1 Corintios 11

1Ja' me xanopic spasel te bila ya jpase, jich te bit'il la jnopbey te bila la spas te Cristoe. 2Quermanotac, bin nax co'tan te bit'il ya xjulon ta awo'tanique soc te bit'il ay to ta awo'tanic te p'ijubtesel la cac'beyex jilele. 3Ja'uc me to, ya jc'an te ya ana'ic stojol te ja' jolol yu'un spisil winiquetic te Cristoe, soc ja' jolol te winic yu'un te antse, soc ja' jolol yu'un Cristo te Diose. 4Spisil winiquetic teme smucoj sjolic te c'alal ya sc'oponic Dios soc te c'alal ya yalic te sc'op Diose, ja' ya yac' ta q'uexlal a te jolol yu'une. 5Spisil antsetic teme ma ba smucoj sjolic te c'alal ya sc'oponic Dios soc te c'alal ya yalic te sc'op Diose, ja' ya yac' ta q'uexlal a te jolol yu'une. Ja' pajal c'oem soc te jc'axeluc ya yich' joxel loq'uel te stsotsil sjole. 6Melel teme ay jtul ants te ma ba ya smuc te sjole, ja' lec te ya yich' joxel loq'uel te stsotsil sjole. Ja'uc me to, teme q'uexlaltic nax sba ya yaiy yu'un te joxbiluc te sjole, soc teme set'bil te sjole, ac'a me xch'uun te ya smuc te sjole. 7Yan te winiquetique, ma snujp'in teme ya smuc sjol stuquelique, te melel ja' sloc'omba Dios, soc tey ya xchicnaj ta ilel a te yutsilale. Yan te antse, ja' tey ya xchicnaj ta ilel yutsilal a te winique. 8Melel c'alal pastaj yu'un Dios te winique, ma ja'uc chicnaj ta swenta ants; ja' chicnaj ants ta swenta te winique. 9Ma ja'uc ta scaj ants te la yich' pasel te winique; ja' ta scaj winic te pastaj te antse. 10Ja' swentail te ya sc'an ay señail yich'oj ta sjolic te antsetique, ta scaj te yac ta ilel yu'un te ch'ul abatetique. 11Ja'uc me to, ta stojol te Cajwaltique, ma'yuc bi ya xju' yu'un ta stuquel nax te winique; soc ja' nanix jich ma xju' yu'un ta stuquel nax uuc te antse. 12Melel jich bit'il tey chicnaj loq'uel ants a ta bay te winique, ja' nanix jich ta swenta ants ya x'alatayot uuc te winique. Ja'uc me to, spisil chicnajem ta swenta te Diose. 13Te ja'exe ya xju' ya anopic uuc teme ya snujp'in te ma ba ya smuc sjol ya sc'opon Dios te antsetique. 14Chican te bi yilel jtaleltic ta q'uinale, ¿ma bal q'uexlalticuc sba teme najt' stsotsil sjol te winique? 15Yan te antse, chican ta ilel te ja' mero snujp' stuquel teme najt' te stsotsil sjole. Melel te smuquil te sjole, ja' te stsotsil sjole. 16Ja'uc me to, teme ay mach'a ya x'ayan yo'tan yu'un te bila la cale, ac'a me sna' stojol te ma jichuc costumbre cu'untic soc ta bay te juju-jtsojp jch'uunjeletique. 17Ta ora to, ya calbeyex te bila ma smulan co'tan te ya apasique. Melel te c'alal ya atsob abaique, ma ja'uc ya apasic te bila leque, ja' nax ya aboltes abaic a. 18Te bila sbabiale: Ja' te bit'il ya atsob abaic te ach'uunejic te Diose, caiyoj stojol te tsojboltsojp awac'oj abaic. Jich xch'uunej co'tan jtebuc te jich nix ya apasique. 