Romanos 16

1Chacalboxuc ava'yic ti tsc'an chavich'ic ta muc' li jch'unolajel ants Febe c'alal me ic'ot ta atojolique. Le'e ja' yajcoltaubbail jcholc'opetic ta stojol li steclumal Cristo ta lum Cencreae. 2Ich'ic me ta muc' ta sventa li Cajvaltique, yu'un tsc'an jech ta jpasbe jbatic vu'utic li yu'untacutic Diose. Xchi'uc tsc'an chacoltaic ta sventa c'usi chtun yu'un, yu'un ep xa boch'o la scolta, xchi'uc ep la scoltaun ec. 3Chabanuc xavalbeic li Priscila xchi'uc Aquilae, yu'un ja' jchi'iltac ta abtel ta sventa li Cristo Jesuse. 4Yu'un li stuquique solel laj yac' sbec'talic o ta jtojol. Muc jtucuc no'ox ta jtojbeic ta vocol ti jech la spasbicune; ta jna' ti jech tsc'an tstojbeic ta vocol scotolic ec li steclumal Cristo ti yan o slumalique. 5Chabanuc xavalbeic noxtoc li jch'unolajeletic ti te tstsob sbaic ta sna Aquilae. Chabanuc xavalbeic li Epenetoe, ja' ti lec la jc'an jba jchi'uque, ja' li sba sts'unub Cristo ta Asia banamile. 6Chabanuc xavalbeic li Mariae, ja' ti ep xa itun yu'un Dios te ta atojolique. 7Chabanuc xavalbeic li chib jchi'iltaque, ja' li Andronicoe xchi'uc li Juniase, ja' ti co'ol li'ochcutic ta chuquel jchi'uque. Le'e lec ilbil yabtelic yu'un li yajtacbolaltac Jesuse. Ja' ba'yuc la xch'unic Cristo; ts'acal to la jch'un li vu'une. 8Chabanuc xavalbeic li Ampliase, ja' ti lec la jc'an jbacutic ta sventa Cajvaltique. 9Chabanuc xavalbeic li Urbanoe, ja' li jchi'il ta abtel ta sventa Cristoe. Chabanuc xavalbeic li Estaquise, ja' ti lec jc'anoj jba jchi'uque. 10Chabanuc xavalbeic li Apelese, ja' ti laj xa yac' lec ta ilel ti ta melel jun yo'nton xch'unoj Cajvaltique. Chabanuc xavalbeic li boch'otic te oyic ta sna Aristobuloe. 11Chabanuc xavalbeic li Herodione, ja' li jvinquilale. Chabanuc xavalbeic li boch'otic te oyic ta sna Narcíso ti xch'unojic Cajvaltique. 12Chabanuc xavalbeic li Triféna xchi'uc Trifosae, ja' ti co'ol chtunic yu'un Cajvaltique. Chabanuc xavalbeic noxtoc li jch'unolajel ants Pérsida ti lec c'anbil cu'untique, ti ep xa itun yu'un Cajvaltique. 13Chabanuc xavalbeic li Rúfo ti t'ujbil yu'un Cajvaltique. Chabanuc xavalbeic noxtoc li sme'e; ja' jme' c'otem ya'yel ec li vu'une. 14Chabanuc xavalbeic li Asincritoe, xchi'uc li Flegontee, xchi'uc li Hermese, xchi'uc li Patrobase, xchi'uc li Hermase, xchi'uc li yan jch'unolajeletic te xchi'uquique. 15Chabanuc xavalbeic li Filologoe xchi'uc li Juliae, xchi'uc li Nereoe xchi'uc li xvixe, xchi'uc li Olimpase, xchi'uc scotol li yu'untac Dios ti te jmoj tstsob sba xchi'uquique. 16Te tsacbo aba ac'obic ta sventa ti lec ac'anoj abaique. Chabanuc xayalboxuc tal li steclumal Cristo buyuc no'ox ta stsob sbaique. 17Quermanotac, avocolicuc bijanic me yu'un li boch'otic te achi'uquic ti ja' no'ox tsliquesic voc'baile, xchi'uc ti tsoques avo'ntonic ta sventa li c'usi ach'unojic xae. Voc'o me abaic ta stojolic le'e. 18Yu'un li boch'otic jech tspasique ma'uc yabtel Cajvaltic Jesucristo tspasbeic. Ja' no'ox tspasic c'usi tsc'an yo'nton stuquic. Jech tslo'laic ta sventa sc'opic li boch'otic mu'yuc to stsatsal yo'ntonique, yu'un toj lec ya'yel li c'usitic chalique. 19Yu'un li vo'oxuque vinajem ac'oplalic ta buyuc no'ox ti lec xach'unic mantale, jech xcuxet no'ox co'nton avu'unic. Pero ja' me bijanic ta sventa li c'usi lec ta ch'unele. Mu me ja'uc bijoxuc ta sventa li c'usi chopole. 20Li Dios ti chac' jun co'ntontique ja' ta xpech'boxuc ta teq'uel li banquilal pucuje, chayac'boxuc ta yolon avacanic. Ac'o xc'uxubinoxuc o acotolic li Cajvaltic Jesucristoe. 21Chabanuc la xayalboxuc tal li Timoteoe, ja' li jchi'il ta abtele. Chabanuc la xayalboxuc tal noxtoc li oxib jchi'iltaque, ja' li Lucioe, li Jasone, xchi'uc li Sosipatere. 22Vu'un li Tercioun ti la jts'ibabe li scarta Pablo li'i, chabanuc chacalboxuc tal ec ta sventa li Cajvaltique. 23Chabanuc la xayalboxuc tal li Gayoe, ja' ti li' oyun ta snae, xchi'uc ti li' ta jtsob jbacutic ta sna xchi'uc scotol li jch'unolajeletique. Chabanuc xayalboxuc tal li Erastoe, ja' li jchabitaq'uin li' ta lume. Chabanuc la xayalboxuc tal li quermanotic Cuartoe. 25Ac'o ich'atuc ta muc' li Dios ti ech'em stsatsale, ti xu' yu'un ta stsatsubtasboxuc avo'ntonic jech chac c'u cha'al chal li Lequil A'yej ta jchole, ja' li sc'oplal Cajvaltic Jesucristoe. Yu'un jech ono'ox chapal yu'un Dios ta sliquebal ti mu'yuc to'ox boch'o la sna'e. 26Pero li' ta orae laj xa yich' na'el ta sventa li c'usi ts'ibabil comel yu'un yaj'alc'optac Dios ta vo'onee, yu'un jech smantal stuc li Dios ti cuxul o sbatel osile. Laj xa yich' ac'bel sna' scotol cristianoetic ta jujun banamil, yu'un jech ac'o xch'unic. 27Ja' yu'un stuc no'ox ac'o ich'atuc ta muc' sbatel osil ta sventa Jesucristo li Dios ti jun no'oxe, ti ech'em sbijile. Jechuc.


Copyright
Learn More

will be added

X\