San Mateo 5

1C'alal laj yil Jesús li epal cristianoetique, imuy ta biq'uit vits. Te c'ot chotluc. Te inopajic batel ec li yajchanc'optaque. 2Te lic c'opojuc li Jesuse, lic chanubtasvanuc, jech laj yal: 3“Xcuxet no'ox yo'nton li boch'o abul sba cha'yique, yu'un ja' chventainatic yu'un Dios. 4“Xcuxet no'ox yo'nton li boch'o ta x'oq'uique, yu'un ja' ta x'ac'bat smuc'ul yo'ntonic. 5“Xcuxet no'ox yo'nton li boch'o muc' no'ox yo'ntonique, yu'un ja' ch-ac'bat sventainic li banamil ti albil sc'oplale. 6“Xcuxet no'ox yo'nton li boch'o jun ta vi'nal, jun ta taqui-o'nal cha'yic ti ac'o c'otuc ta pasel c'usi tsc'an yo'nton Diose, yu'un ja' ta snojesbat o xch'utic yu'un li Diose. 7“Xcuxet no'ox yo'nton li boch'o ta xc'uxubinvanique, yu'un ta xich'ic c'uxubinel ec. 8“Xcuxet no'ox yo'nton li boch'o lecuben xa yo'ntonique, yu'un ja' chbat yotquinic li Diose. 9“Xcuxet no'ox yo'nton li boch'o yac'oj svocolic ta spajesel c'ope; ja' xnich'nabtac Dios, xi sc'oplalic. 10“Xcuxet no'ox yo'nton li boch'o ta xich'ic uts'intael ta sventa ti tuc' c'usi tspasique, yu'un ja' chventainatic yu'un Dios. 11“Li vo'oxuque cuxetuc no'ox avo'ntonic me vu'un ta jventa chachopolc'optaatic, chasoquesbat ac'oplalic, xchi'uc me ch-epalc'opojic ta atojolique. 12Cuxetuc no'ox avo'ntonic yu'un. Yu'un chc'ot ata ep amotonic te ta vinajel. Yu'un jech ono'ox laj yich'ic uts'intael ec li yaj'alc'optac Dios ti ba'yuc ijelov avu'unique. 13“Li vo'oxuque xco'laj xchi'uc ats'am c'otemoxuc. Pero me ch'ayem xa xchi'il li ats'ame, ¿me xu' to ta xchi'um yan velta? Mu'yuc xa stu o. Ja' xa no'ox ta xich' jipel batel, te chlaj ta pech'el ta teq'uel yu'un li cristianoetique. 14“Li vo'oxuque xco'laj xchi'uc luz c'otemoxuc. Jech chac c'u cha'al me oy jun muc'ta lum ta jolvitse, mu stac' naq'uel o. 15Jech noxtoc me oy chatsanic candile, mu'yuc chanujmaquiic ta anmul. Ja' chavaq'uic ta xvuchanubil, jech ta xac' xojobal ta sbejel li yut anaique. 16Ja' jech tsc'an xaxojobanic ta stojol cristianoetic li vo'oxuque, yu'un jech ac'o yilic ti toj lec avabtelique, jech chlic yich'ic ta muc' li Jtotic Dios te oy ta vinajele. 17“Mu me xanopic ti yu'un tal jlajesbe sc'oplal li smantaltac Diose xchi'uc li c'usitic laj yal j'alc'opetique. Mu yu'unuc tal jlajesbe sc'oplal; ja' tal cac' c'otuc ta pasel. 18Melel chacalboxuc, c'alal to tsta yorail chlaj li vinajel banamile, me jbeluc mu'yuc ta xlaj sc'oplal li c'usitic yaloj Diose; persa chc'ot ta pasel scotol. 19Me oy boch'o mu tsotsuc sc'oplal cha'ay jbeluc li smantal Diose, me jech ta xchanubtasvan oe, ja' its'inal chc'ot yo' bu chventainvan li Diose. Yan li boch'o tsots sc'oplal cha'ay scotol li smantaltac Diose, me jech ta xchanubtasvane, ja' banquilal chc'ot yo' bu chventainvan li Diose. 20Chacalboxuc ava'yic, me ja' no'ox jech chapasic jech chac c'u cha'al li jchanubtasvanejetic xchi'uc li fariseoetique, mu xu' chavich'ic ventainel yu'un Dios. 21“Ava'yojic, jech i'albatic comel li jmoltotactic ta vo'onee: ‘Mu me xamilvanic. Li boch'o ta xmilvane ta persa ta xich'be stojol c'alal chich' chapanele’, x'utatic. 22Pero vu'un chacalboxuc, li boch'o ta xilinta xchi'ile ta xich'be stojol c'alal chich' chapanele. Li boch'o ‘toj bolot’ xut xchi'ile, ta xich'be stojol ti c'alal chich' chapanel yu'un jchapanvanejetic ta ch'ulnae. Li boch'o ‘sve'elot c'oc'’ xut xchi'ile, ja' chbat stoj smul ta c'oc'. 23“Ja' yu'un, me oy chavich' batel smoton Dios te ta scajlebe, me te cht'ab ta avo'nton ti oy ac'op achi'uc achi'ile, 24ja' lec te xacomtsan ta stuq'uil scajleb matanal Dios li smoton Dios avich'oj batele. Bat chapano ba'yuc ac'op achi'uc li achi'ile. Ts'acal xu' chtal avac'be li smoton Diose. 