Romanos 2

1Ja' yu'un mu'yuc c'usi xu' chapoj aba o, vo'ot ti chatic'be smul yane, c'uuc xa'elan. Yu'un ti c'alal chatic'be smul yane, vo'ot chatic' amul atuc. Yu'un jchapanvanejot chacuy aba, pero ja' jech avochel spasel atuc ec. 2Li Diose ta jna'tic ti tuc' chapanel chac' ta stojol li boch'otic jech tspasic chac le'e. 3Vo'ot ti chatic'be smul li boch'o jech tspas ti ja' jech chapas atuc eq'ue, ¿me chanop ti vo'ot chacol ta chapanel yu'un Diose? 4¿Me yu'un mu xava'ibe smelol li c'uxubinel yu'un Diose, li smuc'ul yo'ntone, xchi'uc li slequil yo'ntone? Na'o me, ta sventa toj lec yo'nton ti tsc'an ac'o asutes avo'ntone. 5Ta scoj toj tsots avo'nton, ta scoj mu'yuc sutem avo'nton, ja' yu'un ja' no'ox avochel stsobel stojol amul c'alal tsta yorail chac' tuq'uil chapanel li Diose. 6Yu'un ja' jech stojol chac'be jujun cristiano ti c'u x'elan la spasique. 7Li boch'o ja' tspasilanic o c'usitic leque, ti ja' no'ox oy ta yo'nton tsa'ic slequilal yutsilalique xchi'uc li c'usi mu sna' xc'a'e, ja' ch-ac'batic xcuxlejalic sventa sbatel osil. 8Yan li boch'o ja' no'ox batem ta yo'ntonic spasel c'usi tsc'an yo'nton stuquique, ti mu xch'unic li c'usi melele, ti ja' no'ox tspasic o li c'usitic mu'yuc tuq'ue, le'e ja' ilintabilic; ja' ch-ac'bat stoj smulic yu'un Dios. 9Ta xa'ay lec svocolic; puru at-o'nton cha'yic li boch'otic ja' no'ox tspasilanic c'usitic chopole. Ja' ba'yuc ta xich' li israeletique, jech ta xich'ic ec li yanlum cristianoetique. 10Pero li boch'otic lec c'usitic ta spasique tsta slequilalic, lec sc'oplalic, xchi'uc tsta jun yo'ntonic. Ja' ba'yuc tstaic li israeletique, jech tstaic ec li yanlum cristianoetique. 11Yu'un li Diose muc t'ujbiluc no'ox tspas. 12Yu'un li boch'otic tsa' smulic ti mu'yuc ya'yojic smantaltac Diose, mu ja'uc ta sventa mantal ti ch'ayel chbatique. Yan li boch'otic tsa' smulic ti ya'yojic smantaltac Diose, ja' ta sventa mantaletic chich'ic chapanbel smulic. 13Yu'un ma'uc ta sventa boch'o cha'yilanbe smantal Dios ti lec ch-ilat yu'un Diose. Ja' lec ch-ilat yu'un Dios li boch'o chch'un c'usi chal li mantaletique. 14Yu'un li yanlum cristianoetic ti mu'yuc ya'yojic smantaltac Diose, ja' oy tspasic ta stalelic no'ox jech chac c'u cha'al chal li smantaltac Diose. Ac'o me mu'yuc yich'oj ta sc'obic, pero oy lec mantal ta yo'ntonic. 15Ta sventa c'usi tspasic chvinaj ti oy lec mantal ts'unbil ta yo'ntonique. Yu'un li sjol yo'ntonique sna' lec ti c'u x'elan yabtelique. Xu' ch-albatic yu'un sjolic me oy smulic, o me mu'yuc smulic. 16Pero c'alal tsta yorail yu'un Dios ta xchapan scotol cristianoetic ta sventa li Jesucristoe, scotol ta xac' ta ilel, ac'o me ta mucul pasbil, yu'un ja' jech chal li Lequil A'yej ta jchole. 17A'yo ava'yic, vo'oxuc ti abiinojic Judioe, ti ja' apatoj avo'ntonic yu'un li smantaltac Dios avich'ojique. Atuc no'ox xava'ay abaic ta stojol li Diose. 18Chanopic ti lec xana'ic c'usi tsc'an Diose, xchi'uc ti lec xana'ic st'ujel c'usi lec ta sventa ti achanojic li mantaletique. 19Vo'oxuc xa chavac'beic yil be ma'satetic acuyoj abaic, xchi'uc vo'oxuc xa luz c'otemoxuc chava'yic yu'un li boch'otic oyic ta ic' osile. 20Vo'oxuc xa jbijubtasvanejoxuc acuyoj abaic yu'un li boch'otic mu'yuc bijique. Vo'oxuc xa jchanubtasvanejoxuc acuyoj abaic yu'un li boch'otic xco'laj xchi'uc ololic toe, yu'un vo'oxuc oy ta ac'obic li smantal Dios ti ja' sventa chijbijubutic yu'une, ti ja' sventa ta jna'tic o c'usitic melele. 21Me ta melel vo'oxuc jchanubtasvanejoxuque, ¿c'u yu'un mu xachanubtas aba atuquic? C'alal chacholic sc'op Diose, chavalic ti mu xu' chij'elc'aje, pero avochelic elec' atuquic. 22Chavalic ti mu xu' chijmulivajutique, pero chamulivaj atuquic. Toj chopol chavilic li c'usitic cuybilic ta diosetique, pero ta to xavelc'anbeic tal c'usitic oy yu'unic te ta sna li sloc'obal diosetique. 23Altic chatoy abaic ta sventa ti vo'oxuc avich'ojbeic li smantaltac Diose. Ta sventa ti mu xach'unbeic li smantaltac Diose, mu'yuc avich'ojic o ta muc' li Diose. 24Ja' yu'un jech ts'ibabil ta sc'op Dios: “Vo'oxuc ta acojic ti chixchopolc'optabicun jbi li yanlum cristianoetique”, xi ts'ibabil. 25Ta melel li circuncisión quich'ojtique, oy stu me ta jch'untic li smantaltac Diose. Pero me vo'ot jbajmantalote, li circuncisión avich'oje mu'yuc stu chc'ot. 26Yan li boch'o mu'yuc yich'oj circuncisione, me ja' tspas jech chac c'u cha'al chal li smantaltac Diose, ja' yich'oj circuncisión chc'ot. 27Ja' yu'un li boch'o mu'yuc yich'oj circuncisión ta sba sbec'tale, pero me ja' ta xch'unbe lec li smantaltac Diose, ja' chastic'bot amul, yu'un avich'ojbe lec svunal ta ac'ob li smantal Diose, xchi'uc avich'oj circuncisión ta abec'tal noxtoc, pero mu xach'un. 28Yu'un ma'uc mero sts'unubal Judío chijc'ot ta sventa jbec'taltic xchi'uc ta sventa ti quich'ojtic circuncisión ta sba jbec'taltique. 29Ja' mero Judío chijc'ot ta sventa c'u x'elan li yut co'ntontique. Li mero circuncisión quich'ojtic chc'ote ja' ta yut co'ntontic, ja' ta sventa svu'el Dios; ma'uc ta sventa ti ts'ibabil xa lec ta vun quich'ojtic li smantaltac Diose. Li boch'o jech chac le'e ja' lec ch-ilat yu'un Dios; ma'uc lec ch-ilat yu'un cristianoetic.


Copyright
Learn More

will be added

X\