1 Corintios 1

1Jo'on Pabloon, te yic'ojon Dios ta jpuc-c'op yu'un te Jesucristo ta swenta sc'anjel yo'tan te Diose. Jo'on soc te quermanotic Sóstenese, 2ya jpatbeyex awo'tanic ja'ex te jch'uunjelex ta lum Corinto, te ch'ultesbilex ta swenta te Cristo Jesuse. Dios la yiq'uex, swenta yu'un ya xch'ultesex soc spisil te mach'atic ayic ta bayuc te ya yalbeyic wocol te Cajwaltic Jesucristoe, te pajal cajwalinejtic soque. 3Ac'a yac'beyex lamal q'uinal ta swenta yutsil yo'tan te Jtatic Diose soc te Cajwaltic Jesucristoe. 4Spisil ora ya calbey wocol Dios ta awentaic te ja'exe, ta swenta nax yutsil yo'tan Dios te la yac'beyex bendición ta swenta te Cristo Jesuse. 5Melel ta swenta Cristo la yac'beyex ac'ulejalinic spisil te bitic aye, soc la yac'beyexix ana'ic spisil te lequil c'ope soc spisil te p'ijilile. 6Jich la ataic lec yip awo'tanic yu'un la awaiyic stojol te sc'oplal Cristoe. 7Jich ma'yuquix bila ya spas falta awu'unic yu'un te bitic majt'anil ya yac' te Diose. Jich jun nax awo'tanic yacalex ta smaliyel te bi ora ya xchicnaj tel te Cajwaltic Jesucristoe. 8Ja' me ya yac'beyex yip awo'tanic, ja' to c'alal ta slajibal c'aal. Jich me ma'yuc amulic ya xjul staex te Cajwaltic Jesucristoe. 9Puersa ya sc'otes ta pasel te bila yaloj te Diose, ja' te Mach'a la yiq'uex ta swenta te Snich'ane, ja' te Cajwaltic Jesucristoe. 10Quermanotac, ya calbeyex wocol ta swenta sbiil te Cajwaltic Jesucristoe, pajaluc me ac'opic ta apisilic, soc ma me ayuc xatomba awu'unic. Jun nax me xawac' abaic, soc junuc nax me te bila ya anopique, soc pajaluc nax me awilelic. 11Quermanotac, ja' la xcholbonix ac'oplalic te mach'atic ay yu'un te Cloé, te ay c'op jajch'em awu'unique. 12Ja' ya calbeyex ta jamal te ay jich ya awalic juju-jtul te ja'exe: “Jo'on ayon ta swenta Pablo”. “Jo'on ayon ta swenta Apolos”. “Jo'on ayon ta swenta Pedro”. “Jo'on ayon ta swenta Cristo”, te xaexe. 13¿Yu'un bal ay cha'oxchajp loq'uem a te Cristoe? ¿Yu'un bal ja' la yich' milel ta cruz awu'unic te Pabloe? ¿Yu'un bal ja' ta swenta sbiil Pablo te ac'botex awich'ic ja'e? 14Wocol yal Dios te ma tsoboluquex te la cac'beyex awich'ic ja'e. Ja' nax la cac'bey yich' ja' te Crispo soc te Gayoe. 15Jich ma'yuc mach'a ya xju' ya yal jtuluc te jo'on ta swenta jbiil te ac'bot yich'ic ja'e. 16Ja'uc me to, la nax cac'bey yich' ja' uuc te Estéfanas soc spisil mach'a ay yu'un ta sna. Ma jna'ix teme ay to yantic te la cac'bey yich'ic ja'e. 17Melel ma ja'uc sticunejon ta yaq'uel ich'ja' te Cristoe. Ja' sticunejon ta xcholel te lec yach'il c'ope. Ja'uc me to, ma swentauc sp'ijil ants-winiquetic te la cal loq'uel ta quee, swenta yu'un jich ma tojoluc ya xc'ot te bit'il laj ta cruz te Cristoe. 