1 Corintios 10

1Quermanotac, ma jc'an ya xch'ay ta awo'tanic te bit'il spisil axintesotic ta tocal te namey q'uinal jme'-jtatique, soc spisilic c'axic bael ta yolil te Tsajal Mare. 2Jich spisilic jun c'otic soc Moisés te la yich'ic ja' te bit'il axintesotic ta tocal soc c'axic bael ta mare. 3Soc spisilic la stuuntesic te we'elil yu'un te Diose. 4Soc spisilic la yuch'ic te ja' yu'un te Diose, melel la yuch'ic te ja' loc' tel ta ton yu'un te Diose, joinbilic ta beel yu'un. In te tone, ja' ix te Cristoe. 5Ja'uc me to, te yantique, la spasic te bila ma lecuc yo'tan Dios yu'un. Jich lajic jilel tey a ta bay te jochol taquin q'uinale. 6Spisil in to, ja' ejemplo c'ot ta jtojoltic te jo'otique, swenta yu'un ma me xbic'taj co'tantic yu'un te bila amene, jich te bit'il bic'taj yo'tanique. 7Ma me xach'uunic te loc'ombaetique, jich te bit'il ay la xch'uunique, jich bit'il te ts'ibubil jilele: “Te lume la snajc'an sbaic ta we'el-uch'ajel soc jajch' spasic q'uin”, te xie. 8Soc ma me xyalotic ta mulil, jich te bit'il ay yalic ta mulile, jich lajic oxeb xcha'winic ta jmil (23,000) ta jun nax c'aal. 9Soc ma me xquilbeytic yo'tan te Cajwaltique, jich te bit'il ay la yil-o'tantayique, jich lajic ta ti'el ta chan yu'un. 10Soc ma me xamuquen-ayantayic te Diose, jich te bit'il ay la smuquen-ayantayique, te jich lajic ta milel yu'un te ch'ul abat te ya yac' lajele. 11Spisil in to, jich c'ot ta pasel ta stojolic, swenta yu'un ja' ejemplo ta jtojoltic, te ts'ibubil jilel ta swenta jcomeltic jo'otic te slajibal c'aal ayotiquixe. 12Jich yu'un te mach'a ya scuy te lec ayix ta sc'ope, ac'a me stsajtay sba te ma xyale. 13Te yiljibal awo'tanic te ya xtal ta atojolique, pajal ay ta atojolic soc te yantic ta bayuc. Ja'uc me to, jun yo'tan ta jtojoltic te Diose. Jich ma xyac' jelawuc xan yip ta atojolic te yiljibal awo'tanique, ma xyac' jelawuc a te bit'il ya xcujch' awu'unique. Yu'un te c'alal ya xtal te yiljibal awo'tanique, ya me slebeyex uuc te bit'il ya xju' ya xcolex loq'uele, swenta yu'un jich me ya xcujch' awu'unic. 14Jich yu'un quermanotac te c'uxex ta co'tane, jc'axel ijq'uitayaic jilel xch'uunel te loc'ombaetique. 15Jich ya jc'oponex te bit'il mach'atic p'ijique; nopa awaiyic ta lec te bila ya calbeyexe. 16Te ch'ul vaso te ya calbeytic wocol Dios yu'une, ja' ya yac' ta na'el te bit'il jun nax c'oemotic ta swenta xch'ich'el te Cristoe. Soc te waj ya jxet'ique, ja' ya yac' ta na'el te bit'il jun nax c'oemotic ta swenta sbaq'uetal te Cristoe. 17Jich bit'il te pejch' nax waj te comon ya jlajintic ta jpisiltique, jich jun nax c'oemotic ta jpisiltic a. 18Na'aic me te bit'il ay te lum Israele: Te mach'atic ya sti'beyic te milbil smajt'an te cuxul Diose, jun nax ya xc'otic soc a te xchic'jibal majt'anile. 19¿Bila ya cal yu'un? ¿Cuxul bal te loc'ombaetique? ¿Soc yu'un bal ay sc'oplal te smajt'an ti'bale? Ma'uc. 20Jamal ya calbeyex awaiyic: C'alal ya yac'beyic smajt'an te loc'ombaetic te jyanlumetique, ja' ya smajt'antesic a te pucujetique, ma ja'uc te Diose. Ja' ma jc'an te jun ya xc'oex soc te pucujetique. 21Ma xju' te jun buelta ya awuch' te bila ay ta vaso yu'un te Cajwaltique, soc ta yan buelta ya awuch' te bila ay ta vaso yu'un te pucujetique. Soc ma xju' te jun buelta ya xwe'at ta bay Smesa te Cajwaltique, soc ta yan buelta ya xwe'ex ta smesa te pucujetique. 22¿Yu'un bal ya jc'antic te ya cac'tic ilinuc yo'tan te Cajwaltique? ¿Yu'un bal ja' cajalotic yu'un a te Diose? 23Jich ay ta alel: “Libre ay yu'un spasel te bila ya sc'ane”, te xie. Melel nix a. Ja'uc me to, ma spisiluc lec ta pasel. Jich, libre ay yu'un spasel te bitic ya sc'ane. Ja'uc me to, ma xmuc'ubic ta stojol Dios yu'un. 24Ma me ayuc jtuluc te stuquel nax ya sle yutsilale, ja' ya sc'an te ya slebey yutsilal uuc te yantique. 25Spisil te ti'bal te ya xchonote, ti'a. Ma me xajojc'oy, swenta yu'un ma me xjajch' ta aiyej awo'tan yu'un. 26Melel spisil te bitic ay ta balumilale, ja' yu'un stuquel te Cajwaltique. 27Soc teme ay ya yiq'uex ta we'el te mach'a ma ba xch'uunej te Diose, ya xju' xbaex teme jich awo'tanique. Ti'a me te bila ya xpajchanbotat tele. Ma me x'ajojc'oy, swenta yu'un ma me xjajch' ta aiyej awo'tan yu'un. 28Yan teme ay mach'a la yalbeyexe: “Ja' in ti'bal to, ja' milbil smajt'an te loc'ombaetic”, teme xie, ta scaj te la yalbat ta jamal, ma me xati', swenta yu'un ma me xjin yo'tan yu'un. [Melel spisil te bitic ay ta balumilale, ja' yu'un te Cajwaltique.] 29Ma ja'uc ya cal te ya xjin awo'tanic te ja'exe. Ja' ya cal te ma me xjinbot yo'tan ta awentaic te mach'a la yalbeyexe. Ja'uc me to, ay niwan ya awalic jich: “¿Bistuc te ya quich' comel yu'un ta swenta bit'il ay yo'tan te yane? 30Melel teme ya calbey wocol Dios yu'un te jwe'ele, ¿bistuc ya quich' comel yu'un ta stuuntesel te bit'il ya cal wocol yu'une?”, teme xaexe. 31Jich yu'un ya calbeyex: Spisil te bila ya atuuntesic, soc te bila ya awuch'ique, soc spisil te bila ya apasique, ja'uc me lec sc'oplal ya xc'ot awu'unic a te Diose. 32Ma me ayuc mach'a ya awac' yaluc jtuluc te ja'exe, ni ja'uc te judioetique, ni ja'uc te jyanlumetique, ni ja'uc te jch'uunjeletic yu'un te Diose. 33Jich bit'il ya jpas te jo'one, ja' ya jpas spisil te bitic lec yo'tanic yu'un te yantique. Ma ja'uc ya jle jtuquel nax te cutsilale. Ja' ya jlebey yutsilal spisil te ants-winiquetique, swenta yu'un jich me ya xcolic uuc.


Copyright
Learn More

will be added

X\