Filipenses 2

1Me ataoj xa stsatsal avo'ntonic yu'un li Cristoe, me apatoj xa avo'ntonic ta sventa ti sc'anojoxuque, me co'ol avo'ntonic ta sventa li Ch'ul Espiritue, me oy xa slequil avo'ntonic, xchi'uc me oy xa c'uxubinel ta avo'ntonique, 2toj xcuxet co'nton avu'unic. Pero ta jc'an ti ech'em to chavac'bicun xcuxetel co'ntone: co'oluc me c'usi xanop acotolic, co'ol me xac'anan abaic, co'oluc me avo'nton acotolic, co'oluc me ac'opic acotolic. 3Mu me c'usi xapasic ta sventa yu'un chac'an chatsalvanic, xchi'uc ta sventa chatoy abaic. Biq'uit xavac' abaic, oyuc me stu ta avo'ntonic ec li achi'ilique. 4Mu me ja'uc no'ox xbat asat ta aventa atuquic, ac'o oyuc ta avo'ntonic noxtoc li yantique. 5Jechuc me avo'ntonic jech chac c'u cha'al yo'nton li Cristo Jesuse: 6Yu'un li stuque co'olic xchi'uc li Diose, pero mu ja'uc tsots sc'oplal laj ya'ay. 7La scomtsan, ay spas sba jech chac c'u cha'al mozo, la sco'oltsan sba jech chac c'u cha'al cristiano; xco'laj xchi'uc vinic ivul li' ta banamil. 8Pero c'alal laj yich' sbec'tal jech chac c'u cha'al cristianoe, ech'em to la sbic'tajes sba. La xch'un mantal, la xch'un milel noxtoc. La xch'un li milel ta cruz ti toj q'uexlal sbae. 9Ja' yu'un li Diose la stoy muyel c'alal to ta toyol. Laj yac'be jun sbi ti ech'em smuc'ul ta scotol yan biiletique. 10Yu'un jech ta sventa sbi Jesús chlic squejan sbaic scotol li boch'otic te oyic ta vinajele, xchi'uc li boch'otic li' oyic ta banamile, xchi'uc li boch'otic oyic ta yolon banamile. 11Scotol cristiano ta jujuchop c'op chlic yalic ta jamal ti ja' Ajvalil stuc li Jesucristoe; jech ich'bil ta muc' chc'ot li Dios Totile. 12Ja' yu'un vo'oxuc ti lec jc'anojoxuque, lec laj ach'unic ti c'alal te jchi'ucoxuque. Pero mu me ja'uc no'ox, ech'em to me jech xach'unic ti c'alal nom oyune. Ja'uc me batem ta avo'ntonic xapasbeic yabtelal li coltael ataojique, tsotsuc me sc'oplal chava'yic, xi'anic me yu'un li Diose. 13Yu'un ja' Dios laj yac' ta avo'ntonic ti chac'an chapasic c'usitic leque, xchi'uc ja' chac' c'otuc ta pasel avu'unic li c'usi tsc'ane. 14Scotol li c'usitic chapasique pasic me ta yutsil avo'ntonic, mu me xabic'talvulajeticuc, mu me xavutilan abaic o. 15Yu'un jech mu soc ac'oplalic, xchi'uc jech mu xata amulic. Jech chvinaj ta stojol chopol cristianoetic, ch'ayemal cristianoetic ti vo'oxuc xnich'naboxuc Diose, ti mu'yuc chopoloxuque. Ja' jech xaxojobanic ta stojolic jech chac c'u cha'al luz ti xojobanic c'alal ic' osile. 16Jech chavaq'uic o ta ilel li Lequil A'yej sventa cuxlejale. Jech toj jun no'ox co'nton chca'ay c'alal chtal li Cristoe, yu'un mu alticuc laj cac' persa xanubal, xchi'uc mu alticuc li'abtej. 17Pero me tsc'an noxtoc ti chich' malel jch'ich'al sventa chich' ts'acubtasel li matanal chavaq'uic ta stojol Diose ja' li xch'unojel avo'ntonique, xcuxet no'ox co'nton. Me jech chc'ot ta pasele, tsc'an xcuxet no'ox avo'ntonic ec li vo'oxuque. 18Ja' no'ox jech ec li vo'oxuque, cuxetuc me avo'ntonic me jech chc'ot ta pasele, junuc me avo'ntonic. Co'ol cuxetuc no'ox co'ntontic. 19Ta jna' ti chiscoltaun li Cajvaltic Jesuse, ja' yu'un ta jtac tal ta ora ta atojolic li Timoteoe, yu'un jech chpat co'nton ti c'alal chca'ay c'u xa'elanique. 20Yu'un mu'yuc boch'o yan li' oy ti co'ol co'nton jchi'uque, ti oy ta yo'nton chascoltaoxuc ti c'u cha'al lec chabatique. 21Yu'un scotolic ja' no'ox tsa'ic c'usi tsc'an stuquic. Mu ja'uc tsa'ic c'usi tsc'an li Cristo Jesuse. 22Pero li vo'oxuque xavotquinbeic xa lec c'u x'elan yo'nton li Timoteoe. Avilojic ti lec la scoltaun ta xcholel li Lequil A'yeje, jech chac c'u cha'al jun nich'onil ti lec tscolta stote. 23Jech jnopoj ja' ta jtac tal ta atojolic ta ora c'alal me laj quil c'u x'elan chbat li c'op ta jtojole. 24Pero jch'unoj ti chiscoltaun li Cajvaltique, yu'un jech xu' chtal jq'ueloxuc jtuc ta oratic ec. 25La jnop noxtoc ti tsots sc'oplal ta jtacboxuc sutel tal li quermanotic Epafroditoe, ja' li jchi'il ta abtele, ja' li jchi'il ta soldadoil c'oteme. Ja' ti laj ataquic tal yu'un chiscoltaun ta sventa li c'usi chtun cu'une. 26Yu'un solel oy ta yo'nton tsc'an xa chasq'ueloxuc acotolic. Yu'un toj ep chlo'ilaj yo'nton ta sventa ti laj ava'yic i'ipaje. 27Ta melel tsots i'ipaj, jutuc xa muc xcham o. Pero ic'uxubinat yu'un Dios. Ma'uc no'ox stuc ic'uxubinat, la xc'uxubinun ec li Diose, yu'un jech muc xiyac'bun yan tsots at-o'nton. 28Jech tsots sc'oplal chca'ay ta jtacboxuc tal ta ora, yu'un jech ac'o cuxetuc no'ox avo'ntonic ti c'alal chavilbeic sat yan veltae. Jech mu xa ech'emuc chcat co'nton ec. 29Cuxetuc me avo'nton xaviq'uic ta sventa Cajvaltic ti c'alal chc'ot ta atojolique. Li boch'otic ja' jech yo'ntonic jech chac c'u cha'al li Epafroditoe, ich'ic me ta muc'. 30Yu'un li Epafroditoe jutuc mu icham ta sventa yabtel li Cristoe. Solel laj yac' sbec'tal o ta jcoltael, mu sventauc me te chcham o. Yu'un la sna' ti jech avo'nton chac'an chacoltaicune, ja' no'ox ti muc xatal atuquique.


Copyright
Learn More

will be added

X\