Apocalipsis 11

1Jech li'ac'bat jch'ix aj xco'laj xchi'uc metro. Jech li'albat: “Batan, bat biso c'u smuc'ul li ch'ulna yu'un Dios te ta Jerusalene xchi'uc li scajleb smotone. Ato noxtoc ti jayib te chich'ic ta muq'ue. 2Yan li yamaq'uil ta spate mu me xatsac ta bisel, yu'un cac'ojbe xa ta sc'ob yanlum cristianoetic. O'lol xchanibal jabil chtal xpech'ilanic ta teq'uel li ch'ul lume. 3Pero ta jtac batel chib testigo cu'un; chbat xcholic jc'op o'lol xchanibal jabil. Ja' tslapic li c'u'il ti c'ux ta lapele”, xiyutun. 4Li chib testigo le'e ja' jechic jech chac c'u cha'al cha'pets oliva, xchi'uc ja' jechic jech chac c'u cha'al chib candelero ti te oy ta stojol li Dios ti sventainoj sbejel banamile. 5Me oy boch'o tsc'an chuts'intaic li chibique, chloc' c'oc' ta yeic, ta xchic' li yajcontraique. Me oy boch'o tsc'an c'usi chopol tspasbeique, persa ta xchamic noxtoc. 6Li chibique ac'bil svu'elic sventa tsmaquic li vinajele, yu'un jech mu xac' vo' ti c'alal ja'o chcholic c'usi albilic yu'un Diose. Xchi'uc oy svu'elic sventa tsc'atajesic ta ch'ich' li vo'etique, xchi'uc xu' yu'unic ta xac' tsaqueicuc ta tsatsal chamel li cristianoetic ta banamile, ja' ti jayib velta tsc'an tspasic jeche. 7C'alal me ilaj yo'ntonic ta xcholel li c'usi albilic yu'un Diose, ja'o chloc' tal ta xab li jti'vanej bolome. Ja' chlic spasic c'op xchi'uc li chibique; tsalbil chcomic, jech chmilatic o. 8Li sbec'talique te no'ox telajtic chcom ta xoralil li Muc'ta lum yo' bu la smilic Cajvaltique, ja' li lum ti xco'laj xchi'uc Sodoma xchi'uc Egiptoe. 9Li chibique o'lol xchanibal c'ac'al te chq'uelbat sbec'talic yu'un scotol cristianoetic ta jujun lum, ta jujuchop sts'unubalic, ta jujuchop sc'opic, xchi'uc ta jujun banamil. Mu xaq'uic ti ac'o mucbatuc li sbec'talique. 10Li jnaclumetic ta banamile xcuxet no'ox yo'ntonic, stse'inic no'ox ti c'alal chilic ichamic xae. Jech ta xac'anbe sba smoton jujunic. Yu'un c'alal cuxulic to'oxe, ja' laj yac'beic ep svocol li jnaclumetic ta banamile. 11C'alal its'aqui li o'lol xchanibal c'ac'ale, i'ac'bat yich'ic ic' yan velta yu'un Dios. Jech icuxiic, itotsic. Scotol li boch'otic laj yilique ixi'ic ta jyalel. 12Laj ya'yic oy boch'o tsots chc'opoj ta vinajel jech i'albatic: “Muyanic tal li'i”, x'utatic. Jech imuyic batel, macbil ta toc ibatic. Li yajcontraique laj yil scotolic. 13C'alal ja'o jech ic'ot ta pasele, ital tsots niquel. Ep ivuc' li naetic ta lume. Jun ta lajlajuneb ivuc' ta scotol. Li cristianoetique vucmil ichamic ta scoj li niquele. Li yantique ixi'ic ta jyalel; laj yalbeic slequilal li Dios ta vinajele. 14Li xchibal velta vocole ijelov xa. Ta xa xtal noxtoc li yoxibal veltae. 15Li svucubal j'almantale la sjupan ec li yoq'uese. C'alal la sjupane, oy boch'otic tsots ic'opojic ta vinajel. Jech laj yalic: “Li yabtel ajvaliletic li' ta banamile ja' xa i'och ta sventainel stuc li Cajvaltique, ja' li Cristoe. Ja' xa tspas mantal stuc sbatel osil”, xiic. 16Li chanib xcha'vinic (24) banquilaletic te chotajtic ta xchotlebic ta stojol Diose la spatan sbaic ta banamil; laj yich'ic ta muc' li Diose. 17Jech laj yalic: “Colaval, Cajvaltic Dios, vo'ot ti ech'em avu'ele, vo'ot ti te ono'ox oyot ta vo'onee ti li' oyot o ta orae. Colaval ti vo'ot no'ox oy avu'el atuque, ti vo'ot xa chlic apas mantal atuque. 18Liquem sc'ac'al yo'ntonic li cristianoetic ta jujun banamile, pero ic'ot xa sc'ac'alil chavac'be stojic ta sc'ac'al avo'nton. Laj xa sta yorail chachapan li boch'otic chamenique, xchi'uc laj xa sta yorail chavac'be smoton li avajtuneltac, ja' li j'alc'opetique, xchi'uc li boch'otic voc'bilic avu'un ti yich'ojicot ta muq'ue. Chavac'be smotonic c'alal ta muc' ta biq'uit, xchi'uc laj xa sta yorail chavules o li boch'otic la socbeic yo'nton li cristianoetic li' ta banamile”, xiic ta stojol. 19Laj quil ijam li ch'ulna yu'un Dios ta vinajele. Te ivinaj li xcaxail smantal Diose, xchi'uc iloc' ep sacsevul, chauquetic, niquel, muc'tic bot, xchi'uc ep c'usitic yan ibac'.


Copyright
Learn More

will be added

X\