San Mateo 6

1Jech to laj yal li Jesuse: “Q'uelo me abaic ti c'alal chapasic c'usi tsc'an Diose. Mu me xapasic ta sventa yu'un chac'anic ti ac'o lec yiloxuc li cristianoetique. Me jech chapasique, mu'yuc chayac'boxuc amotonic li Jtotic Dios ta vinajele. 2“C'alal me oy boch'o chacoltaique, mu me xavaq'uic ta a'yel, jech chac c'u cha'al tspasic li jlo'lavanejetic te ta nail tsobobbailetique xchi'uc ta xoraltique. Yu'un ja' no'ox tsc'anic ti lec sc'oplalic yu'un li cristianoetique. Melel li c'usi chacalboxuque, le'e yich'oj xa o smotonic ti jech tspasique. 3C'alal chacoltavanic li vo'oxuque, mu me boch'o xavac'beic sna', 4yu'un jech mu'yuc boch'o sna' li c'usi laj aq'uelane. Li Jtotic Diose yiloj li c'usi laj apas ta mucule, jech chayac'boxuc amotonic. 5“C'alal chac'opanic Diose, mu me jechuc xapasic jech chac c'u cha'al tspasic li jlo'lavanejetique. Yu'un li stuquique ja' lec cha'yic ti va'ajtic ta nail tsobobbail xchi'uc ta chiquin xoraltic c'alal tsc'opanic Diose yu'un jech ac'o ilaticuc yu'un li cristianoetique. Melel chacalboxuc, le'e yich'oj xa o smotonic ti jech tspasique. 6C'alal chac'opanic Dios li vo'oxuque, ochan ta yut anaic, maquic li ti'nae, c'opanic li Jtotic Diose. Li Jtotique chil li c'usi mucul chapasique, jech chayac'boxuc amotonic. 7“C'alal chac'opanic Diose, mu me teuc no'ox liquel-liquel avu'un c'usi chavalic jech chac c'u cha'al tspas li yanlum cristianoetic ti mu xotquinic Diose. Yu'un tsnopic ti ja' to jech ch-a'ibat o sc'opic me ep ta velta chalilanique. 8Mu me jechuc xapasic li vo'oxuque. Yu'un li Jtotique sna'oj xa ono'ox c'usitic chtun avu'unic ti c'alal mu'yuc to'ox chac'anbeique. 9Li vo'oxuque ja' jech xac'opanic Dios chac li'i: ‘Jtotic Dios, te oyot ta vinajel, ich'biluc ta muc' abi. 10Ac'o sta yorail chapas mantal, ac'o pasuc c'usi tsc'an avo'nton li' ta banamil jech chac c'u cha'al te ta vinajele. 11Ac'bun jve'elcutic ta sventa li jun c'ac'al li'i. 12Pasbuncutic perdón yu'un jmulcutic jech chac c'u cha'al jpasojbecutic perdón li boch'otic oy smul cu'uncutique. 13Mu me xavac' stsaluncutic li sujel ta mulile. Coltauncutic loq'uel ta sc'ob li pucuje’, xachiic ti c'alal chac'opanic Diose. 14“Yu'un me chapasbeic perdón li boch'o oy smul avu'unique, jech chaspasboxuc perdón yu'un amulic ec li Jtotic ta vinajele. 15Yan me mu xapasbeic perdón li boch'o oy smul avu'unique, ja' no'ox jech mu xaspasboxuc perdón ec li Jtotic te oy ta vinajele. 16“C'alal chavictaic ixime, mu me jechuc xapasic jech chac c'u cha'al tspasic li jlo'lavanejetic ti tsyanijes satique yu'un chaq'uic ta ilel ta stojol cristianoetic ti yictaojic ixime. Melel li c'usi chacalboxuque, le'e yich'oj xa o smotonic ti jech tspasique. 17C'alal chavictaic ixim li vo'oxuque, ac'bo lec xpoxil ajolic; poco lec asatic. 18Jech mu'yuc boch'o chil ti avictaojic ixime. Ja' no'ox ta xil stuc li Jtotic Dios ti mu xavilique. Jech chayac'boxuc amotonic. 