Tito 3

1T'abbo me ya'yic ti tsc'an ac'o yich'ic ta muc' li ajvalile xchi'uc li boch'otic oy yabtelique. Ac'o xch'unic mantal; chapalicuc ta spasel scotol li c'usitic leque. 2Mu me boch'o xchopolc'optaic; mu me sliquesic c'op; ac'o oyuc slequil yo'ntonic. Ac'o yaq'uic ta ilel ta stojol scotol cristianoetic ti oy smuc'ul yo'ntonique. 3Yu'un ja' jech bolutic to'ox ec, jbajmantalutic, ch'ayemutic to'ox, mozoinbilutic to'ox yu'un li c'usiuc no'ox chopole xchi'uc li c'usiuc no'ox tsc'an co'ntontique. Ja' la jpastic li c'usitic chopolique, xti'et no'ox co'nton yu'un jchi'iltic, chopol no'ox laj quil jbatic, contra laj quil jbatic. 4Pero li Diose, ja' li Jcoltavanej cu'untique, laj yac'butic quiltic ti ep slequil yo'ntone xchi'uc ti ep sc'anoj li cristianoetique, 5jech la scoltautic. Pero mu ja'uc ta sventa tuc' c'usi la jpastic ti jech la scoltautique; ja' ta sventa xc'uxul yo'nton stuc. Ja' ta sventa ti la spocutic, ti la sjelbutic co'ntontic, ti laj yac' cha'voc'cutic ta ach' ta sventa li Ch'ul Espiritue. 6Yu'un muc bisbiluc no'ox lij'ac'bat Ch'ul Espíritu ta sventa li Jesucristoe, ja' li Jcoltavanej cu'untique. 7Jech lec xa chijyilutic ta sventa li slequil yo'ntone. Jech jpatoj xa co'ntontic ti xu' chcu'unintic, ti xu' ta jtatic li cuxlejal sventa sbatel osile. 8Ja' melel li c'op li'i. Jech ta jc'an ti chavac' persa yalele, yu'un jech ac'o c'otuc ta yo'ntonic spasel lequil abtel li boch'otic xch'unojic xa sc'op Diose. Yu'un le'e, toj lec me jech ta spasique; lec chtun ta sventa scotol li cristianoetique. 9Yan li lo'iletic ti mu'yuc stue, li sc'oplal smoltotaquic ta vo'one ti mu xlaj sc'oplal ta alel yu'unique, li tsacbail ta c'ope, li contrainejbail ta sventa mantaletique, altic; solel mu'yuc c'usi stu o. 10Li boch'o ta sliquesilan c'ope, taq'uio chib oxibuc velta. Me mu xch'une, comtsano. 11Yu'un chvinaj ti ch'ayem o ta bee, ti jech yo'nton tsc'an tspas o li c'usi chopole. Jech te ta xac' sba o ta ch'ayel stuc ta sventa li c'usi tspase. 12C'alal me la jtac tal ta atojol li Artemase o me ja' li Tiquicoe, abulajan xtal aq'uelun ta ora te ta lum Nicópolis, yu'un jnopoj te ta x'ech' cu'un yorail sictic. 13Coltao me batel ta sventa sbeic li licenciado Zenas xchi'uc li Apoloe, yu'un jech mu'yuc c'usi sc'an yu'unic. 14Ja' no'ox jech ec li jch'unolajeletic cu'untique, ac'o me xchanic spasel lequil abtel ti c'alal yorail oy c'usi tsots sc'oplal tsc'an pasele, yu'un jech oy yabtelic ta stojol Dios. 15Chabanuc la xayalboxuc scotol li boch'otic li' jchi'inoje. Chabanuc xavalbeic ec li boch'otic co'ol jch'unojtic jchi'uctique. Ac'o xc'uxubinoxuc acotolic li Diose.


Copyright
Learn More

will be added

X\