Filipenses 1

1Vu'un Pabloun jchi'uc Timoteo, vu'un yajtuneluncutic li Jesucristoe, ta jc'opanoxuc tal vo'oxuc li yu'untacoxuc Cristo Jesús te ta lum Filipose, xchi'uc li jq'uelvanej yu'un jcholc'opetic avu'unique, xchi'uc li yajcoltaubbail jcholc'opetique. 2Ac'o xc'uxubinoxuc, ac'o spasboxuc ta jun avo'ntonic li Diose, ja' li Jtotique xchi'uc li Cajvaltic Jesucristoe. 3C'alal chat'abic ta co'ntone, persa ono'ox ta jtojbe ta vocol Dios ta aventaic. 4Xcuxet no'ox co'nton ta jna'oxuc ta stojol Dios scotol ora ti c'alal ta jc'opan Dios jujun veltae, 5yu'un co'ol ta jcolta jbatic ta sventa li Lequil A'yeje, ja' jech avo'ntonic o ta sliqueb xchi'uc c'alal to tana. 6Jch'unoj ti mu xpaj o li abtel avu'unic jech chac le'e. Yu'un li boch'o la sliques lequil abtel ta atojolique ta svu'es o batel c'alal to tsta sc'ac'alil chtal li Cristo Jesuse. 7Ja' tsc'an jech ta jch'un ta aventaic, yu'un solel oyoxuc ta co'nton, yu'un chquil ti co'ol c'uxubinbilutic yu'un li Diose, ac'o me li' tiq'uilun ta chuquel, o me va'alun ta stojol ajvalil sventa chcac' lec ta na'el li Lequil A'yeje, co'ol ono'ox ta jcolta jbatic ta jcotoltic. 8Ja' testigo cu'un Dios ti ta melel lec jc'anojoxuc jech chac c'u cha'al yo'nton li Cristo Jesuse. 9Jech ta jc'anbe ep vocol Dios ti ech'em ac'o yepajesboxuc li c'anvanej avu'unique, xchi'uc ac'o bijubanic lec, ac'o ana'ic yotquinel lec scotol. 10Yu'un jech ja' ac'o ana'ic st'ujel batel ti bu leque, jech mu'yuc avic'ubalic, mu'yuc amulic c'alal chtal li Cristoe. 11Jech noxtoc ja' ac'o apasic li c'usitic tuc' ta pasele, ja' ta sventa Jesucristo xu' avu'unic, jech ch-ich'at ta muc', jech lec chbat sc'oplal avu'unic li Diose. 12Quermanotac, li c'usitic ic'ot ta pasel ta jtojole, ta jc'an chana'ic ti ja' sventa lec chpuc batel li Lequil A'yeje. 13Scotol li yajsoldadotac muc'ta ajvalil li'i, xchi'uc scotol li yantique, sna'ojic xa ti ja' ta sventa Cristo li' chuculune. 14Ep xa jch'unolajeletic itsatsub yo'ntonic ta stojol Cajvaltic ta sventa ti li' chuculune. Lec tsots yo'ntonic jamal chalic batel li sc'op Diose, mu'yuc xi'el cha'yic. 15Ta melel oy boch'otic ja' no'ox chcholbeic sc'op Cristo ta scoj it'ix yo'ntonic, xchi'uc ta scoj tsalbail. Pero oy yantic ta yutsil yo'ntonic chcholic, 16yu'un lec sc'anojicun, yu'un sna'ic ti ja' ta scoj tsots sc'oplal chca'ay Lequil A'yej ti li' chuculune. 17Pero li yantique chcholic batel ta sventa no'ox oy c'usi oy ta yo'nton stuquic; muc ta yutsiluc yo'ntonic tspasic, yu'un tsnopic ti ja' jech xu' chiyepajesbicun jvocol ti li' chuculune. 18Pero le'e mu'yuc tsots sc'oplal chca'ay. Ja' no'ox tsots sc'oplal chca'ay ti ac'o vinajuc batel sc'oplal li Cristoe, ac'o me yutsil yo'nton chcholic, o me mu yutsiluc yo'nton chcholic. Ja' no'ox xcuxet co'nton ti chvinaj batel sc'oplal li Cristoe. 19Jech mu xpaj o li xcuxetel co'ntone, yu'un jna'oj lec ti chicole, yu'un chac'opanbicun Dios ta jtojol, xchi'uc chiscoltaun li Espíritu yu'un Jesucristoe. 20Jun co'nton jch'unoj o, jmalaoj chc'ot ta pasel, muc alticuc chcac'be jba q'uexlal. Ta sventa ti mu xlaj o li stsatsal co'ntone jech ch-ich'at ta muc' Cristo ta jventa jech chac c'u cha'al ono'oxe, ac'o me cuxulun to, o me chicham. 21Yu'un me oy to jcuxlejale, ja' yu'un li Cristoe; me lichame, yu'un xa la jpas o canal. 22Pero me li' to cuxulun jchi'uc jbec'tale li' to chi'abtej, yu'un jech oy to boch'o xu' chch'unic ta jventa. Jech mu jna' bu junucal ta jt'uj. 23Yu'un ta jc'an xchibal. Ta jc'an chicham, yu'un jech xu' chbat jchi'in li Cristoe, yu'un toj ech'em lec ti bu oye. 24Pero ta jc'an li' to cuxulun noxtoc, yu'un tsots sc'oplal tsc'an to li' chajcoltaoxuc. 25Ta sventa ti jech jch'unoje, jech ta jna' ti li' to cuxulune. Li' to chajchi'inoxuc, yu'un jech xu' chatsatsubic lec, xchi'uc jech chataic lec xcuxetel avo'ntonic ta sventa li xch'unojel avo'ntonique. 26Jech toj jun avo'nton chava'yic ta stojol Cristo Jesús c'alal me te xa'ox oyun ta atojolic yan veltae. 27Ja' no'ox tsots sc'oplal ti ac'o apasic batel jech chac c'u cha'al chal li Lequil A'yej yu'un Cristoe. Yu'un jech c'alal chtal jq'ueloxuc, o c'alal nom oyune, ta xca'ay ac'oplalic ti staoj yav jun avo'ntonic oe, ti co'ol avo'nton chavac'beic yipal xch'unel li Lequil A'yeje, 28xchi'uc ti mu xaxi'ic yu'un li boch'otic chascontrainoxuque. Yu'un jech ac'o yilic ti ch'ayel chbat li stuquique, xchi'uc ti chacolic li vo'oxuque. Le'e ja' Dios tspas scotol. 29Yu'un li vo'oxuque laq'uelanbatic xa li coltael ta sventa Cristoe. Ma'uc no'ox tsc'an ac'o ach'unic li Cristoe, ja' tsc'an noxtoc ti ac'o avich'ic vocol ta sventae. 30Jech co'ol chavich'ic vocol jech chac c'u cha'al laj avilic laj quich' vocol li vu'une, xchi'uc jech chac c'u cha'al chava'yic chquich' o vocol li' ta orae.


Copyright
Learn More

will be added

X\