Apocalipsis 13

1Ts'acal bat va'lucun ta yi'tic ta ti'nab. Te laj quil iloc' tal ta nab jcot muc'ta chon, vucbej sjol xchi'uc lajuneb xulub. Li jujun xulube oy scoronail. Li jujubej sjole te ts'ibabil sbi; ja' biil ti chopol chc'opoj ta stojol li Diose. 2Li muc'ta chon laj quile xco'laj xchi'uc jti'vanej bolom. Li yoc sc'obe xco'laj xchi'uc yoc sc'ob oso. Li yee ja' jech chac c'u cha'al ye león. Li dragone laj yac'be svu'el jech chac c'u cha'al svu'el stuc. Laj yac'be spas mantal jech chac c'u cha'al tspas mantal stuc. Tsots yabtel laj yac'be. 3Laj quil ti yayijem jbej sjol ti xu' chchame, pero icol. Jech scotol cristianoetic labal laj ya'yic. Ja' la snaban sbaic o ta stojol. 4Xchi'uc la squejan sbaic ta stojol li dragón ta sventa ti ja' laj yac'be tsots svu'el li jti'vanej bolome, xchi'uc la squejan sbaic ta stojol ec li jti'vanej bolome. Jech laj yalic: “Mu'yuc boch'o yan jech tsots svu'el jech chac c'u cha'al li jti'vanej bolome. Mu'yuc boch'o xu' tstsal”, xiic. 5Jech noxtoc ijambat ye yu'un ac'o yal c'usitic toj tsotsic, xchi'uc ac'o chopol c'opojuc ta stojol Dios. Xchi'uc i'ac'bat yabtel yu'un ac'o spas mantal o'lol xchanibal jabil. 6Jech lic c'opojuc. Yan xich' xal ta stojol li Diose. Solel la xchopolc'optabe li sbie, xchi'uc ti bu nacale, xchi'uc li boch'otic te oyic ta vinajele. 7I'ac'bat svu'el sventa tspas pleito xchi'uc li boch'o voc'bilic yu'un Dios li' ta banamile, jech ivu' yu'un la stsal. Jech noxtoc i'ac'bat sventain li cristianoetic ta jujuchop sts'unubal, ta jujun lum, ta jujuchop c'op, xchi'uc ta jujun banamile. 8Jech scotol cristianoetic ta banamil laj yich'ic ta muc' li jti'vanej bolome, ja' li boch'otic mu'yuc ono'ox ts'ibabil sbiic ta vun ta sliquebal banamil sventa chcuxiic sbatel osile, ja' li vun yu'un li Ch'ium Chij ti laj yich' milele. 9Li boch'o oy xchiquine, ac'o ya'ibe lec smelol: 10“Li boch'o ja' sc'oplal chtic'at ta chuquel avu'unique ta ono'ox x'och. Li boch'o ja' sc'oplal chmilat ta espadae ta ono'ox xmilat”. Ta sventa li'i, tsc'an oy stsatsal yo'ntonic, tsc'an oy lec xch'unojel yo'ntonic li boch'o voc'bilic yu'un Diose. 11Ts'acal laj quil yan jti'vanej bolom iloc' tal ta yut banamil. Oy chib xulub jech chac c'u cha'al ch'ium chij, pero co'ol chc'opoj jech chac c'u cha'al dragón. 12Ja' ch-abtej ta sventa svu'el li ba'yuc jti'vanej bolome. Ja' lic spas ta mantal scotol jnaclumetic ta sbejel banamil ti ac'o yich'ic ta muc' li ba'yuc jti'vanej bolome, ja' ti oy yav syayijemal ti colem xae. 13Jech noxtoc la spas muc'tic sq'uelubiltac. Xchi'uc ivu' yu'un laj yac' yaluc tal c'oc' ta vinajel te ta sat li cristianoetique. 14Ta sventa li muc'tic sq'uelubiltac stsatsal i'ac'bat spas ta svu'el li ba'yuc jti'vanej bolome, jech la slo'la o li jnaclumetic ta banamile. Jech lic spas ta mantal scotol cristianoetic ta banamil ti ac'o spasbeic sloc'obal li ba'yuc jti'vanej bolom ti i'ac'bat espada ta jbej sjole, ti icha'cuxie. 15Jech noxtoc i'ac'bat svu'el, yu'un ac'o yac'be yich' ic' li sloc'obal ba'yuc jti'vanej bolome, yu'un jech ac'o c'opojuc. Jech xu' chal mantal ti ac'o milatuc scotol li boch'otic mu xich'ic ta muq'ue. 16Jech noxtoc laj yal mantal ti ac'o yich' smarcail ta sbats'ic'obic, o me ta sti'baic scotol cristianoetic c'alal ta muc' ta biq'uit, ta jc'ulej ta me'on, c'alal ta boch'o ochem ta mozoil, xchi'uc boch'o muc ochemuc ta mozoil. 17Ja' no'ox xu' chmanulajic, xu' chchonolajic li boch'otic yich'ojbeic smarcail sbi, o me snumeroal sbi li ba'yuc jti'vanej bolome. 18Li'i tsc'an lec bijutic. Li boch'o bijubenic xae, ac'o yich' lec ta venta ya'yic li snumeroal jti'vanej bolome. Yu'un ja' snumeroal no'ox cristiano. Ja' vaquib ciento xchi'uc vaquib xchanvinic (666) li número yich'oje.


Copyright
Learn More

will be added

X\