25“Ja' tsc'an chachapan ta ora ac'op achi'uc li avajcontrae yu'un yo'to oyot batel ta be achi'uc. Mu me xamala xayac'ot ta sc'ob jchapanvanej li avajcontrae, yu'un li jchapanvaneje chayac'ot ta sc'ob mayol; li mayole chbat stic'ot ta chuquel. 26Melel li c'usi chacalbote, mu xa xu' chaloc' o tal, ja' to me latoj scotole. 27“Ava'yojic ti jech i'albatic comel ta vo'onee: ‘Mu me xamulivajic’, x'utatic. 28Pero vu'un chacalboxuc, li boch'o ja' no'ox ta xpich'-o'nta antse, imulivaj xa o xchi'uc ta yo'nton. 29“Ja' yu'un, me ta scoj no'ox abats'isat chata o amule, loq'ueso, jipo batel. Ja' lec ti juteb no'ox abec'tal chch'aye; ja' vocol me scotol abec'tal chich' jipel ochel ta c'oq'ue. 30Jech noxtoc me ta scoj no'ox abats'ic'ob chata amule, c'oco loq'uel. Ja' lec me jun no'ox ac'ob chch'aye; ja' vocol me scotol abec'tal chich' jipel ochel ta c'oq'ue. 31“Ava'yojic noxtoc ti jech i'albatic ta vo'onee: ‘Li boch'o ta xicta yajnile ac'o yac'be svunal ti muc xa yajniluque’, x'utatic. 32Pero vu'un chacalboxuc, li boch'o ta xicta yajnile, me muc ta scojuc imulivaj xchi'uc yan vinique, xco'laj xchi'uc mulivajem chc'ot yu'un li yajnile. Li boch'o ta xic' yajnilin li ictabil antse, ja' no'ox ta xmulivaj xchi'uc. 33“Ava'yojic noxtoc ti jech i'albatic ta vo'onee: ‘Mu stac' xasutes ac'opic; persa ac'o c'otuc ta pasel avu'unic li c'usi chavalic ta sbi Diose’, x'utatic. 34Pero vu'un chacalboxuc, mu me c'usi xat'abic ta alel sventa chcom ta testigo avu'unic. Mu me xat'abbeic sbi li vinajele, yu'un ja' xchotleb li Diose. 35Mu me xat'abbeic sbi li banamile, yu'un ja' stec'ub yacan li Diose. Mu me xat'abic li Jerusalene, yu'un ja' slumal li muc'ta Ajvalile. 36Mu me xat'abic li ajolique, yu'un li stsotsil ajolique mu xu' avu'un chac'atajesic ta sac, chac'atajesic ta ic'. 37Meleluc me li c'usitic chavalique. ‘Xu'’, me xachie, ac'o xu'uc o; ‘Mu xu'’, me xachie, ac'o jechuc. Yu'un li boch'o ep c'usi chalilan ti mu meleluque ja' yabtel pucuj. 38“Ava'yojic noxtoc ti jech i'albatic ta vo'onee: ‘Li boch'o ta stu'pbe sat xchi'ile, ac'o yich' tu'pbel sat ec. Li boch'o ta scolesbe stanal ye xchi'ile, ac'o yich' colesbel stanal ye ec’, x'utatic. 39Pero vu'un chacalboxuc, mu me xapacbeic sutel li boch'o chopol c'usi chaspasboxuque. Me oy boch'o chasmajboxuc jot xocon abats'isatique, ac'o smajboxuc noxtoc li yan jote. 40Me oy ta stsacoxuc ta c'op ti tsc'an ta spojboxuc batel ac'u'ique, ac'beic batel alapbolal xaquitaic noxtoc. 41Me oy chasujoxuc ta icatsil junuc revae, cuchbeic batel chibuc reva. 42Me oy c'usi chasc'anboxuque, ac'beic. Me oy c'usi tsc'an chaxch'amanboxuque, mu me xajalanic. 43“Ava'yojic noxtoc ti jech i'albatic ta vo'onee: ‘C'ano achi'ilic; contraino avajcontraic’, x'utatic. 44Pero vu'un chacalboxuc: c'uxubino avajcontraic; c'opanbeic Dios ta stojol li boch'otic chayuts'intaoxuque. 45Yu'un jech ta xvinaj o ti vo'oxuc xnich'naboxuc li Jtotic Dios ta vinajele. Yu'un li Diose co'ol ta xac' q'uepuc ta stojol li boch'otic chopolique xchi'uc li boch'otic lequique. Co'ol chac'be vo' li boch'otic tuc' yo'ntonique xchi'uc li boch'otic muc tuc'uc yo'ntonique. 46Yu'un me ja' no'ox chac'uxubinic ec li boch'o chaxc'uxubinoxuque, ¿me chata amotonic ti jech chapasique? Yu'un ja' jech tspasic ec li jtsobpatanetique. 47Me ja' no'ox chac'opanic li boch'otic xavotquin aba achi'uquique, ¿c'usi lec chapasic li vo'oxuque? Yu'un ja' jech tspasic ec li yanlum cristianoetique. 48Tsc'an vo'oxuc lec avo'ntonic jech chac c'u cha'al lec yo'nton li Jtotic Dios te oy ta vinajele”, xi li Jesuse.


Copyright
Learn More

will be added

X\