Romanos 1

1Vu'un Pabloun, vu'un yajtunelun li Jesucristoe. Ic'bilun sventa li'och ta yajtacbolal. Voc'bilun o ta xcholel li Lequil A'yej ta sventa Diose. 2Ja' li c'usi vo'one ono'ox yaloj Dios ta sventa yaj'alc'optac ti ts'ibabil icom ta xch'ul vune. 3Ja' sc'oplal li Xnich'one, ja' li Cajvaltic Jesucristo ti i'ay yich' sbec'tale, jech smomnich'on David ic'ot. 4Pero ivinaj ti ta melel ja' Xnich'on Diose, yu'un oy svu'el, yich'ojbe stalel Dios, xchi'uc icha'cuxi loq'uel ta smuquinal. 5Ja' li boch'o ta slequil no'ox yo'nton laj yic'uncutic ta yajtacbolal, yu'un jech xu' chlic xch'unic Cajvaltic li yanlum cristianoetique, jech ich'bil ta muc' chc'ot. 6Te oy ac'oplalic ec li vo'oxuque, ja' yu'un laj yic'oxuc ta stojol li Jesucristoe, 7vo'oxuc ti te nacaloxuc ta Roma ti c'anbiloxuc yu'un Diose, ti laj yic'oxuc yu'un jech voc'bil chacomic yu'une. Ac'o xc'uxubinoxuc, ac'o yac'boxuc jun avo'ntonic li Jtotic Diose xchi'uc li Cajvaltic Jesucristoe. 8Ba'yuc ono'ox ta jtojbe ta vocol Dios ta sventa Jesucristo ti oy lec xch'unojel avo'ntonique, yu'un vinajem ac'oplalic ta sbejel li banamile. 9Ta melel scotol ora ta jc'opan Dios ta atojolic. Yiloj Dios ti jech ta jpase, ja' li Dios ti chitun yu'un ta scotol co'ntone, ti ta jcholbe sc'oplal li Lequil A'yej ta sventa Xnich'one. 10Scotol c'ac'al ta jc'anbe vocol ti jechuc tsc'an ti chtal jq'ueloxuque, ti lecuc chic'ot te ta atojolique. 11Yu'un toj chac tal jq'ueloxuc ca'ay, ta jc'an chtal calboxuc li c'usi yac'ojbun jna' Dios sventa tstsatsub o avo'ntonique, yu'un jech lec jun avo'nton chacomic o ta stojol Dios. 12Jech co'ol chijtsatsub lec ta xch'unel li Jesucristoe, yu'un co'ol lec jch'unojtique; chquil ti lec ach'unojique, jech chavilic ec ti lec jch'unoje. 13Quermanotac, ta jc'an chana'ic ti ta melel ep xa ta velta chac tal jq'ueloxuc ca'ye, pero yoquel to macalun ta be. Yu'un ta jc'an ta jtulbe sat cabtel te ta atojolic noxtoc jech chac c'u cha'al ta jpas ta stojol li yan jch'unolajeletic ti co'ol yanlumoxuc achi'uquique. 14Yu'un quechel quil chca'ay ta stojol boch'ouc no'ox, me bijic, o me muc bijicuc, me sna'ic vun, o me mu sna'ic vun. 15Ja' yu'un ti oy ta co'nton chtal jcholboxuc Lequil A'yej ec, vo'oxuc ti te nacaloxuc ta Romae. 16Yu'un mu xiq'uexov ta xcholel li Lequil A'yeje, yu'un ja' stsatsal Dios. Ja' sventa chcol scotol li boch'ouc no'ox ta xch'unique. Ba'yuc ivul ta stojol li israeletique; ja'o ic'ot ta atojolic ec vo'oxuc li yanlum cristianooxuque. 17Yu'un ja' ta sventa Lequil A'yej chac' quiltic ti ja' no'ox ta sventa xch'unojel co'ntontic xu' tuc' co'ntontic chijyilutic Diose. Yu'un jech ts'ibabil ta sc'op Dios: “Li boch'o tuc' yo'nton chquil ta sventa xch'unojel yo'ntone ja' ta xcuxi”, xi ts'ibabil. 18Yu'un lec xvinaj ti ch-ilin tal Dios ta vinajel ta scoj smulic, ta scoj xchopolilic li cristianoetic ti tsc'an tsmaquic ta be c'usi melel ta scoj li xchopolilique. 