1 Corintios 12

1Quermanotac, ya jc'an ya ana'ic stojol te bit'il ay sc'oplal te majt'aniletic ta swenta te Espiritue. 2Te ja'exe, ya ana'ic stojol te bit'il ayex a te c'alal ma to ach'uunejic a te Diose. Jun nax awo'tanic la awac' abaic ta jowil alajinbel abaic ta stojol te loc'ombaetic te ma xc'opojique. 3Jich yu'un ya jc'an te ya ana'ic stojol te ma ja'uc ya xc'opoj ta swenta te Espíritu yu'un Dios te mach'a ya yal te mero amen te Jesuse. Soc ma'yuc jtuluc mach'a ya yal: “Ja' Cajwal te Jesuse”, te xie, te manchuc ja'uc ta swenta yu'el te Ch'ul Espiritue. 4Ajtalam te majt'aniletique, ja'uc me to, ja' nix Ch'ul Espíritu te ya yac'botique. 5Ajtalam te abatinele, ja'uc me to, ja' nix Cajwaltic te ya yabatinotique. 6Ajtalam ta pasel te at'ele, ja'uc me to, ja' nix Dios te ya yac'botic te ya xju' cu'untic spasele. 7Juju-jtul yanyan bit'il ya x'ac'ot chicnajuc ta stojol ta swenta te Espíritu yu'un te Diose, swenta yutsteselic ta spisilic. 8Ta swenta te Espiritue, ay mach'a ya x'ac'bot bayal sp'ijil ta c'op. Soc ja' nix ta swenta te Espiritue te ay mach'a ya x'ac'bot bayal sp'ijil ta q'uinale. 9Soc ay yan ya x'ac'bot xch'uunjel yo'tan ta swenta te Espiritue, soc ay yan ya x'ac'bot yu'el ta slamantesel te jchameletic ta swenta te Espiritue. 10Soc ay yan ya x'ac'bot spas jchajp at'eliletic, soc ay yan ya x'ac'ot ta j'alwanej, soc ay yan ya x'ac'bot sna' stsajtayel te espirituetique, soc ay yan ya x'ac'ot te ya xc'opoj ta yantic c'opiletique, soc ay yan ya x'ac'ot te ya sc'ases yantic c'opiletic. 11Ta spisil in to, ja' nix yat'el te Espiritue. Chican stuquel te bit'il la spucbey ta juju-jtul te majt'aniletique. 12Jun nax ay te jbaq'uetaltique, ja'uc me to, bayal ta jchajp te bila ay tey a. Manchuc teme bayal ta jchajbe, ja'uc me to, jun nax ay ta scojt'ol. Ja' nix jich te Cristoe. 13Yu'un te c'alal la quich'tic ja' ta swenta te Espiritue, jich jun nax jbaq'uetaltic c'ootic ta jpisiltic. Manchuc teme judioetic o teme jyanlumetic o ayic ta mosoil o teme libre ayique, jun nax te Ch'ul Espíritu te la quich'tic ta jpisiltique. 14Melel ta scojt'ol te jbaq'uetaltique, ma junuc nax te bila ay tey a. Bayal ta jchajp te bila chican tey a. 15Te jichuc ya yal te acanile: “Te jo'one ma jo'ocon c'abalon, jich ma'yucon ta abaq'uetal”, te xiuque, ¿yu'un bal tey la yijq'uitayix a te sbaq'uetale? 16Soc te jichuc ya yal te chiquinile: “Te jo'one ma sitilucon, jich ma'yucon ta abaq'uetal”, te xiuque, ¿yu'un bal tey la yijq'uitayix a te sbaq'uetale? 17Te ja'uc sitil scojt'ol te sbaq'uetale, ¿bit'il ya xju' yu'un te ya yaiy stojol te c'ope? Soc te ja'uc chiquinil scojt'ol te sbaq'uetale, ¿bit'il ya yaiybey yic' te bila ya xbeen yiq'ue? 18Ja'uc me to, te Diose chican te bit'il la sc'an yo'tan ta bay la yac' juju-jchajp ta bay te jbaq'uetaltique. 19Te jchajbuc nax ay ta spisil te bila ay ta jbaq'uetaltique, ma ba chapal te jbaq'uetaltic te jichuque. 20Melel jun nax te jbaq'uetaltic te ay bayal ta jchajp te bila ay tey ae. 21Te sitile ma xju' ya yalbey jich te c'abale: “Ma'yuc atuul cu'un”, te xiuc soque. Soc te jolole ma xju' ya yalbey te acanile: “Ma'yuc atuul cu'un”, te xiuc soque. 22Ja'uc me to, te bila ma'yuc yipic yilel te ay ta jbaq'uetaltique, ja' c'axem to xan ay bayal stuul cu'untic. 23In te bay peq'uel sc'oplal ya quiltique, ja' c'axem to xan ya jmuctic stuquel. Soc te bay ma snujp'in te ya cac'tic ta ilele, ja' c'axem to xan ya jmactic ta lec. 24Yan te bay lec ta ilele, ja' ma ba ya jmuctic stuquel. Ja'uc me to, Dios la xchajban ta lec spisil te jbaq'uetaltique. Jich yu'un ta bay peq'uel sc'oplal ya quiltique, ja' ya yich' xan c'uxtayel ta lec, 25swenta yu'un ma'yuc bila ya scontroin sbaic yu'un te bila ay ta jbaq'uetaltique. Jich talel c'axel ya xc'uxtay sbaic. 26Teme ay swocol junuc te bila ay ta jbaq'uetaltique, pajal ya yaiybeyic xc'uxul ta scojt'ol. Soc teme ya sta yutsilal junuque, pajal ya yaiybeyic yutsilal ta scojt'ol. 27Jich te ja'exe ja' sbaq'uetalex te Cristoe. Juju-jtul jun nax c'oemex soc. 28Ta juju-jtsojp te jch'uunjeletic Dios la yaq'uix te ja' sbabial ay jpuc-c'opetique, te xchebale, ja' te j'alwanejetique, te yoxebale, ja' te p'ijubteswanejetique, soc la yac' te ay mach'atic ya spasic jchajp at'eliletique, soc te ay mach'atic ya xju' ya slamantesic jchameletic, soc te ay mach'atic ya xju' ya xcoltaywanique, soc te ay mach'atic ya xju' ya xwolwanic, soc te ay mach'atic ay smajt'anic te ya xc'opojic ta yantic c'opiletique. 29Ja'uc me to, ¿spisil bal jpuc-c'opetic? ¿Spisil bal j'alwanejetic? ¿Spisil bal jp'ijubteswanejetic? ¿Spisil bal ya spasic jchajp at'eliletic? 30¿Spisil bal ay smajt'anic ta slamantesel te jchameletique? ¿Spisil bal ya xju' te ya xc'opojic ta yantic c'opiletique? ¿Spisil bal ya xju' yu'unic sc'asesel te bila ya yalic ta yantic c'opiletique? Ban c'an jichuc. 31Toyoluc me awo'tanic yu'un te lequil majt'aniletique. Ja'uc me to, ya me calbeyex awaiyic sc'oplal te bila jelawen yutsilal stuquele.


Copyright
Learn More

will be added

X\