Romanos 10

1Quermanotac, ta melel jech co'nton ta jc'an ac'o colicuc li jchi'iltac ta israelale. Ja' yu'un ta jc'opanbe Dios ta stojolic. 2Quiloj ti scotol yo'nton tsc'an chtunic yu'un Diose, pero mu sna'beic smelol c'u x'elan xu' chtunic yu'un. 3Yu'un mu xa'ibeic smelol c'u x'elan xu' mu'yuc jmultic chijyilutic li Diose. Ja' no'ox batem ta yo'ntonic ti ta sventa c'usi tspas stuquic ti jech xu' tuc' yo'nton ch-ilatic yu'un Diose. Jech mu xch'unic o ti c'u x'elan tuc' co'ntontic chijyilutic Diose. 4Yu'un li sts'aquieb mantaletique ja' stuc li Cristoe; ja' ta sventa tuc' yo'nton ch-ilatic yu'un Dios li boch'otic ta xch'unique. 5Yu'un me ja' ta sventa mantal tuc' co'ntontic chijyilutic Diose, ja' jech ts'ibabil sc'oplal yu'un Moisés chac li'i: “Li boch'o ta xch'un yu'une ja' ta xcuxi ta sventa li mantaletique”, xi. 6Yan li boch'o tuc' yo'nton ch-ilat yu'un Dios ta sventa xch'unojel yo'ntone, jech ts'ibabil sc'oplal: “Mu me jechuc xlic avalic: ‘¿Boch'o xu' chmuy batel ta vinajel yu'un chbat yic' yalel tal li Cristoe?’ 7‘¿Boch'o xu' chyal batel ta yolon banamil yu'un chbat yic' muyel tal ta muquinal li Cristoe?’ mu me xachiic”, xi. 8Ja' xa jech ts'ibabil sc'oplal chac li'i: “Li sc'ope te nopol oy ta atojolic; te oy ta aveic, te oy ta avo'ntonic”, xi. Ja' jech chal li c'op ta jcholcutic ti ac'o yich' ch'unele. 9Yu'un me chloc' ta ave ti ja' Avajval li Jesuse, xchi'uc me chach'un ta avo'nton ti icha'cuxesat yu'un Diose, chacol sbatel osil. 10Yu'un ta co'ntontic tsc'an ta jch'untic ti jech xu' tuc' co'ntontic chijyilutic Diose. Xchi'uc tsc'an chloc' ta quetic ta jamal ti jech xu' chijcolutique. 11Yu'un jech ts'ibabil ta sc'op Dios: “Scotol li boch'otic ta xich'ic ta muq'ue, mu xyalic ta q'uexlal”, xi. 12Muc t'ujbiluc no'ox boch'o sc'oplal, ac'o me israel, o me yanlum cristiano. Yu'un jun no'ox Cajvaltic jcotoltic. Bats'i ep c'uxubinel ch-ac'batic scotol li boch'o tsc'anbeic vocole. 13Yu'un jech ts'ibabil: “Scotol li boch'otic tsc'anbeic vocol Cajvaltique ja' ta xcolic”, xi ts'ibabil. 14Pero ¿c'u x'elan xu' tsc'anbeic vocol me mu'yuc xch'unojique? ¿C'u x'elan xu' chch'unic me mu'yuc ya'yojbeic sc'oplale? ¿C'u x'elan xu' cha'ibeic sc'oplal me mu'yuc boch'o chcholbat ya'yique? 15¿C'u x'elan xu' yu'un chbat xcholic me mu tacbilicuc batele? Yu'un jech ts'ibabil ta sc'op Dios: “Toj c'upil sba yacan chanovic batel li boch'o chbat xcholic Lequil A'yeje”, xi ts'ibabil. 16Pero mu scotoluc chch'unic li Lequil A'yeje. Jech chac c'u cha'al laj yal li Isaías ta vo'onee: “Cajval, ¿boch'o chch'un li c'usi chcalcutic batele?”, xi. 17Jech chvinaj ti tsc'an chca'itic ba'yuc ti jech xu' ta jch'untique. Li c'usi tsc'an chca'itique ja' li sc'op Cristoe. 18Jech ta jac' li vu'une: ¿Me yu'un mu'yuc ya'yojbeic sc'op li Cristoe? Ya'yojic xa. Yu'un jech ono'ox ts'ibabil ta sc'op Dios: “Li sc'opique puquem batel ta sbejel banamil; c'otem c'alal to ta sti'iltac banamil li c'usi chalique”, xi ts'ibabil. 19Jech ta jac' noxtoc: ¿Me yu'un mu'yuc xa'yic c'usi chc'ot ta pasel me mu xch'unic li israeletique? Ya'yojic. Yu'un ba'yuc ono'ox jech laj yal li Moisese: “Ta xcac' it'ixajuc yo'ntonic, yu'un ja' ta xlic quic' li boch'otic muc ja'uc jteclumale; ta xcac' ilinicuc, yu'un ja' ta xquic' li boch'otic bol cristianoetic ch-ilatique”, xi ono'ox li Moisese. 20Ts'acal to li Isaiase ja' solel lec jamal laj yal: “Li boch'o mu'yuc ono'ox ta yo'nton chisa'icune, ja' la staicun. Li boch'o mu'yuc ono'ox ta yo'nton tsjac'bicun jc'oplale, laj xa cac' jba ta ilel ta stojolic”, xi. 21Ta sventa li Israele jech laj yal noxtoc: “Scotol c'ac'al te jbechoj o jc'ob chquic' li jbajmantal, li jtacchiquin cristianoetique”, xi.


Copyright
Learn More

will be added

X\