19Chican ta jamal te puersa ma junuc awo'tan abaique, swenta yu'un tey ya xchicnaj ta jamal a te mach'a lec yo'tan Dios yu'une. 20Jich yu'un te c'alal ya atsob abaic ta we'ele, jich ma swentauquix Xch'ul Mesa yu'un Cajwaltic te bila ya apasique. 21Melel te c'alal ya xwe'exe, juju-jtul ya xneelaj ta stuuntesel te swe'elique. Jich ay ta wi'nal ya xjil te yane, soc ay ta yacubel ya xc'ot te yane. 22¿Yu'un bal ma'yuc anaic te banti ya xju' ya xwe'ex-uch'ajexe? ¿Yu'un bal ma'yuc sc'oplal ta awo'tanic te jch'uunjeletic yu'un Dios te bit'il ya awaq'uic ta q'uexlal te mach'atic ma'yuc bi ay yu'unique? ¿Bila ya sc'an ya calbeyex yu'un? ¿Ya bal calbeyex te mero lec te bila ya apasique? Ma jichuc ya calbeyex yu'un. 23Yu'un te jo'one, la cac'beyex anopic te bila la yalbon te Cajwaltique. Ja' bi, ja'ix ta ajc'ubal a te ya x'ac'ot ta c'abal te Cajwaltic Jesuse, la stsac ta sc'ab te waje. 24La yalbey wocol Dios yu'un. La xet' soc jich la yal: “Ila, we'aic. Ja' jbaq'uetal in to, te ya cac' ta lajel ta awentaique. Jich me xapasic bael spisil ora, yu'un tey me ya ana'onic a”, xi'. 25Ja' nanix jich te c'alal laj yo'tanic ta we'ele, la stsac ta sc'ab te vasoe soc jich la yal: “Ja' in vaso to, ja' yach'il trato te ya sta yip a ta swenta te jch'ich'ele. Jujun buelta te ya awuch'ique, pasaic ta swenta jna'jibal”, xi'. 26Jich yu'un jujun buelta te ya awe'ic te waje soc te ya awuch'ic te bila ay ta vasoe, ja' ya awalic ta jamal a te bit'il laj te Cajwaltique, ja' to te c'alal ya xcha'tal xane. 27Jich yu'un te mach'a ya swe' te waje soc te ya yuch' te bila ay ta vaso yu'un te Cajwaltique, teme ma'yuc sc'oplal ta yo'tane, ja' smul ya xc'ot te bit'il ma xyich'bey ta muc' xch'ich'el sbaq'uetal te Cajwaltique. 28Ja'uc me to, juju-jtul ac'a stsajtay yo'tan neeluc te ya swe' te waje soc te ya yuch' te bila ay ta vaso yu'un te Cajwaltique. 29Yu'un teme ma'yuc sc'oplal ta yo'tan te sbaq'uetal te Cajwaltique, te c'alal ya x'och ta we'el-uch'ajele, ja' nax ya sta castigo yu'un a. 30Ja' swentail te ay bayal jchameletic ta awolilic soc te mach'atic ma'yuc yip sbaq'uetalique, soc ay bayal te mach'atic lajemiquix yu'une. 31Ja'uc me to, teme ya jtsajtay co'tantic neeluque, jich ma xyac'botic castigo te Cajwaltique. 32Yan teme ya yil Cajwaltic te ma'yuc sc'oplal ta co'tantique, ya me yac'botic castigo yu'un, swenta yu'un ma me pajaluc ya xbootic ta ch'ayel soc te mach'atic ayic ta balumilale. 33Jich yu'un, quermanotac, te c'alal ya atsob abaic ta we'ele, talel c'axel maliya abaic te bit'il ya x'ochex ta we'ele. 34Teme ay mach'a ay wi'nal ya yaiye, ac'a we'uc ta sna, swenta yu'un ma ba ya x'ac'botex castigo yu'un Dios te bit'il ya atsob abaique. In te yantic aiyejetique, ya me jchajban te c'alal ya xtal quilexe.


Copyright
Learn More

will be added

X\