San Mateo 23

1Li Jesuse lic sc'opan li epal cristianoetique xchi'uc li yajchanc'optaque, jech laj yalbe: 2“Li jchanubtasvanejetic xchi'uc li fariseoetique ja' chotolic ta xchotleb Moisés. 3Ja' yu'un ch'unic me li smantal Dios chayalboxuque, pasic me. Ja' no'ox mu me xapasic jech chac c'u cha'al ta spasique; yu'un ja' no'ox chalic, mu spasic. 4Ja' no'ox ta smeltsanic alal icatsil. Ta xac'beic xcuch li cristianoetique, pero li stuquique me ja'uc jutuc tsc'an tstijic ta sni' sc'obic. 5Scotol li c'usi tspasique ja' no'ox tsc'anic ti ac'o yil li cristianoetique. Smuq'uibtasojbeic xcaxail li smantal Dios ta snaban ta sc'obic o me ta sti'baique, xchi'uc snatubtasojbeic stsitsumal li snatilc'u' slapojique. 6Ja' lec cha'yic ti chchotiic ta sliqueb chotlebal c'alal yorail jujun q'uine, xchi'uc ja' tsmaquic li chotlebaletic ti bu ich'bilic ta muc' ta yut nail tsobobbailetique. 7Ja' tsc'anic noxtoc ti nupbil sc'obic ta xoraltique, xchi'uc ti ‘Jchanubtasvanej’ xi sc'oplalique. 8“Pero li vo'oxuque mu me ja'uc lec xava'yic ti ‘Jchanubtasvanej’ xi ac'oplalique. Yu'un jun no'ox li Jchanubtasvanej avu'unique. Li vo'oxuque achi'il no'ox aba acotolic. 9Mu me boch'o xacuy ta atotic li' ta banamile. Yu'un jun no'ox li Atotic te oy ta vinajele. 10Mu me ja'uc lec xava'yic ti ‘Cajval’ xa'utatique. Yu'un jun no'ox li Avajvalique, ja' li Cristoe. 11Li boch'o ich'bil ta muc' avu'unique, ac'o c'otuc ta avajtunelic. 12Li boch'o muc' chac' sbae, ja' ta sbic'tajesat. Yan li boch'o biq'uit chac' sbae, ja' ta x'ac'at ta ich'el ta muc'. 13“¡Toj abul abaic, vo'oxuc li jchanubtasvanejoxuc ta smantal Diose xchi'uc vo'oxuc li fariseooxuque, jlo'lavanejoxuc! Yu'un chamaquic ta be li ventainel yu'un Diose. Yu'un li vo'oxuque mu xac'anic ventainel yu'un Dios, ja' yu'un chamaquic li boch'otic tsc'anique. 15“¡Toj abul abaic vo'oxuc li jchanubtasvanejoxuc ta smantal Diose xchi'uc vo'oxuc li fariseooxuque, jlo'lavanejoxuc! Yu'un chaxanovic ta nabetic, ta banamil, ta sa'el jch'unolajel avu'unic. C'alal chataique, vo'oxuc ta acojic ti x'ech' to jech yepal tsc'an chich' stojol smulic ta c'oc' jech chac c'u cha'al li vo'oxuque. 16“¡Toj abul abaic, vo'oxuc ti chavac'beic yil be ma'sat acuyojique! Yu'un jech chavalic: ‘Boch'o chal ti ja' testigo yu'un li ch'ulnae, mu persauc chc'ot ta pasel yu'un li c'usi chale. Yan li boch'o chal ti ja' testigo yu'un li c'anal taq'uin te ta ch'ulnae, persa chc'ot ta pasel yu'un li c'usi chale’, xachiic. 17¡Bol cristianooxuc, ma'satoxuc! ¿C'usi tsots sc'oplal: me ja' li c'anal taq'uine, o me ja' li ch'ulna yo' bu tiq'uil li c'anal taq'uine? 18Jech chavalic noxtoc: ‘Boch'o chal ti ja' testigo yu'un li scajleb smoton Diose, mu persauc ta spas li c'usi chale. Yan li boch'o chal ti ja' testigo yu'un li milbil smoton Dios te cajanbile, persa chc'ot ta pasel yu'un li c'usi chale’, xachiic. 19Bol cristianooxuc, ma'satoxuc. ¿C'usi tsots sc'oplal: me ja' li matanale, o me ja' li scajleb matanal yo' bu ts'u'iltasbil chc'ot li smoton Diose? 20Yu'un li boch'o ta sva'an ta testigo li scajleb smoton Diose, testigo xa ic'ot o yu'un c'alal ta smoton Dios ti te cajanbile. 21Jech noxtoc li boch'o ta sva'an ta testigo li ch'ulnae, testigo xa ic'ot o yu'un noxtoc li Diose yu'un ja' te nacal. 22Li boch'o ta sva'an ta testigo li vinajele, testigo xa ic'ot o yu'un c'alal ta xchotleb li Diose, xchi'uc li Dios ti te chotole. 