San Mateo 17

1C'alal i'ech' xa'ox vaquib c'ac'ale, li Jesuse laj yic' batel Pedro xchi'uc Santiago xchi'uc Juan, yits'in Santiago. Stuquic no'ox laj yic' muyel ta jun toyol vits. 2Li Jesuse te lic c'atajuc ta stojolic. I'ayin xojobal sat jech chac c'u cha'al xojobal c'ac'al. Solel isacub li sc'u'e jech chac c'u cha'al luz. 3Ta ora te ivinaj ta stojolic li Moisés xchi'uc Eliase. Te ilo'ilajic xchi'uc li Jesuse. 4Lic c'opojuc li Pedroe, jech laj yal: —Cajval, toj lec ti li' oyutique. Me chac'ane, ta jpascutic oxbej vacaxna li'i; jun avu'un, jun yu'un Moisés, jun yu'un Elías —xut. 5C'alal ja'o chlo'ilaj li Pedroe, ital jvol toc, oy xojobal; te macbil ic'otic. Te laj ya'yic c'op ta yut toc, jech laj yal: “Li'i ja' jnich'on, lec jc'anoj. Lec jpatoj co'nton yu'un. A'ibeic sc'op”,, xi. 6C'alal jech laj ya'yic li oxibique la spatan sbaic ta lumtic, solel ep ixi'ic. 7Li Jesuse inopaj batel; la stij liquel, jech laj yalbe: —Licanic, mu xaxi'ic —xut. 8C'alal la stoy satique, mu'yuc xa boch'o laj yilic; ja' xa no'ox stuc te oy li Jesuse. 9C'alal ja'o chyalic tal ta vitse, i'albatic mantal yu'un li Jesuse: —Mu to me boch'o xavalbeic li c'usi laj avilique, ja' to me licha'cuxi loq'uel ta jmuquinal, vu'un ti Xnich'on cristiano lic'ote —x'utatic. 10Li yajchanc'optaque jech la sjac'beic: —¿C'u yu'un ta xalic jchanubtasvanejetic ti ta persa ja' ba'yuc ta xtal li Eliase? —xutic. 11Itac'ov li Jesuse: —Ta melel jech ts'ibabil ta sc'op Dios ti ja' ba'yuc ta xtal li Eliase, yu'un chtal xcha'lecubtas scotol. 12Pero chacalboxuc ava'yic ti jeloven xa li Eliase, pero mu'yuc laj yotquinic. La spasbeic c'usi tsc'an yo'ntonic. Ja' no'ox jech chiyac'bicun jvocol ec, vu'un ti Xnich'on cristiano lic'ote —xi. 13Jech la sna'ic o yajchanc'optac ti ja' sc'oplal Juan j'ac'vanej ta vo' laj yal li Jesuse. 14C'alal ic'otic yo' bu tsobol epal cristianoetique, te inopaj tal jun vinic. La squejan sba ta stojol li Jesuse, jech laj yalbe: 15—Cajval, c'uxubinbun jnich'on yu'un yich'oj tu'p ic'. Toj ep ta xich' vocol. Ep ta velta chbalch'uj ta c'oc', xchi'uc chbalch'uj ta vo'. 16Laj quic' tal ta stojol avajchanc'optac, pero muc xu' yu'unic la scoltabicun —xi. 17Li Jesuse jech laj yal: —Vo'oxuc ti li' oyoxuc ta orae, mu xac'an xach'unic, solel ch'ayemoxuc. Ep xa c'ac'al li' jchi'ucoxuc. Ep xa c'ac'al la jts'icboxuc ti c'u xa'elanique. Iq'uic tal li quereme —xi. 18Li Jesuse laj yut loq'uel li pucuje. Jech iloc' ta yo'nton li quereme, jech ta ora icol. 19Li yajchanc'optaque jech la sjac'beic Jesús ti c'alal stuquic xa'oxe: —¿C'u yu'un muc xu' cu'uncutic la jloq'uescutic li pucuje? —xutic. 20Itac'ov li Jesuse: —Ja' ta scoj ti mu'yuc to lec ach'unojique. Melel li c'usi chacalboxuque, me oy xa xch'unojel avo'ntonic jech chac c'u cha'al biq'uit bec' moztasae, xu' avu'unic jech chavalbeic li vits li'i: ‘Loc'an batel li'i, batan le'e’, me xavutique, ta xbat avu'unic. Mu'yuc c'usi ti mu xu' avu'unique. 21Pero li jchop ta pucujetic le'e, mu xloc', ja' to me chac'opanic Dios, me chavictaic ixime —xi. 22C'alal jmoj xa'ox te tsobolic ta Galilea banamile, jech laj yalbe yajchanc'optac li Jesuse: —Vu'un ti Xnich'on cristiano lic'ote ta xi'ac'at ta c'abal ta sc'ob cristianoetic. 23Ta xismilicun, pero chicha'cuxi ta yoxibal c'ac'al —xut. C'alal laj ya'yique, bats'i ep laj yat yo'ntonic. 24C'alal ic'otic ta lum Capernaume, te italic ta stojol Pedro jayibuc jtsobtaq'uinetic sventa spatan ch'ulna. Jech la sjac'beic: —¿Me ta xac' ec li chib dracma taq'uin jchanubtasvanej avu'unique? —xutic. 25Itac'ov li Pedroe: —Ta xac' —xi. C'alal i'och ta yut na li Pedroe, ja' ba'yuc ic'opanat yu'un li Jesuse. Jech ijac'bat: —¿C'usi chanop, Simón? ¿Boch'o ta sc'anbe taq'uin li muc'tic ajvaliletic li' ta banamile? ¿Me ja' ta sc'anbe li xnich'nabe, o me yan cristianoetic ta sc'anbe? —xut. 26Itac'ov li Pedroe: —Ja' ta sc'anbe yan cristianoetic —xi. Jech i'albat noxtoc: —Ja' yu'un li nich'naletique mu persauc tstojic. 27Pero ti c'u cha'al mu soc yo'ntonic cu'untique, batan ta nab, tic'o ochel ta yut nab li snitubil choy avu'une. Li sbacotal choy chanit loq'uele jach'bo ye; te chata jsep estatero taq'uin. Ich'o tal, ja' stojol jpatantic ta jchibaltic —xut.


Copyright
Learn More

will be added

X\