Romanos 14

1Iq'uic me li boch'otic mu'yuc to stsatsal yo'ntonic ta stojol Diose, pero mu me c'usi xavalilanbeic. 2Yu'un oy boch'o xch'unoj ti xu' tsve' scotol c'usiuc no'ox ve'lilale. Pero li boch'otic mu'yuc to stsatsal yo'ntonique ja' no'ox tslo'ic itajetic. 3Ja' yu'un li boch'o scotol tsve'e mu me slaban li boch'o mu sve'e. Li boch'o mu scotoluc tsve'e mu me sa'be smul li boch'o scotol tsve'e, yu'un ic'bil yu'un Dios ec. 4¿C'usi avabtel vo'ot ti chatic'be smul yane, yu'un muc vo'ocot yajvalot? Ja' chal stuc yajval me va'al chcom, o me chyal ta lum. Pero va'al chcom, yu'un li yajvale oy svu'el; xu' tsva'an lec. 5Oy jch'unolajeletic ti oy bu jun c'ac'al tsots sc'oplal cha'yique. Pero oy yantic ti co'ol no'ox sba cha'yic scotole. Jech tsc'an jujun ac'o spas li c'usi chch'une. 6Li boch'o xch'unoj ti oy jun c'ac'al tsots sc'oplal cha'ye ja' ta sventa Cajvaltic tspas. Li boch'o scotol tsve'e ja' ta sventa Cajvaltic tsve', yu'un tstojbe ta vocol li Diose. Li boch'o mu scotoluc tsve'e ja' ta sventa Cajvaltic ti mu sve'e, yu'un tstojbe ta vocol Dios noxtoc. 7Yu'un mu'yuc boch'o cuxul ta stuc no'ox; mu'yuc boch'o chcham ta stuc no'ox. 8Me cuxulutique, cuxulutic ta sventa ch-ich'at ta muc' li Cajvaltique. Me chijchamutique, chijchamutic ta sventa ch-ich'at ta muc' li Cajvaltique. Ja' yu'un me cuxulutic, o me chijchamutique, yu'unutic o li Cajvaltique. 9Ja' yu'un ti icham li Cristoe xchi'uc ti icha'cuxie, yu'un jech ja' Yajval chc'ot scotol, ac'o me chamenic xa, o me cuxulutic to. 10Ja' yu'un li vo'ote, ¿c'u yu'un chasa'be smul li achi'ile? Jech ec li vo'ote, ¿c'u yu'un chabaj li achi'ile? Yu'un ta jujuntal chc'ot jva'an jbatic ta stojol Cristo yo' bu ta xchapanvane. 11Yu'un jech ono'ox ts'ibabil ta sc'op Dios: “Jech yaloj li Diose: ‘Ta jbi jtuc ta xcal ta jamal, scotol cristianoetic chlic squejan sbaic ta jtojol. Ta scotol jaychop c'opetic ta xlic yalbicun ta jamal jbi scotolic’, xi li Diose”, xi ts'ibabil. 12Ja' yu'un jujunutic chc'ot caltic ta stojol Dios ti c'u x'elan la jpastique. 13Ja' yu'un mu xa me jsa'be jba jmultic. Ja' no'ox jsa'tic li c'usi ma'uc sventa tsbosi yacan, ma'uc sventa chyal o ta lum cu'untic li jchi'iltique. 14Li vu'une jna'oj lec, jch'unoj lec ta sventa Cajvaltic Jesús ti mu'yuc ve'lil chopol ta stuc no'oxe. Ja' no'ox li boch'o tsnop ti chopole ja' chopol chc'ot ta sventa stuc. 15Pero me ta scoj no'ox ave'el chavac'be slo'il yo'nton achi'ile, muc xa ja'uc sventa c'anvanej li c'usi chapase. Mu me ta scojuc no'ox ave'el xavac' ch'ayuc li boch'o laj yac' sba ta milel Cristo ta scoje. 16Ja' yu'un mu me xavaq'uic ta chopolc'optael li alequilal ataojique. 17Yu'un li ventainel chac' Diose ma'uc te chvinaj ta sventa c'usi ta jve'tic, c'usi ta xcuch'tic. Ja' chvinaj ta sventa ti tuc' c'usi ta jpastique, ti jun co'ntontique, ti xcuxet no'ox co'ntontic ta sventa li Ch'ul Espiritue. 18Li boch'o jech tspas ta sventa Cristoe lec sc'oplal yu'un Dios, lec sc'oplal yu'un cristianoetic noxtoc. 19Ja' yu'un, ja' ac'o jpastic o batel li c'usi sventa lec jun co'nton jcotoltique, xchi'uc li c'usi ja' sventa chijtsatsubutic yu'une. 20Mu me xasoquesbe yabtel Dios ta sventa no'ox ve'lil. Scotol li ve'lile ta melel lec scotol. Li c'usi chopole ja' ti c'alal oy boch'o chac' chibajuc yo'nton ta sventa c'usi tsve'e. 21Ja' lec mu xati'ic ti'bol, mu xavuch'ic ya'lel ts'usub, mu xatunic o li c'usi ja' te chchibaj yo'nton; ja' te tsoc yo'nton avu'unic li yantique. 22Me jech ach'unoj vo'ot ti mu'yuc chopole, jech ch'uno atuc ta stojol Dios. Yu'un ja' xcuxet no'ox yo'nton li boch'o muc teuc tsta o smul ta sventa c'usi xch'unoje. 23Pero me oy boch'o chlo'ilaj yo'nton ta sventa li c'usi tsve'e, ta ono'ox sta o smul. Yu'un muc ja'uc tspas li c'usi xch'unoje. Yu'un me mu ja'uc ta jpastic li c'usi jch'unojtique ja' mulil.


Copyright
Learn More

will be added

X\