23“¡Toj abul abaic, vo'oxuc li jchanubtasvanejoxuc ta smantal Diose xchi'uc vo'oxuc li fariseooxuque, jlo'lavanejoxuc! Yu'un ja' no'ox tsots sc'oplal chava'yic ti chavaq'uic jun ta lajlajuneb li yaravenoe, li anise, xchi'uc li cominoe., Ja' acomtsanojic ti bu toj tsots sc'oplal ta smantal Diose; ja' ti tsc'an pasel c'usi tuq'ue, li c'uxubinvaneje, xchi'uc ti tsc'an jun co'ntontique. Le'e tsots sc'oplal tsc'an pasel, pero mu stac' comtsanel noxtoc li yantique. 24Ma'sat jtojobtasvanejetic. Ja' tsots sc'oplal chava'yic chajipic loq'uel li bic'tal use; yan li c'usi jujucot ta ca'e te chabiq'uic ochel. 25“¡Toj abul abaic, vo'oxuc li jchanubtasvanejoxuc ta smantal Diose xchi'uc vo'oxuc li fariseooxuque, jlo'lavanejoxuc! Yu'un ja' no'ox lec chapocbeic spat li vasoe xchi'uc li sets'e; yan li yute nojem ta elec' xchi'uc ta sc'upinel c'usitic oy ta avo'nton atuquic. 26¡Ma'sat fariseoetic, ja' pocbeic ba'yuc yut li vaso xchi'uc li sets'e, yu'un jech chlecub c'alal ta spat noxtoc! 27“¡Toj abul abaic, vo'oxuc li jchanubtasvanejoxuc ta smantal Diose xchi'uc vo'oxuc li fariseooxuque, jlo'lavanejoxuc! Ja' jechoxuc jech chac c'u cha'al muquinaltic ti lec sac bonbile. Ta spat xocone lec xa c'upil sba yilel. Pero li yute nojem ta sbaquil animaetic xchi'uc ta c'usitic yan te c'a'emic. 28Ja' jechoxuc ta q'uelel li vo'oxuque. Tuc'oxuc xa yilel ta stojol li cristianoetique, pero li yut avo'ntonique nojem ta lo'lavanej xchi'uc ta scotol c'usitic yan chopol. 29“¡Toj abul abaic, vo'oxuc li jchanubtasvanejoxuc ta smantal Diose xchi'uc vo'oxuc li fariseooxuque, jlo'lavanejoxuc! Yu'un vo'oxuc chacha'meltsanbeic lec smuquinal li j'alc'opetic ta vo'onee, xchi'uc chabonbeic lec smuquinal li boch'otic tuc' yo'nton ijelovique. 30Jech chavalic: ‘Oyuticuc xa'ox c'alal ijelovic li jmoltotactic ta vo'onee, mu'yuc la jtic' jbatic ta smilel j'alc'opetic ec ti jechuque’, xachiic. 31Ti jech chavalique, ja' chavaq'uic ta na'el atuquic ti vo'oxuc xnich'naboxuc li boch'otic la smilic j'alc'opetic ta vo'onee. 32¡Ja' yu'un ts'acubtasbeic me yabtel li amoltotaquic ta vo'onee! 33“¡Jti'valchonetic, sts'unubal orachonetic! ¿Me chanopic ti mu'yuc ono'ox chbat atoj amulic ta tojob mulile? 34Ja' yu'un ta to jtacboxuc tal j'alc'opetic xchi'uc li boch'otic bijique xchi'uc li boch'otic lec sna' xchanubtasvanique. Pero oy ta xlic amilic, xchi'uc chlic ajoc'anic ta cruz; oy chlic avac'beic nucul ta yut nail tsobobbailetic avu'unic; oy chlic anutsic loq'uel ta jujun lum. 35Ja' yu'un vo'oxuc chcom ta abaic scotol li xch'ich'al boch'otic tuc' yo'ntonique. Vo'oxuc chcom ta abaic c'alal lic milatuc tal li Abele, ja' li tuq'uil vinique, xchi'uc c'alal to imilat ta ch'ulna ta nopol scajleb smoton Dios li Zacarías xnich'on Berequiase. 36Melel chacalboxuc, scotol le'e, vo'oxuc chacuchinic, vo'oxuc ti li' oyoxuc ta banamil ta orae. 37“¡Jerusalén, Jerusalén, vo'ot ti atalel o chamil li yaj'alc'optac Diose, ti chavac'be ton li boch'otic tacbilic tal yu'un Dios li' ta atojole! Pero ep xa velta ta jc'an ta jtsob jnaclumetic avu'un jech chac c'u cha'al ta stsob yol ta yolon xic' jcot me'caxan, pero muc xac'anic. 38A'yo ava'yic, ictabil chcom o li alumalique. 39Yu'un mu'yuc xa bu chavilicun o yan velta, ja' to me ic'ot sc'ac'alil ti jech chloc' ta aveique: ‘Toj lec li boch'o tacbil tal yu'un Cajvaltic Diose’, me xachiique, ja' to te chavilicun yan velta”, x'utatic yu'un li Jesuse.


Copyright
Learn More

will be added

X\