Romanos 6

1¿C'usi chcaltic cha'e? ¿Me ja' lec ti te ta jsa'ilan o jmultic, yu'un jech ech'em ac'o xc'uxubinutic li Diose? 2¡Mu lecuc! Yu'un me chamenutic xa ta sventa li muliletique, ¿c'u x'elan xu' chijcuxiutic yan velta ta spasel? 3¿Me mu xana'ic ti co'ol lijchamutic o jchi'uctic Cristo ti c'u quepaltic laj quich'tic vo' ta sventa li Cristo Jesuse? 4Ta sventa ti laj quich'tic vo'e, co'ol lijmucatutic jchi'uctic Cristo noxtoc. Ta sventa ti lijchamutique, jech xu' chijcha'cuxiutic noxtoc jech chac c'u cha'al icha'cuxesat ta stsatsal Dios li Cristoe, jech ach' xa jtaleltic chquich'tic. 5Yu'un me co'ol lijmucat jchi'uctic Cristo ta sventa ti jun oyutic jchi'uctique, ja' jech chijcha'cuxiutic ec jech chac c'u cha'al icha'cuxi li Cristoe. 6Yu'un ta jna'tic ti te icham ta cruz xchi'uc Cristo li poco' jtaleltique, jech la slajesbe stsatsal li jtaleltic ti puru mulil tsc'ane, jech mu xa staojuc yav ti ja' chijtunutic o yu'un li mulile. 7Yu'un li boch'o icham xae, icol xa ta mozoinel yu'un li mulile. 8Me co'ol lijcham jchi'uctic li Cristoe, jech ta jch'untic noxtoc ti co'ol chijcuxiutic jchi'uctique. 9Yu'un ta jna'tic ti mu xa xcham yan velta li Cristoe, yu'un icha'cuxesat xa. Mu'yuc xa stsatsal ta stojol li lajele. 10Yu'un c'alal icham li Cristoe, j'ech'el la slajesbe yip li mulile. Ta sventa ti ichame ja' xa cuxul o ta stojol li Diose. 11Ja' no'ox jech ec li vo'oxuque tsc'an ti chamenoxuc o chava'yic ta sventa li mulile; tsc'an ja' cuxuloxuc ta stojol Dios ta sventa ti avich'ojic ta muc' li Cristo Jesuse. 12Ja' yu'un mu me ja'uc xaspasoxuc ta mantal li mulil ti tsc'an li abec'talic ti sna' xlaje. Mu me ja'uc xapasic li c'usitic lec cha'ye. 13Mu me ja'uc xavac'be sventain mulil li abec'talique; mu me xavaq'uic c'otuc ta yabtejeb mulil li abec'talique. Ja' tsc'an ja' chavac'beic sventain li Diose, yu'un jech chc'ot ta yabtejeb c'usitic tuc' ta pasel. Yu'un lacha'cuxesatic xa, vo'oxuc ti chamenoxuc to'oxe. 14Yu'un li mulile mu xa ja'uc chaspasoxuc ta mantal, yu'un mu'yucoxuc xa ta sventa mantal; ja' xa oyoxuc ta sventa slequil yo'nton li Diose. 15¿C'usi lec ta jpastic cha'e? ¿Me ja' lec ta jsa'ilan o jmultic, yu'un laj ca'itic ti mu'yucutic xa ta sventa mantale? ¡Mu lecuc! 16Yu'un xana'ic, me chcac' jbatic ta mozoinel yu'un jun cristianoe, ja' chispasutic o ta mantal. Ja' no'ox jech ec, me ja' chcac' spasutic ta mantal li mulil ti ja' chac' lajele, smozoutic chijc'ot o. Yan me ja' chcac' spasutic ta mantal li c'usitic tuq'ue, smozoutic chijc'ot noxtoc. 17Pero coliyal li Diose, ac'o me smozooxuc to'ox li mulile, pero ta sventa ti laj ach'unic ta scotol avo'ntonic li sc'op Dios la'albatique, 18jech muc xa smozoucoxuc li mulile; ja' xa yajtuneloxuc o li c'usitic tuc' ta pasele. 19Li' chic'opoj ti c'u cha'al lec ta a'ibel smelole, yu'un mu to xu' avu'un chava'ibeic smelol. Jech chac c'u cha'al ja' to'ox laj aq'uelan abec'talic ta sventa li muliletic xchi'uc li c'usitic chopole, jech lasoquic o batel achi'uquic. Ja' no'ox jech li' ta orae tsc'an ja' chaq'uelan abec'talic ta sventa c'usitic tuc', yu'un jech chalecubic batel. 20Yu'un c'alal ja' to'ox avac'oj abaic ta mozoinel yu'un li c'usitic chopole, mu'yuc ta avo'ntonic me oy chavac' abaic ta mozoinel yu'un li c'usitic tuq'ue. 21Pero ¿c'usi lec laj ataic yu'un li c'usitic laj to'ox apasic ti q'uexlal xa sba chava'yic li' ta orae? Scotol le'e, ja' no'ox chac' lajel. 22Pero li' ta orae colemoxuc xa ta mozoil ta sventa li c'usitic chopole; ja' xa yajtuneloxuc li Diose. Jech ja' xa chataic li c'usitic leque, ja' ti yantic chalecubic batele. Le'e ja' chac' acuxlejalic sventa sbatel osil. 23Yu'un li stojol mulile ja' ti chijchamutique; yan li jmotontic chijyac'butic Dios ta sventa ti jun oyutic jchi'uctic li Cajvaltic Cristo Jesuse ja' li cuxlejal sventa sbatel osile.


Copyright
Learn More

will be added

X\