18Te c'alal ya calbeytic sc'oplal te laj ta cruz te Cristoe, jowil c'op aiyej nax c'oem ta yo'tanic te mach'atic ch'ayel ya xbajt'ique. Yan te jo'otic te ya xcolotique, jich c'oem ta co'tantic te ja' yu'el te Diose. 19Melel jich ts'ibubil jilel ta Sjun te Diose: “Ya me jinbey sp'ijilic te mach'atic p'ijique, soc ya me jch'aybey ta yo'tanic te mach'atic ay sp'ijil yo'tanique”, te xie. 20¿Banti ay te mach'a ay sp'ijile? ¿Soc banti ay te jts'ibojome? ¿Soc banti ay te mach'a ya sna' yalel te bitic ay li' ta balumilale? ¿Ma bal jowil c'opuc nax c'oem yu'un Dios spisil te p'ijil c'op te ay ta balumilale? 21Ja'uc me to, ta swenta sp'ijil te Diose, te mach'atic ayic ta balumilal ma la sna'beyic sba Dios ta swenta nax te sp'ijilique. Ja' lec la yaiy ta yo'tan Dios te ya scoltay te mach'atic ya xch'uunic te sc'ope, manchuc teme jowil c'op nax c'oem ta yo'tanic te yantique. 22Melel te judioetic ya sc'anic te ya x'ac'bot yilic señailetic. In te griegoetique, ja' ya sleic p'ijil c'op. 23Yan te jo'otique, ja' ya jcholtic ta bayuc te bit'il ac'ot ta milel ta cruz te Cristoe. Te judioetique, ja' nax ya xc'ojch'in sbaic yu'un a. In te jyanlumetique, jowil c'op nax ya xc'ot ta yo'tanic stuquel. 24Yan te mach'atic ic'bilic yu'un te Diose, chican teme judioetique o teme jyanlumetique, jich c'oem ta yo'tanic te bit'il ja' yu'el Dios soc ja' sp'ijil Dios te Cristoe. 25Melel te banti jteb nax sp'ijil ya yac' ta ilel te Diose, ma stabey c'oel spisil sp'ijil te ants-winiquetique. Soc te banti jteb nax yip ya yac' ta ilel te Diose, ma stabey c'oel spisil yip te ants-winiquetique. 26Quermanotac, ya me sc'an ya ana'ic te Dios la yiq'uexix ta stojol manchuc teme ma ba tsobolex te ay ap'ijilic ta swenta te balumilale, soc ma tsoboluquex te muc' c'oemexe, soc ma tsoboluquex te ich'bilex ta muq'ue. 27Ja'uc me to, ja' tsabilic yu'un Dios te mach'atic ma'yuc sp'ijilique, swenta yu'un jich me ya x'ac'ot ta q'uexlal a te mach'atic ay sp'ijilic ta sc'opique. Soc ja' tsabilic yu'un te mach'atic ma'yuc yipique, swenta yu'un jich me ya x'ac'ot ta q'uexlal te mach'atic ay yipic ta sc'opique. 28Soc ja' stsaoj Dios te mach'atic ilaybilic ta balumilale soc te p'ajbilique. Ja' stsaoj te mach'atic ma'yuc sc'oplale, yu'un ya sjin te mach'atic tulan sc'oplale, 29swenta yu'un jtul ma'yuc mach'a ya stoy sba ta stojol a te Diose. 30Yan te ja'exe, Dios la yaq'uex ta jun nax soc te Cristoe, ja' jp'ijiltic yac'ojbotic te Diose. Ja' la yac'otic ta libre yu'un jmultic, soc ja' ch'ultesbilotic yu'un, soc manbil jcoleltic yu'un. 31Ja' swentail te jich ts'ibubil jilel ta Sjun te Diose: “Te mach'a toyol nax q'uinal ya yaiye, ja'uc me toyol nax q'uinal ya yaiy yu'un te Cajwaltique”, te xie.


Copyright
Learn More

will be added

X\