19“Mu me xatsob ac'ulejalic li' ta banamil, yu'un chlaj ta c'uxel ta chil, xchi'uc chcuxin, xchi'uc xu' chbat ta elec'. 20Ja' lec tsobo ac'ulejalic te ta vinajel ti bu mu xlaj ta chil, xchi'uc ti bu mu xcuxin, ti mu xbat ta eleq'ue. 21Yu'un ti bu tsobol ac'ulejalique, ja' te chbat avo'ntonic. 22“Li luz sventa abec'talique ja' li asatique. Me lec li asatique lec sac osil chil scotol li abec'talique. 23Pero me mu'yuc lec li asatique, scotol abec'talic oy ta ic' osil. Ja' yu'un me ta ic' osil oy li asate, yolbaj ta x'epaj o tal li ic' osile. 24“Mu'yuc boch'o xu' yu'un me tsa' chib yajval. Yu'un xu' tsbaj li june, xu' ja' lec tsc'an li yane; xu' ja' lec chil li june, xu' tslaban li yane. Ja' no'ox jech mu xu' chatunic yu'un Dios me ja' batem avo'ntonic yu'un ac'ulejalique. 25“Ja' yu'un chacalboxuc ava'yic: Mu me xlo'ilaj avo'ntonic ta sventa c'u x'elan chacuxiic, bu chata ave'elic, xchi'uc c'usi chavuch'ic, xchi'uc bu chata ac'u' apoq'uique. Yu'un ma'uc xjelov sc'oplal li ave'elique; ja' tsots sc'oplal li acuxlejalique. Jech noxtoc ma'uc xjelov sc'oplal li ac'u' apoq'uique, ja' tsots sc'oplal li abec'talique. 26Q'uelavilic li mutetique. Mu sna' x'ovolajic, mu sna' xc'aojic, mu sna' stsob ta snail li sve'elique. Ja' mac'linbilic yu'un li Jtotic Dios ta vinajele, pero li vo'oxuque ech'em to tsots ac'oplalic jech chac c'u cha'al li mutetique. 27Altic ti chlo'ilaj avo'ntonique, mu yu'unuc ta xnatub jutuc avorailic li' ta banamil ti jech chapasique. 28“¿C'u yu'un ta xlo'ilaj avo'ntonic ta sventa ti bu chata ac'u'ique? Q'uelavilic c'u x'elan chch'i li nichimetic ta yaxaltique; mu sna' x'abtejic, mu sjal sc'u'ic. 29Pero ta xcalboxuc ava'yic, ja' toj c'upilic sba pasbil. Li Salomón ta vo'onee toj c'ulej, lec c'upilic sba li sc'u' spoq'ue, pero muc ono'ox sta jech chac c'u cha'al slequil li nichimetique. 30Li ts'i'laletique lec c'upilic sba xyaxal, pero ta yoc'omal no'oxe taquinic xa'ox, ta xa'ox xich' chiq'uel ta c'oc'. ¡Buuc xa li vo'oxuque toj tsots ac'oplalic, jech ech'em to jech chaxc'uxubinoxuc li Diose! Pero mu to jechuc ach'unojic. 31Ja' yu'un mu me xlo'ilaj avo'ntonic cha'e. Mu me jechuc xavalic: ‘¿C'usi ta jve'tic? ¿C'usi ta xcuch'tic? ¿Bu ta jta jc'u'tic?’, mu me xachiic. 32Li boch'otic mu xotquinic Diose ja' jech ta xlo'ilaj yo'ntonic ta sa'ilanel. Pero li Jtotic te oy ta vinajele sna'oj ti chtun avu'unic scotol jech chac le'e. 33Ja' yu'un tsc'an ba'yuc chavac' abaic ta ventainel yu'un li Diose, xchi'uc ti chapasic c'usi tsc'ane, jech chayac'boxuc scotol li c'usitic ta xtun avu'unique. 34Ja' yu'un mu me xlo'ilaj avo'ntonic ta sventa yoc'omal. Yu'un li oc'ome yich'oj tal stuc ec ti c'u yepal slo'il o'ntonale. Ja' yu'un xu' no'ox o ti c'u yepal yich'oj tal jujun c'ac'ale.


Copyright
Learn More

will be added

X\