Romanos 3

1Ja' yu'un ¿c'usi lec chloc' yu'un li boch'o Judío sbie? ¿C'usi stu li circuncisión yich'oje? 2Ta melel oy lec stu. Yu'un ja' ba'yuc laj yich'ic li sc'op Diose. 3Pero ¿c'usi chc'ot ta pasel ta sventa ti oy jayibuc mu'yuc xa jun yo'ntonic ta stojol Diose? ¿Me te ilaj sc'oplal o ec ti jun yo'nton ta jtojoltic li Diose? 4Mu'yuc bu chlaj sc'oplal. Yu'un li Diose bats'i melel xc'opoj o; yan li cristianoetique mu xc'ot xc'opojic, jech chac c'u cha'al ts'ibabil ono'ox ta sc'op Diose: “Jech chvinaj ti tuc' chac'opoje, xchi'uc ti chatsalvan c'alal chavich' chapanele”, xi ts'ibabil. 5Pero me chcaltic ti ja' ta scoj jchopoliltic chbat vinajuc ti toj tuc' yo'nton li Diose, ¿c'usi chcaltic noxtoc c'alal chac'be stoj smul li jpasmuliletique? ¿Me yu'un mu'yuc tuc' c'usi tspas? (Li'i chic'opoj jech chac c'u cha'al chc'opoj cristianoetic). 6Mu jechuc. Ti jechuque ¿c'u x'elan xu' chchapanbe smul scotol cristianoetic ta sbejel banamil? 7Ti ja'uc ta sventa lec jna' xi'epalc'opoj yo' jech chbat vinajuc ti bats'i melel xc'opoj li Diose, ¿c'u yu'un jpasmulil chiyilun ta sventa ti chi'epalc'opoje? 8Ti meleluque, ¿c'u yu'un mu ja'uc ta jpastic c'usitic chopol, yu'un jech xu' ta jtatic li c'usitic leque? Oy boch'o jech chisoquesbun jc'oplalcutic, chalic ti ja' jech chichanubtasvancutique. Li boch'otic jech chalique ta ono'ox xich'ic chapanbel smulic. 9¿Ja' yu'un c'usi xu' chcaltic? ¿Me vu'utic xjelov jlequiltic jech chac c'u cha'al li yanlum cristianoetique? ¡Mu'yuc! Yu'un laj xa ca'itic ti co'ol oy smul scotole, me israel, o me yanlum cristiano. 10Yu'un jech ono'ox ts'ibabil ta sc'op Dios: “Me junuc mu'yuc boch'o tuc'. 11Me junuc mu'yuc boch'o sna'be smelol, me junuc mu'yuc boch'o tsa' li Diose. 12Scotolic ch'ayemic ta be, bolibenic o ta j'ech'el. Mu'yuc boch'o lec c'usi tspas, me junuc solel mu'yuc o. 13Li snuq'uique xco'laj xchi'uc muquinaltic ti jamal sti'e. Li yoq'uique ja' chtun yu'unic sventa chlo'lavanic. Oy veneno ta yeic jech chac c'u cha'al orachon. 14Li yeique nojem ta puru chopol c'op; toj c'uxic li c'usitic chalique. 15Li yacanique chbat ta anil, chbat milvanuc. 16Buyuc no'ox chbatic, puru soquesvanej, puru vocol chaq'uic. 17Me jutuc mu xotquinbeic sbelal li jun o'ntonale. 18Mu'yuc xi'bal sba cha'yic li Diose”, xi ts'ibabil. 19Scotol c'usi chal li smantaltac Diose ta jna'tic ti ja' sc'oplalic li boch'otic oy ta sc'obic li smantaltac Diose, yu'un jech macal ac'o c'otuc yeic scotolic, jech ac'o sna'ic ti scotol cristiano ta banamil chich'ic chapanbel smulic yu'un Diose. 20Yu'un ta sventa xch'unel li mantaletique mu xu' tuc' co'ntontic chijyilutic o li Diose. Yu'un li mantaletic ac'bilutique ja' no'ox sventa ac'o quiltic ti oy jmultique. 21Li' ta orae laj xa yac' ta ilel ti muc ja'uc ta sventa mantaletic xu' tuc' co'ntontic chijyilutic li Diose. Lec jamal chvinaj ta smantaltac Dios xchi'uc ta svunic li yaj'alc'optac Diose. 22Ti c'u x'elan tuc' co'ntontic chijyilutic Diose ja' no'ox ta sventa ta jch'untic li Jesucristoe. Boch'ouc no'ox mu'yuc smul ch-ilatic yu'un Dios me jech ta xch'unique. 23Yu'un scotol cristiano jpasmuliletic, bats'i nom oy ta stojolic slequilal li Diose. 24Pero ta sventa ti toj lec yo'nton li Diose, jech ta matanal ti mu'yuc xa jmultic chijyilutic ta sventa ti la stojbutic jmultic li Jesucristoe. 25Yu'un li Diose ja' laj yac'be smal xch'ich'al li Jesucristoe, jech ic'ot ta jch'aymulil ta sventa li boch'otic ta xch'unique. Jech ivinaj ti tuc' yo'nton li Diose, yu'un te la sts'icbe smul li cristianoetic ta poco' vo'onee, 26yu'un toj ep smuc'ul yo'nton. Ivinaj xa ti toj tuc' yo'ntone, xchi'uc ti jech tuc' yo'nton chil ec li boch'otic ta xch'unic li Jesuse. 27Ja' yu'un li' ta orae, ¿me xu' to ta jtoy jbatic? ¡Mu'yuc xa! ¿C'u yu'un? ¿Me ja' ta sventa ti yu'un ich'un cu'untic li smantaltac Diose? ¡Mo'oj! Ja' no'ox ta sventa ta jch'untic li Cajvaltique. 28Ja' yu'un jech ic'ot ta loq'uel cu'untic chac li'i: Li cristianoetique tuc' yo'nton ch-ilatic yu'un Dios ta sventa xch'unojel yo'ntonic, ma'uc ta sventa yu'un xu' yu'unic xch'unel li smantaltac Diose. 29Li Diose ¿me ja' no'ox Dios yu'un li judioetique? ¿Me mu ja'uc Dios yu'unic ec li yanlum cristianoetique? Ta melel ja' Dios yu'unic ec li yanlum cristianoetique. 30Yu'un li Diose jun no'ox. Ja' no'ox stuc chac' ti xu' mu'yuc smul chc'otic ta sventa xch'unojel yo'ntonic li boch'otic yich'ojic circuncisione, xchi'uc li boch'otic mu'yuc yich'ojic circuncisione. 31Li' ta orae, ¿me xu' ta jnoptic ti ac'o jlajesbetic sc'oplal c'usi chal smantaltac Dios ta sventa li xch'unojel co'ntontique? ¡Mo'oj! Ja' to jech xu' ta xc'ot ta pasel cu'untic c'usi chal li smantal Diose.


Copyright
Learn More

will be added

X\