19Yu'un ti c'u x'elan xu' ta jna'tic ti oy li Diose, ti lec xvinaje, yu'un ja' Dios yac'oj lec ta ilel stuc. 20Yu'un ja'o no'ox c'alal imeltsaj banamil laj yac' ta ilel li c'usi mu'yuc to'ox yac'oj ta ilele, ja' li svu'el ti mu'yuc slajebe, ti ja' ch'ul Dios stuque. Ta sventa c'usitic spasoj, jech ivinaj ti ja' Diose. Jech mu'yuc c'usi xu' tspoj sbaic o li cristianoetique. 21Yu'un la sna'ic ti oy Diose, pero muc xich'ic ta muc' jech chac c'u cha'al Dios; mu'yuc bu la stojbeic ta vocol. Solel mu'yuc stu li c'usi la snopique. Icomic ta ic' osil ta scoj li sbolilique. 22La scuyic ti lec bijique, pero bol cristiano ic'otic. 23Li Dios ti ech'em slequilal yutsilale, ti mu sna' xchame, la sc'atajesic ta sloc'obal cristiano ti sna' xchame, xchi'uc ta sloc'obal mut, ta sloc'obal c'usi xcotlajetic ta banamil, xchi'uc ta sloc'obal chonetic ti xquilet ta banamil chanovique. 24Ja' yu'un li Diose laj yac'be spasic o li c'usitic chopol tsc'an yo'ntonique, lic spasic o puru mulivajel. Toj q'uexlal sba li c'usi lic spasbe sbec'talique. 25Yu'un li Dios ti ja' melele, la sjelic ta c'usi mu meleluc. Ja' laj yich'ic ta muc'; ja' itunic yu'un li c'usitic pasbil yu'un Diose. Muc ja'uc laj yich'ic ta muc' stuc li Boch'o la spas scotole, ti ja' ich'bil ta muc' sbatel osile. Jechuc. 26Ja' yu'un li Diose laj yac'be spasic o li c'usi tsc'an yo'ntonic ti toj q'uexlal sbae. C'alal ta antsetic la sjelic c'u x'elan li stalelique, ja' la spas xchi'uc sbec'talic li c'usi mu jechuc sc'oplal ta pasele. 27Ja' no'ox jech ec li viniquetique muc xa ja'uc la xchi'in sbaic xchi'uc li antsetique. Ja' laj yac'beic yipal spasel li c'usi lec laj ya'ay sbec'talique. Xchi'il no'ox sbaic ta vinical la spasic li c'usi toj q'uexlal sbae. Jech laj yich'beic stojol ta sbec'talic li c'usi chopol la spasique. 28Ta sventa ti muc xich'ic ta muc' c'u x'elan xu' chcotquintic o li Diose, jech i'ac'bat snopic o yu'un Dios li c'usitic mu'yuc stue, yu'un jech ac'o spasic o li c'usi mu jechuc sc'oplal ta pasele. 29Jech inoj ta yo'ntonic scotol c'usi mu'yuc tuc', c'usi chopol, xpich'etel o'ntonal, muliletic, ti'etel o'ntonal, milvanej, sa'c'op, lo'lavanej, soquesej o'ntonal, lo'iltavanej, 30j'ac'vanej ta q'uexlal, scontrainel Dios, stuc no'ox yac'oj sbaic, jtoybaetic, snopel c'usitic yan chopol ta pasel. Mu xch'unbeic smantal stot sme'ic; 31mu'yuc c'usi sna'ic o, mu xc'ot ta pasel c'usi chalic. Mu'yuc c'uxubinel ta yo'ntonic, mu'yuc perdón yu'unic, mu'yuc boch'o abul sba chilic. 32Ac'o me sna'ic ti yaloj Dios ch'ayel chbatic li boch'otic jech tspasique, pero te ono'ox tspasilanic o. Ma'uc no'ox ti te tspasilanic oe; ja' to toj lec cha'yic me oy boch'o yan jech chchanic spasel eq'ue.


Copyright
Learn More

will be added

X\