Apocalipsis 14

1Ts'acal laj quil te oy ta jol vits Sión li Ch'ium Chije. Te xchi'uc chanib xvaxacvinic ta mil (144,000) cristianoetic, ja' li boch'otic ts'ibabil ta sti'baic sbi li Ch'ium Chije xchi'uc sbi li Stote. 2Laj ca'ay oy c'usi tsots chbac' ta vinajel, xco'laj xchi'uc xbac' nojelal uc'um, xco'laj xchi'uc yech'al tsatsal chauc, xco'laj xchi'uc chich' tijel epal arpaetic. 3Tsq'uejintaic jun ach' q'ueoj te yo' bu chotol li Diose, xchi'uc ta stojol li chanibique, xchi'uc ta stojol li chanib xcha'vinic (24) banquilaletique. Mu'yuc boch'o yan xu' chchan li q'ueoje. Ja' no'ox stuc xchanojic li chanib xvaxacvinic ta mil (144,000) icolic loq'uel ta stojol cristianoetic li' ta banamile. 4Le'e ja' li boch'otic muc soques sbaic ta sventa antsetique, ti co'olic jech chac c'u cha'al tojol queremetique. Ja' chchi'inic batel li Ch'ium Chij ti buyuc no'ox chbate. Yu'un icoltaatic xa loq'uel ta stojol li cristianoetique, ja' jech ic'otic ta stojol Dios xchi'uc ta stojol Ch'ium Chij jech chac c'u cha'al li sba sat c'usi chich' aq'uel ta smoton Diose. 5Me jutuc mu'yuc xtabat yepalc'opic, me jutuc mu'yuc yic'ubalic. 6Ts'acal laj quil yan j'almantal te xvilet ta toyol ta vinajel. Ja' te yich'oj li Lequil A'yej sventa sbatel osil, yu'un ja' chcholbe scotol jnaclumetic ta jujun banamil, ta jujuchop sts'unubalic, ta jujuchop c'op, xchi'uc ta jujun lum. 7Tsots ic'opoj jech laj yal: “Xi'anic me yu'un li Diose; albeic slequilal. Yu'un laj xa sta yorail chchapanvan. Ich'ic me ta muc', yu'un ja' la spas li vinajel banamile, xchi'uc li nabetique, xchi'uc scotol li nio'etique”, xi. 8Ital chi'inatuc yu'un xchibal j'almantal, jech c'ot yal: “Ilom xa, ilom xa li Babiloniae, ja' li muc'ta lume. Ja' ti laj yac'be yuch' pox scotol cristianoetic ta jujun banamile, ja' li c'usitic chopol tsc'an sbec'tal ti chac' licuc sc'ac'al yo'nton Diose”, xi. 9Ts'acal ibat yoxibal j'almantal noxtoc. Tsots ic'opoj, jech laj yal: “Li boch'o chich' ta muc' li jti'vanej bolome xchi'uc li sloc'obale, me ta xich'beic smarcail ta sti'baic, o me ta sc'obique, 10ta persa chuch'beic ec li sc'ac'al yo'nton Dios te xa oy ta bise, ti bats'i ja' stuc o li sc'ac'al yo'nton Diose. Ta sat scotol ch'ul j'almantaletic yu'un, xchi'uc ta sat Ch'ium Chij chich' lec svocolic ta c'oc' tsanbil ta azufre. 11Sbatel osil te chloc' o xch'ayilal ti bu chich'ic vocole. Ta c'ac'al ta ac'ubal mu'yuc chcux yo'ntonic o ta ich' vocol li boch'otic laj yich'ic ta muc' li jti'vanej bolome xchi'uc li sloc'obale, xchi'uc ti laj yich'beic smarcail sbie. 12Li'i tsc'an oy lec stsatsal yo'ntonic li boch'o voc'bilic yu'un Diose, ja' li boch'otic scotol yo'nton xch'unojbeic o li smantaltac Diose xchi'uc ti jun yo'nton xch'unojic o li Jesuse”, xi li j'almantale. 13Laj ca'ay oy boch'o ic'opoj tal ta vinajel, jech laj yalbun: “Jech xats'iba: ‘Xcuxet no'ox yo'nton li boch'o oyic ta stojol Cajvaltic c'alal ta xchamique. Jech chal ec li Ch'ul Espiritue. Chcux xa yo'ntonic o ta svocolic, yu'un te xa xchi'uquic li yabtelique’, xi xats'iba”, xiyutun. 14C'alal te jq'ueloje, laj quil jun saquil toc. Ta sba li toque oy boch'o te chotol xco'laj xchi'uc cristiano. Oy scoronail sjol pasbil ta c'anal taq'uin, xchi'uc stsacoj jun sjoz lec juxbil ye. 15Laj quil iloc' tal ta ch'ulna ta vinajel yan j'almantal. Tsots laj yapta li boch'o te chotol ta ba toque: “Tuch'o ta ajoz li trigoe, yu'un yorail xa ta tuch'el, yu'un taquin xa scotol li trigo ta banamile”, xut. 16Li boch'o te chotol ta ba toque la xtuch' ta sjoz li trigo ta banamile, jech la stsob scotol. 17Laj quil iloc' tal yan j'almantal ta ch'ulna ta vinajel yich'oj tal sjoz ec; oy lec ye noxtoc. 18Ts'acal iloc' tal yan j'almantal noxtoc te ta scajleb smoton Dios; ja' sventainoj li c'oq'ue. Tsots laj yapta li boch'o yich'oj sjoz ti oy lec yee, jech laj yalbe: “Tuch'o ta ajoz li ts'usub ta banamile, yu'un yorail xa chich' tuch'el, yu'un toc'on xa scotol”, xut. 19Ja' yu'un li j'almantale i'och ta abtel xchi'uc sjoz li' ta banamil; la xtuch' scotol li ts'usube. Ts'acal la stic' ochel ta yavil spits'ubil ya'lel yo' bu oy li sc'ac'al yo'nton Diose. 20Laj yich' pech'el ta teq'uel te ta pat lum, pero puru ch'ich' iloc'. La sta c'alal to ta sfreno li ca'etique. Oxib ciento (300) kilómetro ixanov batel ta banamil li ch'ich'e.


Copyright
Learn More

will be added

X\