c'ope, soc te sc'op te Diose, soc te nopjibale. 7Teme ja' te at'ejibaletic yu'un musicaetic, jich bit'il amay o teme arpa, teme ma ba yanyantic te sc'opique, jich ma xju' ta na'el sc'opic te juju-jchajbe. 8Teme ma chicanuc ta jamal sc'op te cornetae, ¿mach'a c'an xchajban sba yu'un te ya xloc' ta guerrae? 9Ja' nanix jich te ja'exe, teme ma chicanuc swentail te ac'op ya awalique, ¿bit'il c'an yaiybeyex stojol ac'op te mach'a ya yaiy stojole? ¡Jowil nax te yacalex ta c'ope! 10Ay bayal ta jchajp c'opiletic ta balumilal yu'un te ants-winiquetique, spisil chican ta aiyel stojol. 11Ja'uc me to, teme ma jna'bey swentail te c'opiletique, jich c'oemon ta stojol te bit'il q'uejel talemone, soc q'uejel talem ta jtojol uuc te mach'a ya xc'opoje. 12Ja' nanix jich te ja'exe, te bit'il toyol awo'tanic yu'un te majt'aniletic ta swenta te Espiritue, ja' me x'awantayic ta c'axem to xan te majt'aniletic te ya sta xan yip yo'tanic yu'un a te jch'uunjeletique. 13Jich yu'un te mach'a ya xc'opoj ta yan c'opile, ac'a me sc'anbey Dios te yacuc x'ac'bot sna' sc'asesel te bila ya yale. 14Melel teme ya jc'opon Dios ta yan c'opile, ja' ya sc'opon Dios te jch'ulele. Ja'uc me to, ma'yuc bi ya jna' stojol a. 15Jich yu'un, ¿bila ya sc'an ya jpas jiche? Ja' ya sc'an te ya jc'opon Dios soc te jch'ulele soc uuc te sp'ijil co'tane. Soc ya xc'ajinon soc te jch'ulele soc uuc te co'tane. 16Teme ya awalbey wocol Dios soc te ach'ulele, te mach'a jich to nax aye, ¿bit'il ya xju' ya yal “Jichuc”, teme ma sna' te bila ya awal wocol yu'une? 17Manchuc teme buen lec yacat ta yalel wocol ta stojol te Diose, ja'uc me to, ma sta yip yo'tan ta stojol Dios a te yane. 18Wocol yalbon Dios yu'un te c'ax jich ya xc'opojon ta yantic c'opiletic te bit'il ya xc'opojex te ja'exe. 19Ja'uc me to, ta bay yolil te jch'uunjeletique, ja' lec ya caiy te jo'p'aluc nax ya xc'opojon tey a te chican ta leque, te ya xju' ya xp'ijubic yu'une. Ma ja'uc lec ya caiy teme ya cal lajunmil (10,000) ta jp'al c'op ta yan c'opile. 20Quermanotac, ma me jichuquex te bit'il alaletic te ma to sna'ic q'uinale. Ja' lec teme jichex te bit'il alaletic te ma'yuc bila amen ay ta yo'tanique. Ja'uc me to, muc'ul ants-winicuquex me ta snopel te bila leque. 21Jich ts'ibubil jilel ta bay te mandalile: “Ja' in lum to, ya me jc'opon ta yantic c'opiletic soc ta swenta sti' te jyanlumetique. Ja'uc me to, ni ja'uc ya xc'ot ta yo'tanic yu'un, xi' te Cajwaltique”, te xie. 22Jich yu'un te yantic c'opiletique, ja' señail ta stojolic te mach'atic ma to bay xch'uunejic te Diose, ma ja'uc ta stojolic te mach'atic xch'uunejiquix te Diose. Yan te mach'a ya yaiy j'alwaneje, ma ja'uc yu'un te mach'atic ma to bay xch'uunejic te Diose, ja' yu'unic te mach'atic xch'uunejic te Diose. 23Jich yu'un, te bi ora ya stsob sbaic te jch'uunjeletique, teme yacalic ta c'op ta yantic c'opiletique, teme ya x'och ta yolilic te mach'atic ma p'ijubtesbiluque soc te mach'atic ma to bay xch'uunejic te Diose, ¿ma bal yacuc yalic te jc'axel tabilex ta jowiele? 