Tito 1

1Vu'un Pabloun, yajtunelun Dios xchi'uc yajtacbolalun li Jesucristoe, yu'un jech ac'o xch'unic li boch'otic t'ujbilic yu'un Diose, xchi'uc ac'o yotquinic li c'usi melele, jech chac c'u cha'al jch'unojtique. 2Jech tspat yo'ntonic ti xu' chcuxiic sbatel osile, ja' ti yaloj ono'ox Dios ta sliquebal ti ta xac' cuxicutique. Li stuque mu sna' x'epalc'opoj. 3Li' ta orae ic'ot xa sc'ac'alil laj yac' ta a'yel sc'op ta sventa ti laj yac'bun cabtel xcholele. Ja' ta smantal stuc li Diose, ja' li Jcoltavanej cu'untique. 4Jech ta jc'opanot tal ta carta, Tito, vo'ot li mero jnich'onot ta sventa ti co'ol jch'unojtique. Ac'o xc'uxubinot, ac'o spasbot ta jun avo'nton li Jtotic Diose xchi'uc li Jesucristoe ja' li Jcoltavanej cu'untique. 5Ti te la jcomtsanot ta Creta banamile, ja' avabtel ac'o achapan li c'usi sc'an chapanele, xchi'uc ti ac'o at'uj jcholc'opetic yu'un jch'unolajeletic ta jujun lume. Ja' jech li mantal laj calbot comele. 6Li boch'o ta x'och ta jcholc'ope tsc'an lec sc'oplal. Tsc'an jun no'ox yajnil, tsc'an xch'unojic xchi'uc yalab xnich'nab, yu'un xu' chtic'bat smulic me c'usiuc no'ox spasique, me jbajmantaletique. 7Yu'un li boch'o ta x'och ta jq'uelvanej yu'un jcholc'opetique tsc'an lec sc'oplal, yu'un ja' chventainvan ta sventa li Diose. Ja' yu'un tsc'an mu stoy sba, tsc'an mu x'ilin ta ora, tsc'an mu xyacub, tsc'an mu sa'ilan c'op, tsc'an mu xbat yo'nton yu'un taq'uin. 8Tsc'an ch-ic'van ochel ta sna, tsc'an ja' oy ta yo'nton li c'usitic leque, tsc'an oy lec sbijil, tsc'an tuc' yo'nton, tsc'an mu'yucuc smul; tsc'an sna' lec sventainel sba. 9Tsc'an ja' ac'o xch'un o li c'op ti ja' melel jech chac c'u cha'al ichanubtasate, yu'un jech xu' yu'un tspatbe yo'nton yantic ec ta sventa li lequil chanubtasele, xchi'uc jech xu' yu'un tstuq'uibtas li boch'o tscontrainic li lequil chanubtasele. 10Yu'un oy ep jtoybaetic; mu'yuc stu c'usi chalic. Ja' no'ox ta xlo'lavanic; ja' ech'em jech tspasic li boch'otic tsots sc'oplal cha'yic circuncisione. 11Le'e ja' tsc'an chamacbe yeic, yu'un ta xchibajesbeic yo'nton ta sjunul snaic li boch'otic xch'unojique, yu'un ja' ta xchanubtasvanic o li c'usi mu jechuc ta ch'unele, yu'un ja' no'ox oy ta yo'ntonic tsc'an tsa'ic taq'uin. 12Oy jun j'alc'op yu'unic, jech jamal laj yalbe sc'oplal li xchi'iltaque: “Li cretaetique puru j'epalc'opetic, toj simaronic, toj ech'em xve'ic, toj ch'ajic ta abtel”, xi. 13Ja' melel li c'usi laj yale, jech tsc'an tsots chapajes li boch'otic jech tspasique, yu'un jech j'ech'el ac'o xch'unic li c'usi melele. 14Yu'un jech mu me ja'uc lec cha'yic xch'unel li lo'iletic yu'un judioetique xchi'uc li mantaletic yu'un cristianoetic ti sva'lupatinojic c'usi melele. 15Li boch'otic lecubenic xae, lecuben xa ta sventaic scotol. Yan li boch'otic mu'yuc lecubenique, ti mu sc'an xch'unique, mu'yuc c'usi lecuben ta sventaic. Yu'un boliben o c'alal ta sjol ta sjol yo'ntonic. 16Chalic ti xotquinic Diose pero ta sventa c'usitic tspasic chvinaj ti mu meleluque. Solel bolibenic o, jbajmantaletic o; mu'yuc stuic o ta sventa li lequil abtele.


Copyright
Learn More

will be added

X\