Romanos 5

1Ja' yu'un li' ta orae, tuc' xa co'ntontic lijc'ot ta sventa xch'unojel co'ntontic. Jech ico'laj co'ntontic xchi'uc Dios ta sventa li Cajvaltic Jesucristoe. 2Xchi'uc ja' ta sventa noxtoc ti laj xa jtatic ta sventa xch'unojel co'ntontic li c'uxubinel yu'un Diose, jech jun xa no'ox co'ntontic te oyutic o; xcuxet no'ox co'nton ta jmalatic chbat jchi'intic ta slequilal li Diose. 3Pero ma'uc no'ox le'e, xcuxet co'ntontic noxtoc ti c'alal chquich'tic vocole, yu'un ta jna'tic ti ja' chac'butic stsatsal co'ntontic li vocole. 4Li stsatsal co'ntontique ja' chac' cuchuc lec cu'untic. Me chcuch cu'untique, ja' chac' ti jun xa no'ox co'ntontic ta jmalatic chbat jchi'intic li Diose. 5Mu lo'laeluc li c'usi ta jmalatique. Yu'un laj xa yac' jna'tic ta sventa Ch'ul Espíritu yac'ojbutic ti j'ech'el c'anbilutic o yu'un Diose. 6Ta sventa ti mu xu' cu'un ta jcolta jba jtuctique, ja' yu'un c'alal la sta yorail c'usi ora snopoj Diose, icham ta scoj jmultic li Cristoe vu'utic ti chopol cristianoutique. 7Li boch'o ja' no'ox tuc' yo'ntone, mu'yuc van boch'o chac' sba ta milel ta scoj. Ja' to me oy jun vinic ti toj lec c'usitic spasoje, oy van yic'al oy boch'o chac' sba ta milel ta scoj. 8Pero li Diose laj yac' ta ilel ti ta melel sc'anojutique, ac'o me solel yuxub jpasmulilutic, pero icham ta jcojtic li Cristoe. 9Ja' yu'un c'u to x'elan lec chijyilutic ta sventa xch'ich'al li Cristoe, yu'un ja' ta sventa ti mu'yuc xa chbat jtoj jmultique. 10Vu'utic ti contra ono'ox chquil jba jchi'uctic li Diose, lec xa jc'opan jba jchi'uctic ta sventa ti icham ta jcojtic li Xnich'one. Me lec xa jc'opan jba jchi'uctique, jbel sc'oplal colemutic o ta sventa ti cuxul li Xnich'one. 11Pero ma'uc no'ox xcuxet co'ntontic ti colemutic xae, toj jun no'ox co'ntontic ta stojol Dios noxtoc ta sventa li Cajvaltic Jesucristoe, yu'un ja' ta sventa ti lec xa jc'opan jba jchi'uctic li Diose. 12Ta jna'tic ti ta sventa jun vinic i'och li mulil li' ta banamile, xchi'uc ti ja' ta sventa mulil i'och li lajele, jech scotol cristiano chchamic, yu'un scotol cristiano jpasmulil ic'otic. 13C'alal mu'yuc to'ox li smantaltac Diose, oy xa ono'ox mulil li' ta banamil. Manchuc me mu'yuc to'ox li mantaletique, pero ma'uc yu'un mu'yuc smul i'ilatic o li cristianoetique. 14Yu'un icham scotol li cristianoetic xlic ta Adán c'alal ta Moisese, ac'o me mu ja'uc jech smulic ec jech chac c'u cha'al smul li Adane. Ti jech ic'ot ta pasele, ja' senyail ti ja' jech oy c'usi ta jtatic noxtoc ta sventa li boch'o sc'oplal chtale. 15Pero li jmotontic chijyac'butic Diose mu xco'laj xchi'uc li c'usi la jtatic ta sventa mulile. Yu'un ta scoj smul jun vinic ti jech chcham scotol cristianoetique. Jech buuc xa li c'uxubinel yu'un Dios ti jmotontic no'ox chijyac'butic ta sventa li jun vinic Jesucristoe, xu' tsta scotol li epal cristianoetique. 16Li jmotontic ta jtatic ta sventa Diose mu xco'laj xchi'uc c'usi la jtatic ta sventa smul li jun vinique. Yu'un ta sventa no'ox jun mulil la spas ti jech sc'oplal chbat jtoj jmultique. Yan li matanal chac' Diose xu' chch'ayes epal mulil, jech xu' mu'yuc smul chc'ot li cristianoetique. 17Me ta sventa no'ox la sta smul jun vinic ti jech laj yu'uninutic o li lajele, ech'em to jech xu' chijyu'uninutic o cuxlejal ta sventa li jun vinic Jesucristo, vu'utic ti ta yutsil no'ox yo'nton, ti jmotontic no'ox lec xa chijyilutic Diose. 18Jech chac c'u cha'al ta sventa smul jun vinic quechel ta chapanbel smul scotol li cristianoetique, ja' no'ox jech ta sventa tuc' yabtel jun vinic xu' mu'yuc smul ch-ilatic yu'un Dios scotol li cristianoetique, jech xu' tstaic xcuxlejalic sbatel osil. 19Jech chac c'u cha'al ta sventa la sbaj mantal jun vinic ti jech jpasmuliletic ic'ot li yepal cristianoetique, ja' jech ta sventa la xch'un mantal jun vinic, xu' mu'yuc smul ch-ilatic yu'un Dios li epal cristianoetique. 20Li mantaletique ja' laj yac' vinajuc epal mulil. Pero ac'o me ep li mulile, li Diose ech'em to laj yac' ta ilel ti bats'i ep slequil yo'ntone. 21Jech chac c'u cha'al laj yu'uninutic li mulil, yu'un jech ac'o chamcutic jcotoltique, ja' jech ac'o yu'uninutic noxtoc li slequil yo'nton Diose, yu'un jech ac'o cuxicutic jcotoltic ta sventa li Jesucristoe, ja' li Cajvaltique.


Copyright
Learn More

will be added

X\