24Yan teme apisilic ya awaiyic j'alwaneje, teme ya x'och tel ta awolilic te mach'atic ma p'ijubtesbiluque soc te mach'atic ma to bay xch'uunejic te Diose, jich me ya sna'ic stojol te bit'il jmulawiletique, soc jich me ya xjajch' sujt'es yo'tanic yu'un te smulique te bit'il yacalic ta yaiyel stojol te bila ya awalique. 25Jich ya xchicnantesbot te bila muquen ay ta yo'tanique, soc jich me ya squejan sbaic ta yalel wocol ta stojol te Diose. Ya me yalic ta jamal te melel ja' Dios te ay ta awolilique. 26Jich yu'un, quermanotac, ya calbeyex ta slajibal aiyej te bila lec ya sc'an ya apasique: Te bi ora ya atsob abaique, lec teme ay bila ya awalic juju-jtulexe. Te jtule ayuc c'ayoj yu'un Dios ya yal, te yane ay bila ya yac' ta nopel, te yane ya me yal te bila ac'bot sna' yu'un te Diose, te yane ya me xc'opoj ta yantic c'opiletic, te yane ya me sc'ases te bila la yich'ix alel ta yantic c'opiletique. Ta spisil in to, swenta yu'un ya me sta xan yip yo'tanic ta stojol Dios a te jch'uunjeletique. 27Teme ay mach'a ya xc'opoj ta yantic c'opiletique, ja' lec teme cha'oxtul nax. Ya sc'an te lajel lajel awo'tanic te ya xc'opojexe, soc ya sc'an te ayuc mach'a ya sc'asesbeyexe. 28Teme ma'yuc mach'a ya sna' sc'asesele, ja' lec te ma'yuc mach'a ya xc'opoj ta yan c'opil ta banti atsoboj abaique. Ac'a c'opojuc nax ta yo'tan soc te Diose. 29Ja' nanix jich te mach'atic ya yalic te sc'op Diose, ja' lec teme cha'oxtul naxe. Te yantique ja' nax ac'a stsajtay yaiy teme lec te bi ya yale. 30Teme ay mach'a nacal tey a te ay bi ya x'ac'bot sna' stojol yu'un te Diose, jich yu'un te mach'a yac ta c'ope ac'a scom sba ta c'op. 31Jich me ya xju' awu'unic te jayebex ya awalic te sc'op Diose te xmelmon ya xc'opojex juju-jtul ta apisilic, swenta yu'un jich ya xp'ijubex ta apisilic a soc ya xtulanaj xan awo'tanic yu'un. 32Te mach'a j'alwanejetique, ya xju' yu'un te ya scom sba ta c'op soc te yo'tane. 33Melel ma sc'an te Diose te xch'inch'on nax q'uinal cu'untique. Ja' ya sc'an te lamal nax q'uinal ta bay ayotique. Jich te bit'il ay ta pasel ta bay juju-jchajp te jch'uunjeletique, 34te antsetic awu'unique ma me xc'opojic tey a ta banti atsoboj abaique. Melel ma xju' ya xc'opojic stuquelic, jich te bit'il ya yal te mandalile. 35Teme ay bila ya sc'an sna'ic xan stojole, ja' ac'a sjojc'obeyic ta na te smamlalique. Melel ma snujp'in teme ya xjajch'ic ta c'op ta bay te tsobleje. 36¿Yu'un bal ja' chicnaj loq'uel ta awolilic te sc'op Diose? ¿Ja'ex nax bal atuquelic te awaiyojiquix stojole? 37Teme ay mach'a scuyoj sba ta j'alwaneje, soc teme yic'oj ta sc'op te Espiritue, ac'a c'otuc ta yo'tan te bit'il ja' smandal Cajwaltic te bila la jts'ibuye. 38Yan teme ma xc'ot ta yo'tane, ja' nanix jich ma me x'aiybot stojol sc'op. 39Jich yu'un, quermanotac, toyoluc me awo'tanic yu'un te yacuc awalic te sc'op Diose. Soc ma me x'acomic te mach'atic ya xc'opojic ta yantic c'opiletique. 40Ja'uc me to, yich'ojuc me swentail ta pasel awu'unic ta spisil.


Copyright
Learn More

will be added

X\